.jpg)
ព្រះសីហនុៈ សមត្ថកិច្ចនៃអធិការដ្ឋាននគរបាលស្រុកព្រៃនប់បានបញ្ជូនជនសង្ស័យម្នាក់ទៅស្នងការដ្ឋាននគរបាលខេត្តព្រះសីហនុកាលពីម្សិលមិញ បន្ទាប់ពីចាប់ខ្លួនបានកាលពីថ្ងៃទី ២៥ មីនានៅប៉ុន្មានម៉ោងក្រោយប៉ងរំលោភសេពសន្ថវៈស្ត្រីម្នាក់វេលាទៀបភ្លឺថ្ងៃដដែលនៅភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ។
លោក ហួ យ៉ៃ អធិការនគរបាលស្រុកព្រៃនប់ប្រាប់ភ្នំពេញ-ប៉ុស្តិ៍ពីម្សិលមិញថា ជនសង្ស័យឈ្មោះ លួន វណ្ណៈ អាយុ ៣៤ ឆ្នាំជាកម្មករសំណង់ត្រូវសមត្ថកិច្ចរបស់លោកកសាងសំណុំរឿងបញ្ជូនទៅស្នងការដ្ឋាននគរបាលខេត្តព្រះសីហនុផ្នែកជំនាញនៃការិយាល័យប្រឆាំងការជួញដូរមនុស្សចាត់ការបន្ត។
លោកថ្លែងថា៖ «ពាក់ព័ន្ធរឿងរ៉ាវរបស់ជនសង្ស័យវាបានផុតដៃខ្ញុំហើយ»។
លោកស្រី ប៉ែន កញ្ញា ស្នងការរងទទួលផែនប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តព្រះសីហនុពីម្សិលមិញមិនអាចទាក់ទងសុំអត្ថាធិប្បាយបានទេ។
លោក កុល ពិសិដ្ឋ នាយនគរបាលប៉ុស្តិ៍ឃុំបិតត្រាំងបានឲ្យដឹងថា នៅកន្លែងកើតហេតុជាការដ្ឋានសំណង់ហើយស្ត្រីរងគ្រោះអាយុ ២៤ ឆ្នាំជាស្ត្រីមានប្តី ប៉ុន្តែប្តីរបស់នាងជាប់ធ្វើការងារផ្សេង ចំណែកស្ត្រីរងគ្រោះនាងបានមកធ្វើជាកម្មករសំណង់ជាច្រើនខែហើយដែរ ចំណែកឯជនសង្ស័យឈ្មោះ លួន វណ្ណៈ ទើបមកធ្វើការនៅក្នុងការដ្ឋានសំណង់នេះនៅថ្ងៃទី ២៤ មីនា ឆ្នាំ ២០២០ នេះពោលគឺធ្វើការបាន ១ ថ្ងៃទេ។
លោក ពិសិដ្ឋ ថ្លែងថាក្រោយឃាត់ខ្លួនជនសង្ស័យបានសារភាពថា រូបគេពិតជាបានចាប់ស្ត្រីរងគ្រោះរំលោភបានសម្រេចពិតប្រាកដមែនហើយសមត្ថកិច្ចរបស់លោកបានធ្វើកំណត់ហេតុឃាត់ខ្លួន និងបញ្ជូនជនសង្ស័យបន្តទៅអធិការដ្ឋាននគរបាលស្រុកព្រៃនប់នៅថ្ងៃដដែលនោះដើម្បីចាត់ការបន្តតាមច្បាប់។
លោកថា ជនសង្ស័យបានលបចូលទៅចាប់ស្ត្រីរងគ្រោះ និងគំរាមថា បើស្ត្រីរងគ្រោះស្រែកឲ្យផ្អើលដល់កម្មករសំណង់ផ្សេងទៀតរូបគេនឹងសម្លាប់ចោល ទើបស្ត្រីរងគ្រោះទ្រាំនៅស្ងៀម ព្រោះខ្លាចជនសង្ស័យសម្លាប់ចោល។ ក្រោយពីជនសង្ស័យចាប់ស្ត្រីរងគ្រោះរំលោភបានសម្រេចហើយនោះជនសង្ស័យបានគំរាមសម្លាប់នាងម្ដងទៀត ថាប្រសិនបើហ៊ានតែយករឿងនេះទៅប្រាប់កម្មករជាមួយគ្នា។ លុះព្រឹកឡើងស្ត្រីរងគ្រោះបាននិយាយប្រាប់កម្មករដូចគ្នាហើយក្រុមកម្មករបានទាក់ទងរកលេខទូរស័ព្ទនគរបាលប៉ុស្តិ៍ឃុំបិតត្រាំង និងរាយការណ៍ប្រាប់សមត្ថកិច្ចទៅឃាត់ខ្លួនជនសង្ស័យនៅថ្ងៃទី ២៥ ខែមីនាបានតែម្តង៕
