The Phnom Penh Post Search

Search form

Logo of Phnom Penh Post newspaper Phnom Penh Post - នគរបាល​ជាតិ​បង្កើត​ក្រុម​ថ្មី​មួយ​ទៀត ​ស៊ើបអង្កេត​​រឿង​សម្លាប់​ ជា វិជ្ជា




នគរបាល​ជាតិ​បង្កើត​ក្រុម​ថ្មី​មួយ​ទៀត ​ស៊ើបអង្កេត​​រឿង​សម្លាប់​ ជា វិជ្ជា

Content image - Phnom Penh Post
ពលរដ្ឋអុជធូបឲ្យលោកជា វិជ្ជា ដែល​ត្រូវ​បាន​បាញ់​សម្លាប់កាលពីឆ្នាំ ២០០៤។ រូបថត សុវណ្ណ ភីឡុង

នគរបាល​ជាតិ​បង្កើត​ក្រុម​ថ្មី​មួយ​ទៀត ​ស៊ើបអង្កេត​​រឿង​សម្លាប់​ ជា វិជ្ជា

ភ្នំពេញៈ នគរបាល​ជាតិ​បាន​បង្កើត​ក្រុម​ការងារ​ស៊ើបអង្កេត​ថ្មី​មួយ​​កាលពី​សប្តាហ៍​មុន​ដើម្បី​ពិនិត្យ​​ទៅ​លើ​ករណី​ឃាតកម្ម​លោក​ ជា វិជ្ជា ​និង​សហការី​ពីរ​នាក់​ដែល​មិន​ទាន់​ត្រូវ​បាន​ដោះស្រាយ​គឺ​រយៈពេល​ជិត​ពីរ​​ឆ្នាំ​បន្ទាប់ពី​​​​ក្រុម​ការងារ​ស្រដៀង​គ្នា​​មួយ​​មិន​បាន​បង្ហាញ​លទ្ធផល​អ្វី​ទាំងអស់។

អគ្គស្នងការ​នគរបាល​ជាតិ​លោក នេត សាវឿន ​កាលពី​ថ្ងៃ​ទី​​ ២៧ មីនា​បាន​បង្កើត​​ក្រុម​ការងារ​​ស្រាវជ្រាវ​ស៊ើបអង្កេត​​មួយ​ដែល​មាន​សមាជិក​ ១១ ​នាក់​ដើម្បី​ប្រមូល​ និង​​ស៊ើបអង្កេត​​ភ័ស្តុតាង ​និង​ឯកសារ​ទាក់ទង​នឹង​​ករណី​ឃាតកម្ម​​ទាំង​កណ្តាល​ថ្ងៃ​ទៅ​លើ​ប្រធាន​សហជីព​សេរី​កម្មករ​លោក ជា វិជ្ជា កាលពី​ខែ​មករា ឆ្នាំ​ ២០០៤ និង​មេដឹកនាំ​​សហជីព​​មូលដ្ឋាន​លោក រស់ វណ្ណារ៉េត ​កាលពី​ខែ​ឧសភា ឆ្នាំ​ ២០០៤ ​​និង​លោក ហ៊ី វុទ្ធី កាលពី​ខែ​កុម្ភៈ​ឆ្នាំ​ ២០០៧​។

សេចក្តី​សម្រេច​នេះ​​​បាន​សរសេរ​ថា​៖ «​​ក្រុម​ការងារ​ស្រាវជ្រាវ​ស៊ើបអង្កេត​មាន​ភារកិច្ច​​​​ស្រាវជ្រាវ​ស៊ើបអង្កេត​​ករណី​​ឃាតកម្ម​​លើ​មេដឹកនាំ​សហជីព ជា វិជ្ជា ហ៊ី វុទ្ធី និង​ រស់ វណ្ណារ៉េត ដើម្បី​រក​ឲ្យ​ឃើញ ​និង​ចាប់​ខ្លួន​​ឃាតករ អ្នក​សម​គំនិត ​និង​អ្នក​ពាក់ព័ន្ធ​ដទៃ​​ទៀត​​មក​ផ្តន្ទាទោស​តាម​ច្បាប់​​ ...»។

សេចក្តី​សម្រេច​​នេះ​ធ្វើ​ឡើង​ជិត​ពីរ​ឆ្នាំ​ចាប់​តាំងពី​លោក​នាយករដ្ឋមន្រ្តី ហ៊ុន សែន ​បាន​​សម្រេច​បង្កើត​​ក្រុម​ការងារ​​អន្តរ​ក្រសួង​ថ្នាក់​ជាតិ​ដើម្បី​ស៊ើបអង្កេត​​ករណី​ឃាតកម្ម​ទាំង​នេះ​​ ​ប៉ុន្តែ​មិន​ទាន់​រកឃើញ​លទ្ធផល​អ្វី​នៅ​ឡើយ​។

ករណី​សម្លាប់​លោក ជា វិជ្ជា ​ត្រូវ​បាន​លើក​ឡើង​នៅ​ក្នុង​របាយការណ៍​ផ្នែក​​​វិស័យ​ការងារ​របស់​អង្គការ​ពលកម្ម​អន្តរជាតិ​ដោយ​លើក​ឡើង​នូវ​ក្តីបារម្ភ​ខ្លាំង​​អំពី​​​ដំណើរការ​ដ៏យឺតយ៉ាវ​នៃ​ការ​ស៊ើបអង្កេត​នេះ​។

អ្នក​តស៊ូ​មតិ​​ក្នុង​វិស័យ​ការងារ​លោក មឿន តុលា បាន​ថ្លែង​ថា​ការ​ប្រកាស​នេះ​​អាច​គ្រាន់​តែ​ជា​ការ​បង្ហាញ​​ឲ្យ​ល្អ​មើល​​ដោយសារ​តែ​​គណៈប្រតិភូ​​ជាន់​ខ្ពស់​​​​របស់​អង្គការ​ពលកម្ម​អន្តរជាតិ​​បាន​មក​ទស្សនកិច្ច​​ប្រទេស​កម្ពុជា​កាលពី​សប្តាហ៍​មុន។

លោក​ តុលា ​បាន​សម្តែង​ក្តីបារម្ភ​ថា​ក្រុម​ការងារ​​ថ្មី​នេះ​អាច​នឹង​​ទទួល​បាន​​លទ្ធផល​តិចតួច​ដូច​គ្នា​ដែរ​។​ ​

លោក​បាន​ថ្លែង​ថា​៖ «​​វា​គ្មាន​ន័យ​។ ​ពី​មួយ​ឆ្នាំ​ទៅ​មួយ​ឆ្នាំ​​នៅ​តែ​បង្កើត​​គណៈកម្មាធិការ​ទាំង​នេះ​។ វា​គ្រាន់​តែ​ជា​ការ​បង្ហាញ​»។

លោក​ ជា វិជ្ជា​ត្រូវ​បាន​គេ​បាញ់​សម្លាប់​ចាប់​តាំងពី​ថ្ងៃ​ទី​ ២២ ​​ខែ​មករា​ឆ្នាំ​ ២០០៤ ​ដែល​រហូត​មក​ដល់​ពេល​នេះ​មាន​រយៈពេល​ប្រមាណ​ជា​ ១៣ ឆ្នាំ​មក​ហើយ​​តែ​សមត្ថកិច្ច​ពុំ​​ទាន់​បាន​ចាប់​ខ្លួន​ជន​ដៃដល់​​ ឬ​អ្នក​នៅ​ពី​ក្រោយ​ណា​ម្នាក់​យក​មក​ផ្តន្ទាទោស​នៅ​ឡើយ​ទេ​៕ PS

អត្ថបទគួរចាប់អារម្មណ៍