បន្ទាយមានជ័យៈ លោក សិទ្ធ ឡោះ ស្នងការរងនគរបាលខេត្តបន្ទាយមានជ័យកាលពីម្សិលមិញបានអះអាងថាកម្លាំងនគរបាលបានត្រៀមដើម្បីធ្វើការស៊ើបអង្កេតលើករណីអតីតសង្ឃដែលត្រូវបានចោទប្រកាន់ពាក់ព័ន្ធរឿងអាស្រូវខាងផ្លូវភេទជាមួយស្ត្រីដែលជាដៃគូនៅក្នុងវត្តភ្នំបាក់លើនាពេលថ្មីៗកន្លងមកនេះ។
លោក សិទ្ធ ឡោះ ស្នងការរងនគរបាលខេត្តបន្ទាយមានជ័យបានឲ្យដឹងថា វិធានការផ្លូវច្បាប់ត្រូវបានធ្វើឡើងក្រោយពីទទួលបានពាក្យបណ្តឹងពីស្ត្រីដែលជាដៃគូនៃអតីតសង្ឃ ស្រិល វណ្ណា។
លោក សិទ្ធ ឡោះ បានថ្លែងថា៖ «យើងទទួលបានពាក្យបណ្តឹងនេះហើយក្នុងពាក្យបណ្តឹងបានចោទថា (អតីតព្រះសង្ឃ) ស្រិល វណ្ណា បានចាប់រំលោភនារីជនរងគ្រោះ (ឈ្មោះ លីតា) ។ តែជំនាញរបស់យើងមិនចេះតែជឿ ឬក៏មិនចេះតែអនុវត្តច្បាប់តាមពាក្យបណ្តឹងដែរ ករណីនេះវាជារឿងហេតុកើតពីអតីតកាល ដូច្នេះយើងត្រូវការស៊ើបអង្កេតល្អិតល្អន់ចប់សព្វគ្រប់បានយើងបញ្ជូនសំណុំរឿងទៅឲ្យអយ្យការធ្វើការតាមច្បាប់បន្ត»។
លោកបានថ្លែងផងដែរថានៅក្នុងពាក្យបណ្តឹងរបស់ស្ត្រី លីតា ក៏បានទាមទារឲ្យមានសំណងជាទឹកប្រាក់ ៥ ម៉ឺនដុល្លារផងដែរ។
យោងតាមការផ្សាយបន្តផ្ទាល់ពីគេហទំព័រ Facebook របស់លោក ផែង វណ្ណៈ ពីផ្ទះរបស់បងប្អូនអន្ទិត វណ្ណា នៅក្រុងសិរីសោភ័ណដោយបានបង្ហាញមុខ និងសម្តីផ្ទាល់របស់អតីតសង្ឃ ស្រិល វណ្ណា នៅក្នុងវីដេអូនោះអតីតសង្ឃអង្គនេះបានបដិសេធរឿងការចាប់រំលោភលើស្ត្រីជាដៃគូ។
អតីតសង្ឃនេះត្រូវបានបង្ហោះតាមហ្វេសប៊ុកដោយបានបង្ហាញនូវរូបភាពបែបអាសអាភាសជាមួយដៃគូរបស់ខ្លួន៕