ព្រះសីហនុៈ សមត្ថកិច្ចនៃស្នងការដ្ឋាននគរបាលខេត្ត ព្រះសីហនុ បានកសាងសំណុំរឿងបញ្ជូនជនសង្ស័យ ២ នាក់ទៅសាលាដំបូងខេត្ត ព្រះសីហនុ នៅថ្ងៃទី ១០ មីនា បន្ទាប់ពីចាប់ខ្លួនបន្តបន្ទាប់ កាលពីថ្ងៃទី ៧ និងទី ៨ មីនា នៅភូមិ ៥ សង្កាត់លេខ ៤ ក្រុង-ខេត្ត ព្រះសីហនុ ពាក់ព័ន្ធជួញដូរគ្រឿងញៀន អ៊ិចស្តាស៊ី (MDMA) ទម្ងន់ ៥៦២,៧៨ ក្រាម។
លោក ជួន ណារិន្ទ ស្នងការនគរបាល ខេត្តព្រះសីហនុ បានប្រាប់ឲ្យដឹងកាលពីថ្ងៃម្សិលមិញថា ជនសង្ស័យ ទី១-ឈ្មោះ Tong longsheng ភេទប្រុស អាយុ ៣៤ ឆ្នាំ ជាជនជាតិចិន មុខរបរមិនពិតប្រាកដ មានស្រុកកំណើតនៅប្រទេស ចិន និងបច្ចុប្បន្នមកស្នាក់នៅក្នុង ភូមិ ៣ សង្កាត់ ៤ ក្រុង-ខេត្តព្រះសីហនុ ហើយក៏គ្មានលិខិតឆ្លងដែនដែរ។ ទី២- ឈ្មោះ Liao hao ភេទប្រុស អាយុ ២៧ ឆ្នាំ ជាជនជាតិចិន មុខរបរមិនពិតប្រាកដ មានស្រុកកំណើតនៅប្រទេសចិនដូចគ្នានិងមាន លំនៅបច្ចុប្បន្ន ភូមិ ៤ សង្កាត់ ៤ ក្រុង-ខេត្តព្រះសីហនុ។
លោកស្នងការ ថ្លែងថា៖ «បុរសទាំង ២ នាក់នោះសមត្ថកិច្ចរបស់យើងបានបញ្ចប់នីតិវិធីសាកសួរនិងកសាងសំណុំរឿងបញ្ជូនពួកគេទៅតុលាការនៅថ្ងៃនេះហើយ (ថ្ងៃអង្គារ)។ ពួកគេសង្ស័យថា ពាក់ព័ន្ធគ្រឿងញៀន»។
លោក ណារិន្ទ ប្រាប់ឲ្យដឹងទៀតថា ជុំវិញការចាប់ខ្លួនក្រុមជនសង្ស័យទាំង ២ នាក់នោះ គឺសមត្ថកិច្ចបានអនុវត្តទៅតាមជំនាញដោយមុនដំបូង សមត្ថកិច្ចបានធ្វើការស្រាវជ្រាវតាមដានទៅលើបុរស ជនជាតិចិនម្នាក់នោះ ដោយសារតែគាត់ ធ្វើសកម្មភាពគួរឲ្យសង្ស័យដោយកំណត់មុខសញ្ញាបានហើយសមត្ថកិច្ចលោកបានរាយការណ៍ជូនព្រះរាជអាជ្ញាអមសាលាដំបូងខេត្តព្រះសីហនុ ដើម្បីសុំការសម្របសម្រួលផ្នែកផ្លូវច្បាប់ ហើយក៏បានចាប់ខ្លួនជនសង្ស័យបានម្នាក់ឈ្មោះ Tong longsheng ដោយក្នុងប្រតិបត្តិការនោះសមត្ថកិច្ចបានចូលឆែកឆេរនៅក្នុងបន្ទប់ជនសង្ស័យហើយបានដកហូតកាំភ្លើងខ្លីចំនួន ២ ដើម និងគ្រាប់ចំនួន ៤ គ្រាប់។ បន្ទាប់មកសមត្ថកិច្ចជំនាញបង្ក្រាបគ្រឿងញៀនរបស់លោកបានច្បាប់ទៅចាប់ខ្លួនគ្នីគ្នារបស់គេម្នាក់ទៀតដែលម្នាក់ត្រូវសមត្ថកិច្ចចាប់-ខ្លួននៅក្នុងភូមិ ៣ សង្កាត់ ៤ ក្រុង-ខេត្ត ព្រះសីហនុ និងម្នាក់ទៀតនៅក្នុងភូមិ-សង្កាត់ ៤ ក្រុង-ខេត្ត ព្រះសីហនុ។
លោកស្នងការ ណារិន្ទ បានបញ្ជាក់ប្រាប់ឲ្យដឹងទៀតថា ចំពោះវត្ថុតាងដែលសមត្ថកិច្ចដកហូតបានរួមមាន៖ ថ្នាំញៀនប្រភេទ អ៊ិចស្តាស៊ី (MDMA) ទម្ងន់ ៥៦២,៧៨ ក្រាម, ទី២- បារីមូរកញ្ឆា (រុក្ខជាតិញៀន)ចំនួន ៦ ដើម និងមានទម្ងន់ ៤,៧៧ ក្រាម, ទី៣-ម្សៅសថ្លា សង្ស័យជាសារធាតុញៀន ទម្ងន់ ១៦,៤២ ក្រាម,ទី ៤-ម្សៅពណ៌ស្វាយ សង្ស័យជាសារធាតុញៀនទម្ងន់ ៥២,៧២ ក្រាមនិងទី ៥-ជញ្ជីងសម្រាប់ថ្លឹងគ្រឿងញៀន ចំនួន ២ គ្រឿងរួមទាំងសម្ភារសម្រាប់ប្រើប្រាស់ និងវេចខ្ចប់គ្រឿងញៀនមួយចំនួនទៀតផង៕