ភ្នំពេញៈ អ្នកគាំទ្រការវិលត្រឡប់របស់លោក សម រង្ស៊ី ១៣ នាក់ទៀត ត្រូវបានចាប់ខ្លួនកាលពីថ្ងៃអង្គារនៅក្នុងតំបន់ផ្ទះល្វែងនៃអតីតទីស្នាក់ការអតីតគណបក្សសង្គ្រោះជាតិក្នុងសង្កាត់ចាក់អង្រែលើពាក់ព័ន្ធពីបទចូលរួមជាមួយប្រធានស្តីទីអតីតគណបក្សសង្គ្រោះជាតិដែលជារឿយៗបានអំពាវនាវដល់ប្រជាពលរដ្ឋខ្មែរ និងកងកម្លាំងប្រដាប់អាវុធធ្វើចលនាផ្ដួលរំលំរាជរដ្ឋាភិបាលនៅពេលដែលមេដឹកនាំរូបនេះប្រកាសថានឹងមកដល់កម្ពុជានៅថ្ងៃទី ៩ ខែ វិច្ឆិកា ឆ្នាំ ២០១៩។ នេះបើយោងតាមស្នងការរាជធានីភ្នំពេញប្រាប់ភ្នំពេញប៉ុស្តិ៍កាលពីម្សិលមិញ។
លោក ស ថេត ស្នងការនគរបាលរាជធានីភ្នំពេញបានឲ្យដឹងថា សមត្ថកិច្ចបានឃាត់ខ្លួនសន្តិសុខយាមទីស្នាក់ការអតីតគណបក្សសង្គ្រោះជាតិចំនួន ១០ នាក់ និងបានរឹបអូសយកឯកសារមួយចំនួនទាក់ទងនឹងការទទួលផែនការពីលោក សម រង្ស៊ី ដើម្បីធ្វើការផ្តួលរំលំរដ្ឋាភិបាល។
លោក ស ថេត បានថ្លែងថា៖ «បន្ទាប់ពីសាកសួរហើយសមត្ថកិច្ចនឹងសម្រេចបញ្ជូនអ្នកគាំទ្រ ១០ នាក់ ដែលពាក់ព័ន្ធនឹងការចូលរួមផែនការផ្តួលរំលំរាជរដ្ឋាភិបាលទៅតុលាការយ៉ាងយូរនៅថ្ងៃព្រហស្បតិ៍នេះ»។
លោក ស ថេត ថ្លែងថា៖ «ពួកវាបានរៀបចំផែនការច្បាស់លាស់ណាស់ យើងមានឯកសារ។ ពួកគេធ្វើការកៀរគរមនុស្សឲ្យចាំទទួលបទបញ្ជានេះ គឺជាកំហុសវាមិនមែនចូលមកដើម្បីតវ៉ា និងបោះឆ្នោតតាមលទ្ធិប្រជាធិបតេយ្យទេ។ វាប្រកាសក្តែងៗឲ្យដឹងជាច្រើនដង ជាហូរហែ ហើយការចោទប្រកាន់របស់តុលាការគេមានភ័ស្តុតាងគ្រប់គ្រាន់ នៅពេលអ្នកឯងរៀបចំផែនការចាំទទួល។ អ្នកឯងរួមគំនិតក្បត់»។
អ្នកគាំទ្រលោក សម រង្ស៊ីទាំង ១០ នាក់នោះ ដែលបានចាប់ខ្លួនមានឈ្មោះ ១- លោក ទឹម សៀវ ២- លោក ទឹម សុម៉េត ៣- លោក ថន ប៊ុនធឿ ៤- លោក អ៊ុក ចន្តា ៥- លោក ស្រង់ ៦- លោក ជួន សុផល ៧- លោក ហុក សំអាង ៨- លោក ណុក អូន ៩- លោក សី តារា និង ១០- លោក សូ តារា។
ពាក់ព័ន្ធជាមួយចលនាការគាំទ្រនៃការវិលត្រឡប់មកវិញរបស់លោក សម រង្ស៊ី នេះដែរ កម្លាំងអធិការដ្ឋាននគរបាលខណ្ឌទួលគោកបានឃាត់ខ្លួនមនុស្សម្នាក់ឈ្មោះ នៅ វិចិត្រ ភេទប្រុស អាយុ ៤៤ ឆ្នាំកាលពីរសៀលថ្ងែទី ៥ ខែវិច្ឆិកា ឆ្នាំ ២០១៩ នៅខណ្ឌទួលគោក រាជធានីភ្នំពេញ ពាក់ព័ន្ធនឹងការចូលរួមផែនការផ្តួលរំលំរាជរដ្ឋាភិបាល និងកម្លាំងអធិការដ្ឋាន នគរបាលខណ្ឌសែនសុខ និង កម្លាំងអធិការដ្ឋាននគរបាលខណ្ឌពោធិ៍សែនជ័យឃាត់ខ្លួនមនុស្ស ២ នាក់ទៀត ឈ្មោះ ស្រី ច័ន្ទតារា ភេទប្រុស អាយុជាង ៦០ ឆ្នាំ និងឈ្មោះ ហេង ច័ន្ទសុធី នៅព្រឹកថ្ងែទី ៦ ខែវិច្ឆិកា អ្នកទាំងនោះជាអ្នកធ្វើចលនាគាំទ្រអតីតគណបក្សសង្គ្រោះជាតិ។
លោក កូយ សៅ ចៅក្រមស៊ើបសួរសាលាដំបូងរាជធានីភ្នំពេញកាលពីថ្ងៃទី ១ ខែវិច្ឆិកា បានចេញដីកាឲ្យចាប់ខ្លួនមនុស្សឈ្មោះ ស្រី ច័ន្ទតារា ដោយត្រូវបានចោទប្រកាន់ពីបទរួមគំនិតក្បត់ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម» ដែលប្រព្រឹត្តនៅប្រទេសកម្ពុជា និងកន្លែងផ្សេងៗកាលអំឡុងឆ្នាំ ២០១៩។
ពាក់ព័ន្ធជាមួយចលនាអតីតគណបក្សប្រឆាំងនៅក្រៅប្រទេស ស្ថានទូតកម្ពុជានៅទីក្រុងហ្សាការតានៃប្រទេសឥណ្ឌូនេស៊ីបានចេញសេចក្ដីប្រកាសព័ត៌មានកាលពីម្សិលមិញបានឲ្យដឹងថាកាលពីថ្ងៃទី ៥ ខែ វិច្ឆិកា ឆ្នាំ ២០១៩ អាជ្ញាធរនៃប្រទេសម៉ាឡេស៊ីបានចាប់ឃុំខ្លួនសកម្មជន ២ នាក់ ដែលជាជនជាតិកម្ពុជាពេលដែលពួកគេបានកំពុងព្យាយាមឡើងយន្តហោះឆ្ពោះទៅកាន់ទីក្រុងបាងកក។
សេចក្ដីប្រកាសព័ត៌មានដដែលនេះបានឲ្យដឹងថា៖ «ពួកគេជាអ្នកគាំទ្រគណបក្សលោកស្រី មូរ សុខហួរ។ វាជាគ្រោះកាចដែលប្រទេស ឥណ្ឌូនេស៊ី ដែលជាសមាជិកស្និទ្ធស្នាលរបស់អាស៊ានអនុញ្ញាតឲ្យលោកស្រី មូរ សុខហួរ ចូលទៅកាន់ប្រទេស ឥណ្ឌូនេស៊ី ទោះបីលោកស្រីមានដីកាចាប់ខ្លួន ហើយធ្វើសកម្មភាពប្រឆាំងរាជរដ្ឋាភិបាលនៅក្នុងទីក្រុងហ្សាការតា»។
សេចក្ដីប្រកាសព័ត៌មានដដែលនេះបានឲ្យដឹងថា៖ «សាធារណរដ្ឋឥណ្ឌូនេស៊ី និងកម្ពុជាជាមិត្តស្និទ្ធស្នាលរយៈពេល ៦០ ឆ្នាំ ចុងក្រោយនេះហើយស្ថានទូតកម្ពុជានៅក្នុងទីក្រុងហ្សាការតាស្នើសុំឲ្យអាជ្ញាធរឥណ្ឌូនេស៊ីចាប់ខ្លួនលោកស្រី មូរ សុខហួរ ហើយបញ្ជូនមកកម្ពុជាជាបន្ទាន់»។
ទោះជាយ៉ាងណាក៏ដោយលោក ខៀវ សុភ័គ អ្នកនាំពាក្យក្រសួងមហាផ្ទៃបានស្វាគមន៍សមត្ថកិច្ចម៉ាឡេស៊ីដែលធ្វើការចាប់ និងឃុំខ្លួនអតីតសកម្មជន គណបក្សសង្គ្រោះជាតិ ២ នាក់ ហើយសង្ឃឹមថាប្រទេសនេះនឹងជួយសហការជាមួយប្រទេស កម្ពុជា ក្នុងការចាប់ខ្លួនមេខ្លោងមួយចំនួនរបស់អតីតគណបក្សប្រឆាំង។
លោក សុភ័គ ថ្លែងថា៖ «យើងអបអរសាទរបើសមត្ថកិច្ចម៉ាឡេស៊ីគេឃាត់ខ្លួនតាមដីការបស់យើង តែឥឡូវពួកគេមិនទាន់ដល់ដៃយើងនូវឡើយទេ»។
លោក អ៊ូ ច័ន្ទរ័ត្ន អតីតតំណាងរាស្ត្រ អតីតគណបក្សសង្គ្រោះជាតិចាត់ទុកការចាប់ខ្លួនអ្នកគាំទ្រដល់ការវិលត្រឡប់របស់លោក សម រង្ស៊ី ថាបានរំលោភសិទ្ធិសេរីភាពរបស់សកម្មជនទាំងនោះដោយសារតែសកម្មជនទាំងនោះមិនទាន់យល់ដឹងច្បាស់ពីផែនការជាក់ស្តែងរបស់លោក សម រង្ស៊ី បានធ្វើឲ្យស្ថានភាពនយោបាយនៅប្រទេសកម្ពុជាកាន់តែធ្ងន់ធ្ងរ។
លោកថ្លែងថា៖ «នៅតែបន្តចាប់ខ្លួនរហូតបែបនេះនឹងបង្កឲ្យមានការរំលោភសិទ្ធិមនុស្សប៉ះពាល់ដល់សិទ្ធិសេរីភាពក្នុងការបញ្ចេញមតិ និងធ្វើឲ្យប្រជាពលរដ្ឋមានការភ័យខ្លាចហើយការណ៍នេះវានឹងធ្វើឲ្យប៉ះពាល់ដល់ប្រទេសកម្ពុជា»។
ប៉ុន្តែលោក ខៀវ សុភ័គ បានការពារនូវចំណាត់ការរបស់កម្លាំងអាជ្ញាធរមានសមត្ថកិច្ចក្នុងការចាប់ខ្លួនអ្នកដែលពាក់ព័ន្ធនឹងការ «រួមគំនិតក្បត់» ទាក់ទិននឹងការប្រមូលកម្លាំងមហាជនមកចូលរួមធ្វើរដ្ឋប្រហារាជរដ្ឋាភិបាលស្របច្បាប់ថា ជាការអនុវត្តទៅតាមច្បាប់ ហើយនិងមិនបានរំលោភសិទ្ធិសេរីភាពនោះទេ។
គណបក្សសង្គ្រោះជាតិត្រូវបានតុលាការកំពូលរំលាយចោលកាលពីចុងឆ្នាំ ២០១៧៕