.jpg)
សមត្ថកិច្ចចុះត្រួតពិនិត្យផ្ទះលក់ស្រានៅក្នុងស្រុកល្វាឯម។ រូបថត FN
កណ្តាលៈ នគរបាលបានឃាត់ខ្លួនមនុស្សចំនួន ១១ នាក់ នៅក្នុងស្រុកល្វាឯមកាលពីថ្ងៃទី ១៩ ខែឧសភា ដែលជាអ្នកលក់ស្រាស និងស្រាត្រាំថ្នាំមានសារធាតុមេតាណុលលើសកម្រិត បញ្ជូនទៅកាន់ស្នងការដ្ឋាននគរបាលខេត្តកណ្តាលក្រោយពីចំនួនអ្នកផឹកស្រាបានពុលស្លាប់ជាបន្តបន្ទាប់កើនឡើងដល់ ១៣ នាក់។
លោក ហេង សុផល អធិការស្រុកល្វាឯមនៅថ្ងៃទី ២០ ខែ ឧសភា ឆ្នាំ ២០២១ បានប្រាប់ ភ្នំពេញ ប៉ុស្តិ៍ថា៖ «ទាំង ១១ នាក់នេះត្រូវបានពិនិត្យឃើញថា មានលក់ស្រាស និងស្រាថ្នាំ មានសារធាតុមេតាណុលខ្ពស់ត្រូវបានបញ្ជូនទៅស្នងការដ្ឋាននគរបាលខេត្ត»។ «ខ្ញុំមិនទាន់ដឹងនោះទេថា ត្រូវដោះលែង ឬក៏ត្រូវឃុំ ព្រោះហួសដែនសមត្ថកិច្ចរបស់ខ្ញុំ»។
លោក សុផល ក៏បានឱ្យដឹងទៀត មនុស្ស ៦ នាក់ផ្សេងទៀត ដែលជាអ្នកលក់ស្រាសនៅក្នុងស្រុកជាមួយគ្នានេះដែរ ត្រូវបានអាជ្ញាធរមូលដ្ឋាននាំខ្លួនទៅអប់រំអំពីការលាយស្រាមិនអាចដឹងថា មានជាតិពុល ឬអត់មានជាតិពុលកម្រិតណាមួយនោះ ហើយក៏មិនត្រូវលក់គ្រឿងស្រវឹង នៅក្នុងអំឡុងពេលដែលរាជរដ្ឋាភិបាលហាមលក់គ្រឿងស្រវឹងដើម្បីប្រយុទ្ធប្រឆាំងទៅនឹងជំងឺកូវីដ ១៩។
លោកបានឱ្យដឹងថា ក្រៅពីអ្នកស្លាប់ទាំង ១៣ នាក់នោះនៅមានមនុស្ស ៤ នាក់ទៀត កំពុងសម្រាកព្យាបាលនៅក្នុងមណ្ឌលសុខភាពបង្អែកស្រុក និង ២ នាក់ផ្សេងទៀត ដែលមានអាការធ្ងន់ធ្ងរត្រូវបានបញ្ជូនទៅមន្ទីរពេទ្យនៅក្នុងទីក្រុងភ្នំពេញ។
ទន្ទឹមគ្នានេះដែរ ក៏មានពលរដ្ឋជាង ៩០ នាក់ ដែលបានផឹកស្រាស និងស្រាត្រាំថ្នាំនោះដែរ បានទៅពិគ្រោះយោបល់អំពីបញ្ហាសុខភាព នៅមណ្ឌលសុខភាពចល័ត ក្រោយពីអាជ្ញាធរបានផ្សព្វផ្សាយ ។
លោក សុផល ឱ្យដឹងផងដែរថា លោក គង់ សោភ័ណ្ឌ អភិបាលខេត្តកណ្តាលបានណែនាំដល់អាជ្ញាធរមូលដ្ឋានទាំងអស់ត្រូវធ្វើការផ្សព្វផ្សាយ និងទប់ស្កាត់ពាក់ព័ន្ធនឹងការលក់គ្រឿងស្រវឹង ជាពិសេសការលក់ស្រាស និងស្រាត្រាំថ្នាំ ដោយសមត្ថកិច្ចត្រូវចុះទៅតាមកន្លែងលក់ដូរទាំងអស់ឱ្យបញ្ឈប់ជាបន្ទាន់ និងធ្វើការដកហូត ផ្អាកការលក់ជាបណ្តោះអាសន្នរហូតដល់មានគោលការណ៍ថ្មី។
លោកថ្លែងថា៖ «មួយទៀត យើងបានចុះមកដល់ទីតាំងបុណ្យសព ណែនាំពួកគាត់ អ្នកកំដរបុណ្យសពហ្នឹង កុំឱ្យទទួលទានស្រា ដើម្បីកុំឱ្យប៉ះពាល់ ឬគ្រោះថ្នាក់ដល់អាយុជីវិតប្រជាពលរដ្ឋផ្សេងទៀត ដែលនៅតាមភូមិស្រុកភាគច្រើនឱ្យតែមានបុណ្យសព តែងតែមានការហូបចុកកំដរបុណ្យសព»។
លោក ឈឿន សុចិត្ត ស្នងការនគរបាលខេត្តកណ្តាលនៅថ្ងៃទី ២០ ខែឧសភា មិនអាចទាក់ទងសុំព័ត៌មានអំពីការឃាត់ខ្លួនមនុស្សចំនួន ១១ នាក់ នោះបានទេ។
លោក គង់ សោភ័ណ្ឌ អភិបាលខេត្តកណ្តាលបានបញ្ជាក់ថាទាំងកម្លាំងស្នងការខេត្ត និងស្រុកបានប្រមូលសំណុំរឿងពុលស្រាអស់ហើយ ដោយបាននិងកំពុងអនុវត្តនីតិវិធីបន្តទៅតាមផ្លូវច្បាប់ពាក់ព័ន្ធនឹងអ្នកផលិត និងអ្នកលក់។
លោកថ្លែងថា៖ «យើងកំពុងអនុវត្តតាមច្បាប់ហើយមិនអាចលើកលែងបានទេត្រូវតែអនុវត្តទោស ជាពិសេសអ្នកផលិត»។
លោក គង់ សោភ័ណ្ឌ ថ្លែងថា ចំពោះករណីស្លាប់ប្រជាពលរដ្ឋដោយសារពុលស្រានៅក្នុងស្រុកល្វាឯមនេះគឺមិនមែនពួកគាត់ពិសាតែ ១ ពេលនេះទេពួកគាត់គឺជាអ្នកចូលចិត្តពិសារាល់ថ្ងៃទើបឈានដល់ការស្លាប់។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៅថ្ងៃទី ២០ ខែឧសភា បានឱ្យដឹងថា ករណីពលរដ្ឋពុលស្រាស និងស្រាត្រាំថ្នាំនៅក្នុងស្រុកល្វាឯមមានវត្តមានសារធាតុមេតាណុលដែលជាសារធាតុពុលច្រើនហួសកម្រិតអនុញ្ញាតពី ១០ ដងទៅ ១០០ ដង ដែលអាចបង្កឱ្យប្រជាពលរដ្ឋស្លាប់ ប្រសិនបើបរិភោគចាប់ពី ១០០ មិលី្លលីត្រឡើងទៅ។
ក្រសួងសុខាភិបាលនៅថ្ងៃទី ២០ ខែឧសភា ក៏បានអំពាវនាវដល់ប្រជាពលរដ្ឋ សូមបញ្ឈប់ជាបន្ទាន់នូវការពិសាស្រាស ឬស្រាថ្នាំដែលផលិតដោយមិនមានបច្ចេកទេសត្រឹមត្រូវ ជាពិសេសស្រាដែលយកមេតាណុលមកលាយ គឺហាមដាច់ខាត៕
វីដេអូ៖
