.jpg)
ស្រ្តីជនរងគ្រោះ ដែលរលាកលើងដោយសារប្តី។ នគរបាល
ក្រចេះ: បុរសម្នាក់ត្រូវនគរបាល ស្រុកស្នួលឃាត់ខ្លួន និងដឹកទៅសង្គ្រោះនៅមន្ទីរពេទ្យបង្អែកស្រុកស្នួលបន្ទាប់ពីធ្វើឲ្យឆាបឆេះប្រេងសាំងរលាកខ្លួនប្រពន្ធរបួសធ្ងន់នៅភូមិកណ្តាល ឃុំស្រែចារ ស្រុកស្នួល ខេត្តក្រចេះកាលពីល្ងាចថ្ងៃទី ១៧ វិច្ឆិកា។
លោក ចាន់ សុខគីម អធិការនគរបាលស្រុកស្នួលប្រាប់ពីម្សិលមិញថា បុរសជាប្តី និងជាអ្នកបង្កឈ្មោះ កែវ ប៊ុនឡុង អាយុ ៣៨ ឆ្នាំ រីឯស្ត្រីរងគ្រោះជាប្រពន្ធឈ្មោះ ឈុំ ស្រី អាយុ ៣៣ ឆ្នាំ ពួកគេមានកូនតូចៗ ៣ នាក់ (ប្រុស ២ ស្រី ១) ក្នុងបន្ទុក។
លោកប្រាប់ថា ពាក់ព័ន្ធនឹងបទល្មើសហិង្សានេះសមត្ថកិច្ចរបស់លោក មិនទាន់ធ្វើការឃាត់ខ្លួនបុរសជាប្តីនៅឡើយទេ ព្រោះគាត់ឆេះរលាកដៃ និងជើងដែរហើយត្រូវយកទៅព្យាបាលនៅមន្ទីរពេទ្យសិន។ ប៉ុន្តែលោកបានដាក់កម្លាំងសមត្ថកិច្ចរបស់លោកឲ្យចាំយាមនៅមន្ទីរពេទ្យនោះដែរ ។
លោកបន្តថា តាមសាក្សី និងក្រោយពីប្រមូលព័ត៌មានជុំវិញ ហេតុការណ៍នេះមក បង្ហាញថាជនបង្កខឹងនឹងប្រពន្ធរបស់គាត់ហើយគាត់យកដែកកេះមកកេះបំណងដុតម៉ាស៊ីនត្រង់សឺន័រចោល។ ប៉ុន្តែពេលនោះមានការប្រតាយប្រតប់គ្នាហើយក៏ធ្វើឲ្យប៊ីដុងដែលដាក់ប្រេងសាំងនៅក្បែរនោះរលំកំពប់បណ្តាលឲ្យឆាបឆេះតែម្តងទៅ។
លោកថា៖ «រឿងនេះយើងគិតថាជាអំពើហិង្សា តែដោយប្តី និងប្រពន្ធរលាកខ្លួនទាំង ២ នាក់ដូច្នេះ យើងបញ្ជូនពួកគាត់ទៅព្យាបាលសិន។ តែបុរសជាប្តី យើងដាក់កម្លាំងយាមគាត់»។
លោក អ៊ុច សុផាណា នាយនគរបាលប៉ុស្តិ៍ ឃុំស្រែចារ ប្រាប់ពីម្សិលមិញតាមសម្តីសាក្សីនៅកន្លែងកើតហេតុថា មូលហេតុនៃអំពើហិង្សានេះគឺកាលពីល្ងាចវេលាម៉ោង ៦ ថ្ងៃទី ១៧ វិច្ឆិកា ជនបង្កបានជុំគ្នាផឹកស្រាជាមួយអ្នកភូមិ។ ខណៈកំពុងផឹកស្រានោះស្ត្រីឈ្មោះ ឈុំ ស្រី ជាប្រពន្ធរបស់ជនបង្កបានដើរទៅហៅប្តីឲ្យឈប់ផឹកស្រាហើយឲ្យទៅចៀរជ័រកៅស៊ូ តែត្រូវបុរសជាប្តីខឹង។
លោកបន្តថា ពេលនោះបុរសជាប្តីបានស្ទុះទៅទាញម៉ាស៊ីនត្រង់សឺន័រ មកបញ្ឆេះបំណងអារសសរផ្ទះចោល។ ប៉ុន្តែត្រូវស្ត្រីរងគ្រោះស្ទុះទៅប្រតាយប្រតប់ប្តីដើម្បីបញ្ឈប់សកម្មភាព តែត្រូវជនបង្កយកដែកកេះ មកកេះ តែចៃដន្យនៅក្បែរនោះមានប៊ីដុងសាំង ១ ដែលមានសាំង ៥ លីត្រកំពប់ធ្វើឲ្យឆាបជាអណ្តាតភ្លើងឆេះទាំងស្ត្រីរងគ្រោះ និងប្តីទៅ។
លោកបន្តថា ដោយឃើញប្រពន្ធត្រូវភ្លើងសាំងឆាបឆេះខ្លួនបែបនេះ ក៏ស្ទុះទៅលើកបីប្រពន្ធដាក់ក្នុងពាងទឹក ប៉ុន្តែភ្លើងមិនរលត់ក៏ត្រូវបុរសជាប្តីលើកប្រពន្ធពីពាងទឹកដាក់នៅលើដីហើយពន្លត់រហូតរលត់ភ្លើង និងដឹកទៅសង្គ្រោះនៅមន្ទីរពេទ្យបង្អែកខេត្តក្រចេះ។ ស្ត្រីរងគ្រោះបើព្យាបាលហើយក៏ប្រហែលជាពិការផង៕
