ព្រះសីហនុ: លោក ជួន ណារិន្ទ ស្នងការនគរបាលខេត្តព្រះសីហនុបានថ្លែងកាលពីម្សិលមិញថា មន្ត្រីជំនាញនៃស្នងការដ្ឋាននគរបាលខេត្តបានកំពុងរៀបចំនីតិវិធីកោះហៅលោកឧកញ៉ា ភិរម្យ វិចិត្រដារ៉ា មកធ្វើការសាកសួរតាមបណ្ដឹងរបស់ស្ត្រីរងគ្រោះម្នាក់រឿងអំពើហិង្សា ដែលបានកើតឡើងកាលពីថ្ងៃទី ២០ ខែសីហា នៅក្នុងសង្កាត់លេខ ៤ ក្រុងព្រះសីហនុ។
លោក ណារិន្ទ ថ្លែងថា៖ «ខ្ញុំមិនទាន់ដឹងបុគ្គលណាខុស ឬបុគ្គលណាត្រូវទេ ដោយត្រូវរង់ចាំការកោះហៅភាគីពាក់ព័ន្ធមកសាកសួរសិន ព្រោះជំហានដំបូងនេះខ្ញុំបានទទួលពាក្យបណ្ដឹងពីជនរងគ្រោះ ដើម្បីធ្វើជារបាយការណ៍ក្នុងអង្គហេតុនេះ ប៉ុន្ដែក្នុងនាមជាមន្ត្រីនគរបាលយុត្តិធម៌ត្រូវតែធ្វើការស៊ើបអង្កេត និងស្រាវជ្រាវជុំវិញករណីទាំងនេះឲ្យបានហ្មត់ចត់។ ខ្ញុំមិនទាន់ដឹងឲ្យគាត់ចូលបំភ្លឺថ្ងៃណាទេ»។
លោកឧកញ៉ា ភិរម្យ វិចិត្រដារ៉ា អគ្គនាយកក្លិបពាណិជ្ជករកម្ពុជាជាម្ចាស់ក្រុមហ៊ុន WorldWide Dental Supply ជាម្ចាស់ក្រុមហ៊ុន One World Trading ជាម្ចាស់ហាងបញ្ចាំ សុវណ្ណវិចិត្រ ហ្វាយណែន និងជាប្រធានក្រុមហ៊ុន ECC Realty កាលពីម្សិលមិញមិនអាចទាក់ទងសុំការបញ្ជាក់ជុំវិញករណីនេះទេ។ ប៉ុន្ដែលោកបានថ្លែងក្នុងសន្និសីទសារព័ត៌មានកាលពីថ្ងៃទី ២៤ ខែសីហា ដោយព្រមាននឹងឆ្លើយតបតាមផ្លូវច្បាប់តាមរយៈមេធាវីរបស់លោក ដើម្បីរកយុត្តិធម៌ពីរឿងការចោទប្រកាន់ការប្រើអំពើហិង្សានោះ។
ក្នុងសន្និសីទនោះលោក វិចិត្រដារ៉ា ថ្លែងថា៖ «ខ្ញុំសូមច្រានចោលទាំងស្រុងចំពោះការចោទប្រកាន់ថា ខ្ញុំបានវាយដំលើស្ដ្រីម្នាក់នោះ បើចោទខ្ញុំបែបនេះ សូមបង្ហាញភ័ស្ដុតាងរបួសស្នាម ហើយខ្ញុំសុខចិត្តទទួលទោសចំពោះមុខច្បាប់ ព្រោះប្រទេសយើងមានច្បាប់ ហើយយើងក៏មិនអាចទៅប្រើហិង្សាអ្វីទៅលើគេដែរ។ បើសិនក្នុងករណីខ្ញុំបានប្រព្រឹត្តមែន គឺខ្ញុំរីករាយនឹងចូលខ្លួនទៅបំភ្លឺនៅតុលាការ ឬប៉ុស្ដិ៍ប៉ូលិសគឺធ្វើទៅតាមច្បាប់»។
ស្ត្រីម្នាក់ឈ្មោះ គឹម ចាន់សុធី ដែលបានអះអាងថា ជាជនរងគ្រោះបានឲ្យដឹងកាលពីម្សិលមិញថា បានចូលទៅបំភ្លឺនៅស្នងការដ្ឋាននគរបាលខេត្តព្រះសីហនុកាលពីថ្ងៃទី ២៤ ខែសីហា រួចរាល់ហើយ ប៉ុន្ដែមិនទាន់ដឹងពីចំណាត់ការរបស់សមត្ថកិច្ចបន្តទៀតទេ ហើយក៏មិនចង់វែកញែកហេតុផលក្រៅផ្លូវច្បាប់ជាមួយជនត្រូវចោទដែរ ដោយទុកលទ្ធភាពឲ្យមន្ត្រីនគរបាលយុត្តិធម៌ជាអ្នកស្រាវជ្រាវ និងស៊ើបអង្កេតតាមអង្គហេតុជាក់ស្ដែង។
ចាន់សុធី បានបញ្ជាក់ថា៖ «ស្នាមរបួសនៅច្រមុះខ្ញុំនៅមិនទាន់បាត់ឈឺនៅឡើយ ដោយត្រូវទៅតាមដានជាមួយពេទ្យជាប្រចាំ។ ចំពោះកិច្ចការបន្តទៀតគឺខ្ញុំមិនទាន់ដឹងថា ត្រូវធ្វើអ្វីទៀតទេ ព្រោះខ្ញុំកំពុងរង់ចាំចំណាត់ការពីសមត្ថកិច្ចសិន។ ខ្ញុំគិតថា ប្រហែលជាគាត់ដាល់ច្រើនជាង ព្រោះ ១ ដៃគាត់នេះធ្វើឲ្យខ្ញុំដួលសន្លប់ ហើយបែកឈាមច្រមុះ»។
ចាន់សុធី បានឲ្យដឹងទៀតថា អំពើហិង្សានោះកើតឡើងក្រោយពីមានជម្លោះពាក្យសម្ដីរឿងជំពាក់លុយ និងការជេរប្រមាថគ្នា៕