.jpg)
ជនជាប់ចោទ ក្រោយពេលសមត្ថកិច្ចចាប់ខ្លួនពីថ្ងៃទី ២១ ឧសភា ។ រូបថត ប៉ូលិស
ភ្នំពេញ៖ នគរបាលខណ្ឌឫស្សីកែវបានបញ្ជូនជនជាប់ចោទម្នាក់ទៅពន្ធនាគារព្រៃសនៅថ្ងៃទី ២៣ ឧសភានេះ បន្ទាប់ពីចាប់ខ្លួនពីថ្ងៃទី ២១ ឧសភា តាមដីការបស់សាលាដំបូងរាជធានីភ្នំពេញ ក្រោយពីជននេះគេចខ្លួនពីផ្តន្ទាទោសម្នាក់ៗអស់ ១ ជីវិត ពាក់ព័ន្ធចាក់សម្លាប់ស្ត្រីម្នាក់ កាលពីឆ្នាំ ២០១៤ ប្រព្រឹត្តនៅភូមិចុងថ្នល់ សង្កាត់ទឹកថ្លា ខណ្ឌសែខសុខ រាជធានីភ្នំពេញ ខណៈបក្ខពួកគេម្នាក់ទៀតកំពុងជាប់ពន្ធនាគារ ។
លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវប្រាប់នៅថ្ងៃនេះថា ជនជាប់ចោទដែលចាប់ខ្លួនតាមដីការបស់តុលាការនោះឈ្មោះ រិទ្ធ សាយ ហៅ ម៉ម ភេទប្រុស អាយុ ៣៤ ឆ្នាំ ស្នាក់នៅបន្ទប់ជួលភូមិ (ក) សង្កាត់ច្រាំងចំរេះ ២ ខណ្ឌឫស្សីកែវ រាជធានីភ្នំពេញ។ ជនម្នាក់នេះត្រូវបានសមត្ថកិច្ចលោកចាប់ខ្លួនកាលពីថ្ងៃទី ២២ ឧសភា នៅភូមិ-សង្កាត់កើតហេតុខាងលើ។
រីឯបក្ខពួកម្នាក់ទៀត ឈ្មោះ ឆៃ យក់លាភ ភេទប្រុស អាយុ ២៩ ឆ្នាំ មានកន្លែងកំណើតនៅ សង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ កំពុងអនុវត្តទោសក្នុងពន្ធនាគារព្រៃស។
លោកប្រាប់ថា៖ «ខ្ញុំចាប់គាត់តាមដីការបស់តុលាការ។ ហេតុដូច្នេះជានីតិវិធីជនដែលចាប់តាមដីកា គឺត្រូវតែបញ្ជូនទៅឃុំនៅពន្ធនាគារតែម្តង។ ព្រោះថាគាត់ត្រូវបានតុលាការផ្តន្ទាទោសរួចហើយ»។
បើតាមសាលក្រម ចុះកាលបរិច្ឆេទនៅថ្ងៃទី ៧ ខែ កក្កដា ឆ្នាំ ២០១៥ ដែលចុះហត្ថលេខាដោយលោកចៅក្រម ឆែ វីរៈ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញបានបង្ហាញថា ជនជាប់ចោទឈ្មោះ ឆៃ យក់លាភ ភេទប្រុស អាយុ ២៩ ឆ្នាំ និងជនជាប់ចោទដែលគេចខ្លួន ឈ្មោះ រិទ្ធ សាយ ហៅ ម៉ម ភេទប្រុស អាយុ ៣៤ ឆ្នាំ ត្រូវបានផ្តន្ទាទោសដាក់ពន្ធនាគារម្នាក់ៗអស់ ១ ជីវិត ពីបទ «ឃាតកម្មគិតទុកជាមុន» តាមបញ្ញត្តិមាត្រា ២០០ នៃក្រមព្រហ្មទណ្ឌ។
ប៉ុន្តែដោយមិនសុខចិត្តសាលក្រមនេះក្រុមជនជាប់ចោទបានពឹងមេធាវី ២ រូប គឺលោកស្រី យិន លីន និងលោកស្រីមេធាវី ច័ន្ទ រាសីភ័ក្ត ដើម្បីជួយដាក់បណ្ដឹងទាស់មកសាលាឧទ្ធរណ៍ ប៉ុន្តែមិនបានបន្តការពារក្ដីនេះទេ។
អង្គហេតុបង្ហាញបន្តថា សំណុំរឿងនេះត្រូវសាលាឧទ្ធរណ៍បើកសវនាការនៅថ្ងៃទី ១៩ ខែ មករា ឆ្នាំ ២០១៧ និងបានប្រកាសសាលដីកានៅថ្ងៃទី ៦ ខែ កុម្ភៈ ឆ្នាំ ២០១៧ ដោយតម្កល់ទៅម្នាក់ៗឱ្យជាប់ពន្ធនាគារ ១ ជីវិតដដែល។ ប៉ុន្តែសវនាការនោះមានតែជនជាប់ចោទ ឈ្មោះ ឆៃ យក់លោភ ម្នាក់ប៉ុណ្ណោះ ដែលត្រូវបានការពារសិទ្ធិដោយលោក មេធាវី ជូង ជូងី។ ចំណែកឈ្មោះ រិទ្ធ សាយ ពុំមានមេធាវីការពារសិទ្ធិឱ្យឡើយ។
តាមអង្គហេតុដដែលបង្ហាញទៀតថា បន្ទាប់មក ដោយនៅតែមិនសុខចិត្តជនជាប់ចោទ ឈ្មោះ ឆៃ យក់លាភ បានបន្តប្តឹងសារទុក្ខទៅតុលាការកំពូលតាមរយៈការពឹងមេធាវីលោក ជូង ជូងី។ លុះក្រោយពីតុលាការកំពូលបើកសវនាការជំនុំជម្រះ នៅថ្ងៃទី ២៨ ខែ តុលា ឆ្នាំ ២០១៨ ដោយត្រូវបានលោក ស្រី គិម សត្ថាវី ប្រធានក្រុមប្រឹក្សាជំនុំជម្រះតុលាការកំពូលប្រកាសសាលដីកាតម្កល់សាលដីកាសាលាឧទ្ធរណ៍ទុកជាបានការដដែល។
ដោយឡែកឈ្មោះ រិទ្ធ សាយ ត្រូវតុលាការបង្គាប់ឱ្យសមត្ថកិច្ចតាមចាប់ខ្លួនយកមកអនុវត្តទោសក្នុងពន្ធនាគារគិតចាប់ពីថ្ងៃប្រកាសសាលក្រមរបស់សាលាដំបូងរាជធានីភ្នំពេញកាលថ្ងៃទី ៧ ខែ កក្កដា ឆ្នាំ ២០១៥។
បើតាមកំណត់ហេតុសមត្ថកិច្ច កាលពីថ្ងៃទី ៤ សីហា ឆ្នាំ ២០១៤ ស្ត្រីរងគ្រោះឈ្មោះ ឆឹម សុខគីម ត្រូវក្រុមជនជាប់ចោទចាក់នឹងកាំបិតចុងស្រួចប្រមាណ ១៦ កន្លែង ស្លាប់នៅក្នុងបន្ទប់ជួលរបស់ខ្លួន ហើយពួកគេបានយកគ្រឿងអលង្ការ និងលុយខ្មែរមួយចំនួន។ បន្ទាប់ពីថ្ងៃកើតហេតុក្រុម ជនសង្ស័យបាននាំគ្នាគេចខ្លួនរហូតដល់ថ្ងៃទី ១៥ ធ្នូ ឆ្នាំ ២០១៤ ក៏ត្រូវបានសមត្ថកិច្ចស្រាវជ្រាវចាប់បានឈ្មោះ ឆៃ យក់លាភ នៅថ្ងៃទី ១៥ ធ្នូ ឆ្នាំ ២០១៤ នៅចំណុចភូមិកៅ ឃុំបែកចាន ស្រុកអង្គស្នួល ខេត្តកណ្តាល៕
