.jpg)
នគរបាលចរាចរណ៍នឹងចាប់ផ្ដើមអនុវត្តអនុក្រឹត្យថ្មីពីថ្ងៃ ១ ឧសភា ដោយប្រាក់ពិន័យកើន ៣ ឬ ៥ ដង ចំពោះអ្នកបើកបរល្មើសច្បាប់។ រូបថត RTSD
ភ្នំពេញ៖ នគរបាលចរាចរណ៍នឹងចាប់ផ្ដើមអនុវត្តតាមអនុក្រឹត្យថ្មីដែលបានកំណត់អំពីការផាកពិន័យកើនដល់ ៣ ដង ឬទៅដល់ ៥ ដងនៃអនុក្រឹត្យចាស់ ចំពោះអ្នកបើកបរល្មើសច្បាប់ចាប់ពីថ្ងៃទី ១ ខែឧសភា ខាងមុខនេះ។ មន្ត្រីរំពឹងថា ការបន្ថែមប្រាក់ផាកពិន័យចំពោះបទល្មើសចរាចរណ៍នេះ នឹងជួយកាត់បន្ថយគ្រោះថ្នាក់ចរាចរណ៍។
លោក ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានចេញសេចក្ដីជូនដំណឹងកាលពីថ្ងៃទី ១៧ មេសា ថា ចាប់ពីថ្ងៃទី ១ ឧសភា កងកម្លាំងនគរបាលចរាចរណ៍នឹងចាប់ផ្ដើមផាកពិន័យអន្តរការណ៍ចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក ដែលបានដំឡើងកម្រិតទឹកប្រាក់ពិន័យក្នុងចំនួនពី ៣ ទៅ ៥ ដង។
សេចក្ដីជូនដំណឹងបានឲ្យដឹងថា៖ «គណៈកម្មាធិការជាតិសុវត្ថិភាពចរាចរណ៍ផ្លូវគោក សូមអំពាវនាវដល់ប្រជាពលរដ្ឋប្រើប្រាស់ផ្លូវ ត្រូវចូលរួមគោរពច្បាប់ចរាចរណ៍ផ្លូវគោក ដើម្បីការពារអាយុជីវិតខ្លួនឯង អ្នកដទៃ ប្រកបដោយឆន្ទៈភ្ញាក់រឭកខ្ពស់ សំដៅលើកស្ទួយកិត្តិយស សេចក្ដីថ្លៃថ្នូរ និងសណ្ដាប់ធ្នាប់សង្គមនៅព្រះរាជាណាចក្រកម្ពុជា»។
យោងតាមអនុក្រឹត្យថ្មីការបើកបរមិនពាក់មួកសុវត្ថិភាព ឬពាក់មួកមិនបានត្រឹមត្រូវ ត្រូវពិន័យទឹកប្រាក់កើនដល់ ៦ ម៉ឺនរៀល។
ចំពោះការបើកបរស្ថិតក្នុងស្ថានភាពស្រវឹង ដែលមានអត្រាជាតិអាល់កុលចាប់ពី ០,៤០ មិល្លីក្រាមក្នុង ១ លីត្រខ្យល់ ឬពី ០,៨០ ក្រាម ក្នុង ១ លីត្រឈាមឡើងទៅ នឹងត្រូវពិន័យចំនួន ១ លានរៀលសម្រាប់អ្នកបើកបរទោចក្រយានយន្ត និងត្រីចក្រយានយន្ត។ ពិន័យចំនួន ២ លានសម្រាប់អ្នកបើកបររថយន្តធុនស្រាល និង ៤ លានរៀល សម្រាប់អ្នកបើកបររថយន្តធុនធ្ងន់។
ប្រសិនបើក្នុងរយៈពេល ៦ ខែ អ្នកបើកបរបានប្រព្រឹត្តល្មើសដោយបើកបរស្ថិតក្នុងស្ថានភាពស្រវឹងចំនួន ២ ដង នឹងត្រូវផ្ដន្ទាទោសតាមច្បាប់ ដោយមន្ត្រីនគរបាលចរាចរណ៍ផ្លូវគោកនឹងធ្វើកំណត់ហេតុបញ្ជូនទៅតុលាការ ដើម្បីចាត់ការតាមផ្លូវច្បាប់។
រដ្ឋាភិបាលបានកំណត់យកឆ្នាំ ២០២០ ជាឆ្នាំដើម្បីកាត់បន្ថយគ្រោះថ្នាក់ចរាចរណ៍ជាអតិបរមា បន្ទាប់ពីបានកើនឡើងយ៉ាងគំហុកកាលពីឆ្នាំ ២០១៩ ដែលមានអ្នកស្លាប់កើនឡើង ២២០ នាក់ ស្មើនឹង ១២% និងអ្នករបួសកើនឡើង ១ ៣៧១ នាក់ ស្មើនឹង ២៩% បើប្រៀបធៀបទៅនឹងឆ្នាំ ២០១៨។
លោក ស ខេង រដ្ឋមន្ត្រីក្រសួងមហាផ្ទៃបានថ្លែងនៅក្នុងសេចក្ដីជូនដំណឹងថា នៅក្នុងត្រីមាសទី១ នៃឆ្នាំ ២០២០ នេះ គ្រោះថ្នាក់ចរាចរណ៍នៅទូទាំងប្រទេសបានថយចុះ ១៥០ លើក ស្មើនឹង ១៤% គឺចំនួនអ្នកស្លាប់ថយចុះ ២២០ នាក់ ស្មើនឹង ៤% និងរបួសថយចុះ ២៧៧ នាក់ ស្មើនឹង ១៧% បើប្រៀបធៀបនឹងរយៈពេលដូចគ្នាកាលពីឆ្នាំ ២០១៩ កន្លងមកនេះ។
លោក ស ខេង ថ្លែងថា៖ «អត្រាធ្លាក់ចុះទាំងចំនួនគ្រោះថ្នាក់ អ្នកស្លាប់ និងរបួសនេះ គឺជាលទ្ធផលកើតឡើងក្នុងបរិបទ ដែលគណៈកម្មាធិការជាតិសុវត្ថិភាពចរាចរណ៍ផ្លូវគោកបានជំរុញការរឹតបន្តឹងការអនុវត្តច្បាប់យ៉ាងសកម្មនៅទូទាំងប្រទេស ដើម្បីកាត់បន្ថយគ្រោះថ្នាក់ចរាចរណ៍ដែលមានកំណើនយ៉ាងគំហុកកាលពីឆ្នាំ ២០១៩»។
លោក គង់ រតនៈ ប្រធានវិទ្យាស្ថានសុវត្ថិភាពចរាចរណ៍ផ្លូវគោកបានថ្លែងដោយបង្ហាញការគាំទ្រចំពោះការដំឡើងប្រាក់ផាកពិន័យតាមអនុក្រឹត្យថ្មីនេះ ប៉ុន្តែមិនដឹងថា ការអនុវត្តតាមអនុក្រឹត្យនេះនឹងមានប្រសិទ្ធភាព ឬយ៉ាងណា ពីព្រោះការប្រកាសចាប់ផ្ដើមអនុវត្តតាមអនុក្រឹត្យនៅថ្ងៃទី ១ ឧសភា គឺធ្វើឡើងហាក់លឿនពេកដោយមិនទាន់មានការផ្សព្វផ្សាយឱ្យបានទូលំទូលាយទៅដល់ប្រជាពលរដ្ឋនៅឡើយ។
លោក រតនៈ ថ្លែងថា៖ «រយៈពេលដែលប្រកាសថា ដំឡើងហ្នឹង គឺមានពេលប្រហែលមិនដល់ ៣ ខែផង។ អ៊ីចឹង! ការផ្សព្វផ្សាយមិនទាន់បានទូលាយ នឹងធ្វើឱ្យពលរដ្ឋមានការភ្ញាក់ផ្អើល។ សម្រាប់ខ្ញុំចង់ឱ្យផ្សព្វផ្សាយអនុក្រឹត្យថ្មីហ្នឹង ចង់ធ្វើឡើងឱ្យបានទូលាយ ហើយបើពន្យារពេលអនុវត្តបន្តិចក៏ល្អដែរ»។
លោក ហ៊ឹម យ៉ាន អគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោកកាលពីម្សិលមិញមិនអាចទាក់ទងបានតាមទូរស័ព្ទ ដើម្បីសុំអត្ថាធិប្បាយបន្ថែមបានទេ លើការអនុវត្តអនុក្រឹត្យថ្មីនោះ។
ខណៈ លោក ចាន់ ធារី ប្រធាននាយកដ្ឋាននគរបាលចរាចរណ៍ផ្លូវគោក បានជំរុញឱ្យទាក់ទងទៅលោក ថៃ វិសាល ជាអនុប្រធាននាយកដ្ឋានវិញ ប៉ុន្តែលោកមិនបានលើកទូរស័ព្ទ៕
វីដេអូ៖
