.jpg)
មន្ត្រីនគរបាលដែលទើបឆ្លងកាត់វគ្គសិក្សាពីថ្ងៃទី ១៣ តុលា។ រូបថត ប៉ូលិស
ភ្នំពេញៈ មន្ត្រីជំនាញជិត ២០០ នាក់ មកពីគ្រប់បណ្តារាជធានី-ខេត្តបានឆ្លងកាត់វគ្គបណ្ដុះបណ្តាលស្ដីពីកំណត់ត្រាទិន្នន័យបទល្មើសព្រហ្មទណ្ឌ ឬ (E-Crime 2020) ដែលអគ្គស្នងការដ្ឋាននគរបាលជាតិបានអះអាងថានឹងធ្វើឱ្យពួកគេកាន់តែមានសមត្ថភាពវិភាគបានហ្មត់ចត់នូវមុខសញ្ញានៃជនល្មើសជាពិសេសការងារស៊ើបអង្កេតឧក្រិដ្ឋវិទ្យា។
គេហទំព័ររបស់អគ្គស្នងការដ្ឋាននគរបាលជាតិបានឱ្យដឹងកាលពីម្សិលមិញថា វគ្គបណ្ដុះបណ្តាលនេះបានធ្វើឡើងកាលពីថ្ងៃទី ១៣ ខែតុលា ដែលមានសិក្ខាកាមចូលរួមចំនួន ១៩៣ នាក់ ជាមន្ត្រីជំនាញមកពីនាយកដ្ឋាននគរបាលព្រហ្មទណ្ឌនាយកដ្ឋានសរុបផែនការ និងផែនសេនាធិការ រួមទាំងផែននគរបាលព្រហ្មទណ្ឌនៃស្នងការដ្ឋាននគរបាលរាជធានី-ខេត្ត។
អគ្គស្នងការដ្ឋាននគរបាលជាតិបានឱ្យដឹងទៀតថា អត្ថប្រយោជន៍សំខាន់របស់ (E-Crime2020) នេះមាន ៣ ចំណុចសំខាន់ ទី ១- មានសមត្ថភាពផ្តល់ទិន្នន័យបម្រើឱ្យការវាយតម្លៃស្ថានការណ៍បទល្មើស។ ទី ២- មានសមត្ថភាពគ្រប់គ្រងបានហ្មត់ចត់នូវជនសង្ស័យមុខសញ្ញាដែលរត់គេចខ្លួន គ្រប់គ្រងដីកា និងត្រួតពិនិត្យតាមដានអនុវត្តដីកា និងទី ៣- ទាញយកទិន្នន័យពីប្រព័ន្ធនេះទៅបម្រើឱ្យការងារស៊ើបអង្កេតឧក្រិដ្ឋវិទ្យា។
គេហទំព័រដដែលបានបញ្ជាក់ថា៖ «ថ្វីដ្បិតតែវគ្គនេះមានរយៈពេលខ្លីក៏ពិតមែន ប៉ុន្តែគឺជាការបំពេញកាតព្វកិច្ចមួយ ដើម្បីលើកកម្ពស់សមត្ថភាពរបស់យើងស្របតាមសម័យបច្ចេកវិទ្យាទំនើប ដែលយើងអាចសម្រេចបានលទ្ធផលល្អប្រសើរ។
នេះបើផ្អែកលើការវាយតម្លៃរបស់គ្រូឧទ្ទេស ដោយវគ្គទី ១ ទទួលបាននិទ្ទេសល្អ ៦០ ភាគរយ និងមធ្យម ៤០ ភាគរយ រីឯលើកទី ២ បានលទ្ធផលល្អ ៧០ ភាគរយ និងមធ្យម ៣០ ភាគរយ»។
លោក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិបានថ្លែងពីថ្ងៃទី ១៣ តុលាថា ក្រុមការងារបច្ចេកទេសរបស់អគ្គស្នងការដ្ឋាននគរបាលជាតិបានអភិវឌ្ឍប្រព័ន្ធគ្រប់គ្រងទិន្នន័យបទល្មើសព្រហ្មទណ្ឌ ឬ (E-Crime 2020) នេះ រយៈពេលជាង ១ ឆ្នាំមកហើយ។
លោកបន្តថា ការរៀបចំចងក្រងជាមេរៀននេះ គឺដើម្បីចែករំលែកចំណេះដឹងដល់កម្លាំងនគរបាលជាតិ ហើយនេះក៏ជាមោទនភាពរបស់អគ្គស្នងការដ្ឋានគរបាលជាតិផងដែរ ដែលបានបង្កើតកម្មវិធីនេះដោយម្ចាស់ការខ្លួនឯង។
ជាមួយនេះដែរ លោក ឆាយ គឹមខឿន បានណែនាំឱ្យសិក្ខាកាមត្រូវយកចំណេះដឹងនេះទៅបន្តផ្សព្វផ្សាយប្រកបដោយការយកចិត្តទុកដាក់ខ្ពស់ និងត្រូវបង្កើតប្រព័ន្ធទំនាក់ទំនងងាយស្រួលទាក់ទងគ្នា។
លោកបានពន្យល់ថា៖ «ស្របពេលដែលបច្ចេកវិទ្យាទំនើប និងត្រូវមនុស្សនិយមប្រើប្រាស់ជាសកលនោះ ការងារស៊ើបអង្កេតឧក្រិដ្ឋវិទ្យាជាមូលដ្ឋានសំខាន់ក្នុងការវាយតម្លៃអំពីប្រភេទ អំពីចរិត អំពីសកម្មភាពនៃបទល្មើស ហើយក៏ជាមូលដ្ឋានក្នុងការកសាងវិធានការ និងយុទ្ធសាស្ត្រ ដើម្បីបង្ការទប់ស្កាត់បទល្មើស ព្រោះឧក្រិដ្ឋវិទ្យាក្នុងនោះពាក់ព័ន្ធជាមួយបច្ចេកទេសវិទ្យាពាក់ព័ន្ធជាមួយចិត្តវិទ្យា និងសង្គមវិទ្យាទៀតផង។ ទាំងអស់នេះផ្គុំគ្នាបង្កើតបានជាឧក្រិដ្ឋវិទ្យា ហើយទិន្នន័យមិនគ្រប់ជ្រុងជ្រោយ ឬទិន្នន័យខុសនឹងនាំឱ្យអ្នកវិភាគការងារឧក្រិដ្ឋវិទ្យាដាក់ចេញគោលការណ៍ខុស ដូច្នេះបានជាយើងរៀបចំឱ្យមានវគ្គនេះឡើង»។
លោក ឆាយ គឹមខឿន បានក្រើនរំឭកសិក្ខាកាមគួរប្រើប្រព័ន្ធនេះឱ្យចំគោលដៅ ព្រោះប្រព័ន្ធនេះពូកែ ឬមិនពូកែ គឺអាស្រ័យលើមន្ត្រីដែលជាអ្នកបញ្ចូលទិន្នន័យឱ្យរក្សាទុក ដូច្នេះបើមន្ត្រីមិនបានបញ្ចូលទិន្នន័យបន្ថែមទេ គឺវានៅតែមិនពូកែដដែល។
លោកថា៖ «យើងទាំងអស់គ្នាត្រូវប្តេជ្ញាចិត្តខ្ពស់ និងត្រូវសន្យាថា នឹងមិនធ្វើឱ្យ(E-Crime- 2020) នេះក្លាយជាប្រអប់សំបុត្រដោយអត់ប្រយោជន៍នោះទេ យើងរួមគ្នាដើម្បីឱ្យកម្មវិធីនេះក្លាយទៅជាបណ្ណសារទិន្នន័យបទល្មើសជាលក្ខណ:ស្វ័យប្រវត្តិ និងអាចប្រើប្រាស់ជាផ្លូវការបាន»។
ប្រព័ន្ធកំណត់ត្រាទិន្នន័យបទល្មើសព្រហ្មទណ្ឌគឺជាប្រព័ន្ធមួយដែលអាចរក្សាទុកទិន្នន័យបទល្មើស និងស្វែងរកអត្តសញ្ញាណជនល្មើស ដែលធ្លាប់ជាប់ពន្ធនាគារ និងត្រូវបានដោះលែងពីពន្ធនាគារ ជាពិសេសការរក្សាទុកនូវទិន្នន័យរបស់ជនល្មើស ដែលធ្លាប់ប្រព្រឹត្តបទល្មើស និងជនល្មើសដែលមិនទាន់ចាប់ខ្លួនបាន។ នេះបើតាមគេហទំព័រអគ្គស្នងការដ្ឋាននគរបាលជាតិ។
តាមប្រភពដដែលបានឱ្យដឹងថា ប្រព័ន្ធនេះត្រូវបានកសាងឡើង ៤ ជំនាន់ ដោយរួមមានទិន្នន័យជំនាន់ទី១- សាកល្បងប្រើដំបូងនៅចុងឆ្នាំ ២០១០ និងប្រើប្រាស់ពេញលេញនៅឆ្នាំ ២០១១។ ទិន្នន័យទី២- កសាងឆ្នាំ ២០១២ និងដាក់ឱ្យប្រើនៅឆ្នាំ ២០១៣ ដោយអគ្គស្នងការដ្ឋាននគរបាលជាតិសហការជាមួយគម្រោងជំនួយ CCJAP និង NCDD នៃអគ្គនាយកដ្ឋានរដ្ឋបាលហៅកាត់ (គ.ជ.អ.ប)។ ទិន្នន័យជំនាន់ទី៣ កសាងឆ្នាំ ២០១៤ និងដាក់ឱ្យប្រើនៅថ្ងៃទី ១ មករា ឆ្នាំ ២០១៦ និងទិន្នន័យជំនាន់ទី៤ កសាង និងដាក់ឱ្យប្រើក្នុងឆ្នាំ ២០១៦៕
