.jpg)
នគរបាលថតបានល្បឿនរថយន្តបើកល្មើសច្បាប់។ រូបថត នគរបាល
ខេត្តស្វាយរៀងៈ ស្នងការដ្ឋាននគរបាលខេត្តស្វាយរៀងបានដាក់ពិន័យដោយបញ្ឈរជើងមន្ត្រីនគរបាលចរាចរណ៍ ៤ នាក់ កាលពីថ្ងៃទី ២៣ ខែវិច្ឆិកា ក្រោយពីបានប្រើអំពើហិង្សាក្នុងអំឡុងពេលបំពេញការងារអនុវត្តច្បាប់ចរាចរណ៍នៅលើដងផ្លូវ បណ្តាលឱ្យពលរដ្ឋជាអ្នកបើកបររថយន្តម្នាក់រងរបួសបែកមាត់។
លោក កឹង ឃន ស្នងការនគរបាលខេត្តស្វាយរៀងបានថ្លែងដោយសុំមិនបង្ហាញអត្តសញ្ញាណរបស់មន្ត្រីនគរបាលចរាចរណ៍ទាំង ៤ រូបនោះទេ។
យោងតាមរបាយការណ៍របស់អ្នកនាំពាក្យស្នងការដ្ឋាននគរបាលខេត្តស្វាយរៀងបានឱ្យដឹងថា កាលពីថ្ងៃទី ២២ ខែវិច្ឆិកា ការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តស្វាយរៀងបានដាក់គោលដៅត្រួតពិនិត្យល្បឿនលើផ្លូវជាតិលេខ ១ ចន្លោះគីឡូម៉ែត្រ លេខ ១១៦-១១៧ ដោយបានពិនិត្យឃើញរថយន្តម៉ាកស៊ីណាពាក់ស្លាកលេខ 2BI-6754 បើកបរដោយឈ្មោះ លាស់ ពុធធា មុខរបរ អ្នកបើកតាក់ស៊ីបានប្រើប្រាស់ល្បឿន ៩៦ គីឡូម៉ែត្រ ក្នុង ១ ម៉ោង ជាហេតុនាំឱ្យសមត្ថកិច្ចបានធ្វើការឃាត់រថយន្ត ប៉ុន្តែអ្នកបើកបរ បើករថយន្តគេចវេះចូលផ្លូវលំ ទើបសមត្ថកិច្ចដេញតាមឃាត់រថយន្តនោះ ហើយនាំអ្នកបើកបរទៅកាន់ប៉ុស្តិ៍នគរបាលរដ្ឋបាល ប៉ុន្តែអ្នកបើកបរមិនព្រមធ្វើតាមសមត្ថកិច្ច ទើបបណ្ដាលឱ្យមានការប៉ះទង្គិចគ្នា។
ក្រោយមានការអប់រំណែនាំ អ្នកបើករថយន្តរូបនោះ បានយល់ព្រមទទួលការពិន័យតាមច្បាប់ ចំណែកឯសមត្ថកិច្ចដែលប្រើហិង្សានោះបានសូមទោស និងសម្រួលគ្នាបញ្ចប់រឿង។
លោក សុខ ត្រេន នាយរងប៉ុស្តិ៍នគរបាលស្វាយជ្រុំបានប្រាប់ ភ្នំពេញ ប៉ុស្តិ៍ កាលពីម្សិលមិញថា ជនរងគ្រោះឈ្មោះ លាស់ ពុធធា ជាអ្នកបើកបរតាក់ស៊ី រងរបួសបែកមាត់។
លោក សុខ ត្រេន ថ្លែងថា៖ «ពេលរថយន្តបើកបុកបារ៉ាស់ សមត្ថកិច្ចក៏លោតចេញដល់លោតចេញទៅ ធម្មតាមនុស្សដល់អ៊ីចឹងទៅក៏មានការខឹងសម្បា ចិត្តមិនដូចគ្នា ខ្វះការអត់ធ្មត់អ៊ីចឹងទៅដោយយោងតាមផ្លូវពិបាកផង អីផង ក៏គិតថា ជិះម៉ូតូដេញអាចទាន់ ក៏ដេញទៅ ដេញទៅហួសពីគោលដៅមិនដឹងយ៉ាងម៉េចស្រាប់តែឃើញត្រឡប់មកវិញមានឈាមមាត់ឈាមអ៊ីចឹងទៅអ្នកបើកបរហ្នឹង តែមើលទៅមិនជាធ្ងន់ធ្ងរទេ»។
យោងតាមមាត្រា ៥ នៃអនុក្រឹត្យស្តីពីការកំណត់ល្បឿនសម្រាប់យានជំនិះនៅទីប្រជុំជនល្បឿនអតិបរមាត្រូវកំណត់ត្រឹម ៤០ គីឡូម៉ែត្រ ក្នុង ១ ម៉ោង សម្រាប់យានយន្តគ្រប់ប្រភេទ។ នៅក្រៅទីប្រជុំជនល្បឿនអតិបរមាត្រូវកំណត់ត្រឹម ៨០ គីឡូម៉ែត្រ ក្នុង ១ ម៉ោង សម្រាប់រថយន្តធុនស្រាល និងរថយន្តដឹកអ្នកដំណើរ។
លោក ស៊ឹង សែនករុណា មន្ត្រីស៊ើបអង្កេតជាន់ខ្ពស់នៃសមាគមអាដហុកបានថ្លែងថា មន្ត្រីសមត្ថកិច្ចនគរបាលចរាចរណ៍មិនត្រូវប្រើអំពើហិង្សាវាយដំទៅលើប្រជាពលរដ្ឋទេ លុះត្រាតែជនល្មើសមានការតដៃ ដែលធ្វើឲ្យសមត្ថកិច្ចពិបាកទប់ទល់។
លោក សែនករុណា ថ្លែងថា៖ «ខ្ញុំយល់ថា សមត្ថកិច្ចអត់អាចប្រើវិធានការហិង្សាលើប្រជាពលរដ្ឋទេ ព្រោះការចាប់ខ្លួនអ្នកប្រព្រឹត្តខុសអ្វីមួយ ត្រូវធ្វើដោយសន្តិវិធីដោយកសាងសំណុំរឿងបញ្ជូនទៅតាមផ្លូវច្បាប់ បើសិនជាករណីល្មើសច្បាប់ព្រហ្មទណ្ឌកម្ពុជា ត្រូវតែឃាត់ខ្លួនសមត្ថកិច្ចរូបនោះបញ្ជូនទៅចាត់ការតាមនីតិវិធីច្បាប់ និងចាត់វិធានការដាក់ទោសទណ្ឌផ្នែករដ្ឋបាលហើយមិនត្រឹមតែប៉ុណ្ណឹង អាចទទួលទោសព្រហ្មទណ្ឌផងដែរបើសិនបង្ករបួសស្នាមធ្ងន់ធ្ងរ»៕
