ភ្នំពេញៈ នគរបាលចរាចរណ៍បានចាប់ផ្ដើមផាកពិន័យឡើងវិញ បន្ទាប់ពីបើកយុទ្ធនាការ ១ ខែ ដើម្បីឃាត់អ្នកជិះម៉ូតូមិនពាក់មួកមិនផាកពិន័យប្រាក់ តែតម្រូវឱ្យទៅរកមួកសុវត្ថិភាពមកពាក់ទើបឱ្យបន្តដំណើរ ខណៈការអនុវត្តចាប់ពីថ្ងៃទី ១៩ ខែ កក្កដា ដល់ថ្ងៃទី ១៨ ខែ សីហា បានរកឃើញម៉ូតូដែលមានអ្នកជិះមិនពាក់មួកសុវត្ថិភាពចំនួន ១០៧ ៤១២ គ្រឿង ឬស្មើនឹង ៣៩ ភាគរយ ក្នុងចំណោមម៉ូតូចំនួន ២៧៣ ៧១៩ គ្រឿង ដែលត្រូវបានត្រួតពិនិត្យដោយនគរបាលចរាចរណ៍។
លោក ហ៊ឹម យ៉ាន អគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោកបានប្រាប់ភ្នំពេញប៉ុស្ដិ៍ថា នៅក្នុងយុទ្ធនាការ ១ ខែនេះ គឺបានធ្វើឡើងនៅទូទាំងប្រទេសដោយមន្ត្រីនគរបាលចរាចរណ៍បានត្រួតពិនិត្យអ្នកជិះម៉ូតូដែលមិនពាក់មួកសុវត្ថិភាពទាំងនៅតាមផ្លូវជាតិ និងនៅផ្លូវជនបទនានាតាមតំបន់ដាច់ស្រយាល។
លោកបន្តថាការអនុវត្តយុទ្ធនាការនេះបានរកឃើញថា សៀមរាបគឺខេត្តមានអត្រាអ្នកពាក់មួកសុវត្ថិភាពច្រើនជាងគេគឺមានរហូតដល់ ៩២ ភាគរយ បន្ទាប់មកគឺទីក្រុងភ្នំពេញមាន ៨៩ ភាគរយ ចំណែកខេត្តដែលមានអត្រាអ្នកជិះម៉ូតូពាក់មួកសុវត្ថិភាពទាបជាងគេគឺខេត្តមណ្ឌលគិរីដែលមានត្រឹម ៤០ ភាគរយ ខណៈខេត្តផ្សេងៗទៀតមានអត្រាអ្នកជិះម៉ូតូពាក់មួកសុវត្ថិភាពចាប់ពី ៥០ ភាគរយឡើងទៅ។
លោកថា៖ «ការធ្វើយុទ្ធនាការនេះយើងសង្កេតឃើញថា អ្នកពាក់មួកសុវត្ថិភាពនៅទូទាំងប្រទេសមានការកើនឡើងជាលំដាប់ដែរ ប៉ុន្តែវានៅកន្លែងខ្លះ ពិសេសនៅខេត្តឆ្ងាយៗតាមជនបទ គាត់នៅតែមានទម្លាប់មិនទាន់ពាក់មួក។
ឥឡូវនេះយើងក៏ពិនិត្យឃើញថាកំណើនម៉ូតូក៏វាកើនឡើងខ្ពស់ ហើយអ្នកជិះម៉ូតូក៏គ្រោះថ្នាក់ខ្ពស់ដែរ អ៊ីចឹងយើងចាប់ផ្ដើមកាត់បន្ថយគ្រោះថ្នាក់ពីបញ្ហាមួកមុនគេ បញ្ហាល្បឿន និងបញ្ហាស្រវឹងយើងនឹងខិតខំធ្វើជាបន្តបន្ទាប់ទៀត»។
បើតាមលោក ហ៊ឹម យ៉ាន ការអនុវត្តយុទ្ធនាការនេះក៏បានរកឃើញអ្នកជិះម៉ូតូស្លាប់ចំនួន ១១៤ នាក់ និងអ្នករងរបួស ៣៤៣ នាក់ ប៉ុន្តែតួលេខអ្នកស្លាប់នេះបានថយចុះចំនួន ៤ នាក់ និងអ្នករងរបួសថយចុះ ១៥ នាក់ បើប្រៀបធៀបនឹងរយៈពេល ១ ខែដូចគ្នា មុនពេលអនុវត្តយុទ្ធនាការដែលមានអ្នកស្លាប់ចំនួន ១១៨ នាក់ និងរងរបួសចំនួន ៣៥៨ នាក់។
អគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោករូបនេះបន្តថាចាប់ពីថ្ងៃទី ១៩ ខែ សីហា តទៅនគរបាលចរាចរណ៍ចាប់ផ្ដើមធ្វើការផាកពិន័យប្រាក់ឡើងវិញ ដោយអ្នកជិះម៉ូតូមិនពាក់មួកសុវត្ថិភាពនឹងពិន័យ ១ ម៉ឺន ៥ ពាន់រៀល ហើយនឹងតម្រូវទៅរកមួកមកពាក់ទើបអនុញ្ញាតឱ្យបន្តដំណើរ។
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានប្រកាសដាក់ឱ្យអនុវត្តយុទ្ធនាការ ១ ខែនេះកាលពីថ្ងៃទី ១៧ ខែ កក្កដា ខណៈទាំងមន្ត្រីរដ្ឋាភិបាល និងអ្នករិះគន់មួយចំនួនបានលើកឡើងថា ពលរដ្ឋកម្ពុជាភាគច្រើននាំគ្នាខ្លាចនគរបាលចរាចរណ៍ជាងគោរពច្បាប់ចរាចរណ៍។
លោក សុក សេរ៉ា មន្ត្រីនាំពាក្យសាលាខេត្តមណ្ឌលគិរីបានលើកឡើងថា ពលរដ្ឋក្នុងខេត្តលោកភាគច្រើនគឺមិនទាន់យល់ដឹងអំពីច្បាប់ចរាចរណ៍ ជាពិសេសគឺការពាក់មួកសុវត្ថិភាព ហើយដោយសារជីវភាពពលរដ្ឋមួយចំនួននៅខ្វះខាតផងនោះ ដូច្នេះក្នុងយុទ្ធនាការឃាត់មិនផាកពិន័យប្រាក់ និងតម្រូវឱ្យទៅរកមួកមកពាក់ទើបអនុញ្ញាតឱ្យបន្តដំណើរគឺពេលខ្លះអាជ្ញាធរមិនអាចចាប់បង្ខំពួកគាត់ទាល់តែទៅរកទិញមួកយកពាក់នោះទេគឺភាគច្រើនគ្រាន់តែអប់រំប៉ុណ្ណោះ។
លោកថា៖ «យុទ្ធនាការហ្នឹងយើងក៏អនុវត្តដែរ ប៉ុន្តែមន្ត្រីអនុវត្តយើងជួនកាលពិបាកណាស់ ពីព្រោះបងប្អូនជនជាតិយើងគាត់គ្មានអីផង ជួនកាលគាត់មានតែ ១ ម៉ឺន ២ ម៉ឺន (រៀល) ឡើងមកផ្សារទិញអំបិលនិងប៊ីចេង ទុកហូប ហើយយើងឃាត់គាត់បង្ខំឱ្យគាត់ទៅទិញមួកមកពាក់ទៀត គឺកាន់តែធ្វើឱ្យពួកគាត់អត់ថែមទៀត»។
ប៉ុន្តែលោក គង់ រតនៈ នាយកស្ដីទីនៃវិទ្យាស្ថានសុវត្ថិភាពចរាចរណ៍ផ្លូវគោកបានថ្លែងថា ការលើកឡើងរបស់អាជ្ញាធរថាមិនរឹតបន្ដឹងច្បាប់ ដោយសារហេតុផលកត្តាជីវភាពរបស់ពលរដ្ឋគ្រាន់តែជាលេសដោះសាប៉ុណ្ណោះ ព្រោះលោកមិនជឿថាពលរដ្ឋទាំងនោះគ្មានលុយទិញមួកសុវត្ថិភាពឡើយ ដោយសារតម្លៃទិញមួកគឺថោកជាងតម្លៃទិញម៉ូតូទៅទៀត។
លោកថា៖ «បើយើងគិតអំពីតម្លៃភាគរយនៃម៉ូតូដែលគាត់ទិញ និងមួកគឺខុសគ្នាឆ្ងាយបាត់ទៅហើយ ម៉ូតូចាស់បំផុតដែលអាចទិញមកប្រើគឺមានតម្លៃចាប់ពី ៣ រយទៅដល់ ៥ រយដុល្លារបាត់ទៅហើយ ហើយសម័យឥឡូវមានមីក្រូហិរញ្ញវត្ថុឱ្យខ្ចីគឺពួកគាត់បានទិញម៉ូតូថ្មីៗមកប្រើគឺមានច្រើនហើយ។ ប៉ុន្តែឥរិយាបថមិនពាក់មួកគឺមកពីទម្លាប់ ហើយសមត្ថកិច្ចហ្នឹងខ្ជិលនឹងរវីរវល់រឹតបន្តឹងច្បាប់ទៅទៀតធ្វើឱ្យពួកគាត់នៅតែបន្តទម្លាប់ហ្នឹង»៕