.jpg)
នគរបាលបង្ហាញខ្លួនជនសង្ស័យរឿងប្លន់ម៉ូតូ។ រូបថត នគរបាល
កំពង់ចាមៈ មន្ត្រីនគរបាលនៃស្នងការដ្ឋាននគរបាលខេត្តកំពង់ចាម ចាប់ខ្លួនមនុស្ស ១២ នាក់ និងវត្ថុតាង បញ្ជូនទៅសាលាដំបូងខេត្ត កាលពីថ្ងៃទី ២២ ខែឧសភា រឿងស្ទាក់វាយប្លន់យកម៉ូតូ នៅក្នុងភូមិសាស្រ្តស្រុកជើងព្រៃ និងស្រុកបាធាយ។
លោក ហេង វុទ្ធី ស្នងការរងទទួលផែនការងារនគរបាលព្រហ្មទណ្ឌប្រាប់ ភ្នំពេញ ប៉ុស្តិ៍ នៅថ្ងៃទី ២៣ ខែ ឧសភា ឆ្នាំ ២០២១ ឱ្យដឹងថា ជនសង្ស័យទាំង ១២ នាក់ ត្រូវបានសមត្ថកិច្ច សហការជាមួយកម្លាំងជំនាញរបស់ការិយាល័យនគរបាលព្រហ្មទណ្ឌកម្រិតធ្ងន់ នៃនាយកដ្ឋាននគរបាលព្រហ្មទណ្ឌ ក្រសួងមហាផ្ទៃនិងអយ្យការអមសាលាដំបូងខេត្តកំពង់ចាម ឃាត់ខ្លួនបានកាលពីថ្ងៃទី ១៩ ខែឧសភា។
លោក ហេង វុទ្ធី បន្តថា សមត្ថកិច្ចបានដកហូតវត្ថុតាងរួមមាន ម៉ូតូជាមធ្យោបាយជិះធ្វើសកម្មភាព ចំនួន ៤ គ្រឿង និងម៉ូតូរបស់ជនរងគ្រោះចំនួន ១ គ្រឿង។
លោក ហាក់ ហ៊ាន់ ព្រះរាជអាជ្ញារងនៃអយ្យការអមសាលាដំបូងខេត្តកំពង់ចាមឱ្យដឹងដែរថា អយ្យការសាលាដំបូង ខេត្តបានទទួលសំណុំរឿនេះ ហើយមានជនសង្ស័យចំនួន ១១ ប៉ុណ្ណោះ ខណៈម្នាក់ទៀត គឺជាអានិតិជន ត្រូវបានដោះលែងឱ្យមានសេរីភាពឡើងវិញ។
លោក ហាក់ ហ៊ាន បន្តថា បច្ចុប្បន្ននេះ ជនសង្ស័យទាំង ១១ នាក់ បានស្ថិតនៅក្នុងនីតិវិធីនៃការសាកសួររបស់តុលាការ។
លោក ហាក់ ហ៊ាន ថ្លែងថា៖ «ខ្ញុំសួរនាំគាត់សិន…ត្រូវសួរនាំម្នាក់ម្តង កុំឱ្យចោទប្រកាន់ខុស ធ្វើឱ្យគាត់ខូចអានាគត ព្រោះសុទ្ធតែនៅក្មេងៗណាស់»៕
