ព្រះសីហនុៈ កម្លាំងសមត្ថកិច្ចខេត្តព្រះសីហនុ កាលពីម្សិលមិញ បានចុះបង្ក្រាបទីតាំងក្លិបមួយកន្លែង ក្នុងសង្កាត់លេខ ៤ ក្រុងព្រះសីហនុ ដែលមានឈ្មោះថា ក្លិបអូបាម៉ា KTV ដោយបានឃាត់ខ្លួនមនុស្សយ៉ាងហោចណាស់ជាង ១០០ នាក់ ដែលភាគច្រើនជាជនជាតិចិន ខណៈក្នុងប្រតិបត្តិការនោះ ក៏បានដកហូតគ្រឿងញៀនមួយចំនួនផងដែរ។
អ្នកនាំពាក្យសាលាខេត្តព្រះសីហនុ លោក ឃាង ភារម្យ បានប្រាប់ភ្នំពេញប៉ុស្តិ៍ពីម្សិលមិញថា ប្រតិបត្តិការចុះបង្ក្រាបក្លិបមួយនេះ បានធ្វើឡើងនៅម៉ោងប្រមាណ ៣ ទៀបភ្លឺ និងក្រោមការដឹកនាំដោយផ្ទាល់របស់លោក គួច ចំរើន អភិបាល ខេត្តព្រះសីហនុ។
ក្រោយចុះបង្ក្រាប មានមនុស្សយ៉ាងហោចណាស់ ១៥៤ នាក់ ត្រូវបានឃាត់ខ្លួន និងបញ្ចូនទៅស្នងការដ្ឋាននគរបាលខេត្ត ដើម្បិធ្វើការសាកសួរ ចំណែកគ្រឿងញៀន ដែលរឹបអូសបាន ជំនាញបន្តត្រួតពិនិត្យ។
លោក ភារម្យ បានអះអាងថា សមត្ថកិច្ចបានធ្វើការស្រាវជ្រាវយ៉ាងយកចិត្តទុកដាក់ បន្ទាប់ពីបានបង្រ្កាបក្លិបនៅក្នុងខេត្តនេះ ចំនួន ២ រួចមកហើយ។
លោកបញ្ជាក់ថា៖ «យើងពង្រឹងខ្លាំងទៅលើបញ្ហាសន្តិសុខសណ្តាប់ធ្នាប់ ដូច្នេះកម្លាំងជំនាញ បានធ្វើការអង្កេតយ៉ាងយកចិត្តទុកដាក់បំផុត ដោយយើងបានរកតម្រុយឃើញរហូតដល់ចុះបង្រ្កាបបាន។ មិនថាទីតាំងមួយកន្លែងនេះទេ កន្លែងផ្សេងទៀត បើយើងរកឃើញថា មានបទល្មើសហើយ គឺត្រូវតែចុះបង្រ្កាប»។
លោក ជួន ណារិន្ទ ស្នងការនគរបាលខេត្តព្រះសីហនុ បានប្រាប់ភ្នំពេញប៉ុស្តិ៍ដែរថា ក្រោយការឃាត់ខ្លួន ជំនាញបានបន្តសាកសួរ និងពិនិត្យទឹកនោម ដើម្បីស្វែងរកសារធាតុញៀន និងដើម្បីកំណត់មុខសញ្ញាមេខ្លោង និងជនជាប់សង្ស័យជុំវិញបទល្មើសនេះ។
លោក ណារិន្ទ បញ្ជាក់ថា ក្នុងមនុស្សដែលបានឃាត់ខ្លួននេះ ភាគច្រើនជនជាតិបរទេស ដោយក្នុងនោះ ជនជាតិចិន មានចំនួនច្រើនជាងគេ ដល់ទៅ ៧០ ឬ ៨០ ភាគរយដែលពួកគេជាភ្ញៀវទេសចរ។
លោកបញ្ជាក់ថា៖ «ប្រមូលមកទាំងអស់ បូករួមទាំងអ្នកយាមឡាន យាមអី ព្រោះវាស្ថិតក្នុងរង្វង់ប្រតិបត្តិការហើយយើងញែកម្តងបន្តិចៗ ដោយទី ១ ធ្វើតេស្តទឹកនោម និងទី២ យើងកំពុងញែកឲ្យចេញថា អ្នកយាមឡានប៉ុន្មាន អ្នកអនាម័យប៉ុន្មាន អ្នកយាមម៉ាស៊ីនភ្លើងប៉ុន្មាន និងអ្នកបម្រើប៉ុន្មាន ហើយភ្ញៀវរួមទាំងអ្នកមើលការខុសត្រូវប៉ុន្មាន?»។
លោក ជួន ណារិន្ទ កាលពីម្សិលមិញមិនទាន់អាចបញ្ជាក់ច្បាស់ទេថា គ្រឿងញៀនដែលបានដកហូតនោះ មានចំនួនប៉ុន្មាន ព្រោះកំពុងស្ថិតក្នុងការត្រួតពិនិត្យ ប៉ុន្តែលោកអះអាងថា ភាគច្រើនអ្នកប្រើប្រាស់នៅក្នុងក្លិប បានប្រើប្រាស់គ្រឿងញៀន ជាប្រភេទ ខេតាមីន (ម៉ាទឹកកក)។
លោកបញ្ជាក់ថា៖ «សំខាន់យើងត្រូវតែធ្វើតេស្តឲ្យបានហ្មត់ចត់ វេចខ្ចប់ ហើយនិងការថ្លឹង។ ប៉ុន្តែវាមិនមានច្រើនប៉ុន្មានទេ ព្រោះពេលយើងចូលទៅ (ក្លិប) វាពាក់ព័ន្ធនឹងការប្រើប្រាស់អស់ប៉ុន្មានម៉ោងរួចបាត់ទៅហើយ។ អ៊ីចឹងមិននៅសល់ប៉ុន្មានទេ ដែលយើងរឹបអូសបាន ព្រោះឥឡូវមិនទាន់មានជាគីឡូជាខាំអីទេ កំពុងធ្វើតេស្ត និងវេចខ្ចប់»។
យ៉ាងណាក៏ដោយ ជាមួយនឹងប្រតិបត្តិការចុះបង្ក្រាបក្លិប អូបាម៉ា នេះដែរ អាជ្ញាធរខេត្តព្រះសីហនុ មិនអាចបញ្ជាក់បានទេថា ម្ចាស់ក្លិបជានរណា ខណៈសមត្ថកិច្ចកំពុងស៊ើបអង្កេតពីភាពត្រឹមត្រូវតាមច្បាប់ ចំពោះអាជីវកម្មមួយនេះ។
លោកស្រី ចៀប សុធារី មន្ត្រីសម្របសម្រួលសមាគមអាដហុកប្រចាំខេត្តព្រះសីហនុ សាទរចំពោះការបង្រ្កាបនេះ និងចង់ឲ្យអាជ្ញាធរ បន្តចុះបង្រ្កាបជាបន្តបន្ទាប់ទៀត ដើម្បីទប់ស្កាត់នូវភាពអនាធិបតេយ្យ ជាពិសេស ការភ្លើតភ្លើនរបស់យុវជន។ លោកស្រីបន្តថា ទាំងក្លិបនៅភ្នំពេញ ឬតាមបណ្តាក្លិបនានានៅតាមបណ្តាខេត្ត គឺសុទ្ធតែមានប្រើប្រាស់នូវគ្រឿងញៀន ស្របពេលលោកស្រី មើលឃើញថា ចំពោះក្លិបនៅក្នុងខេត្តព្រះសីហនុ គឺភាគច្រើនមានម្ចាស់ជាជនជាតិចិន។
ជាមួយគ្នានេះ លោកស្រីក៏រំពឹងដែរថា៖ «នៅពេលសមត្ថកិច្ចបង្រ្កាបបានហើយ សុំកុំឲ្យមានការលើកលែង ត្រូវផ្តន្ទាទោសទៅតាមច្បាប់របស់ប្រទេស កម្ពុជា ហើយដាក់ទោសឲ្យធ្ងន់ទៀត។ បើនិយាយតាមត្រង់ទៅ ជួយរកមើលផង ថាអ្នកណានៅពីក្រោយខ្នងការពារមុខរបរនេះ។ តាមពិតយើងមិនមែនឲ្យគាត់បើកក្លិបរាំស្រាតដូច្នេះទេ ហើយអ្នកដែលពាក់ព័ន្ធហ្នឹងការជួញដូរគ្រឿងញៀននេះ ក៏ត្រូវយកមកផ្តន្ទាទោសដែរ។ បើសិនជាចាប់បានមេខ្លោងដែលនៅពីក្រោយការជួញដូរគ្រឿងញៀនហ្នឹង សូមមេត្តាប្រកាសជាសាធារណៈឲ្យគេបានស្គាល់មុខផង»។
តាមរបាយការណ៍របស់ ស្នងការនគរបាលខេត្តព្រះសីហនុ កាលពីដើមខែកក្កដា បានឲ្យដឹងថា ទូទាំងក្រុងព្រះសីហនុ មានក្លិបកម្សាន្តខារ៉ាអូខេចំនួន ៤១ កន្លែង ដោយក្នុងនោះ ស្ថិតក្រោមការគ្រប់គ្រងដោយជនជាតិចិន ខណៈរបាយការណ៍ដដែលបានបង្ហាញថា អាជីវកម្មជាង ៩០ ភាគរយ នៅខេត្តនាពេលបច្ចុប្បន្នត្រូវបានគ្រប់គ្រងដោយជនជាតិចិន រាប់ចាប់តាំងពីសណ្ឋាគារ កាស៊ីណូ ភោជនីយដ្ឋាន រហូតដល់ហាងម៉ាស្សា៕