បុរសអ្នករត់ម៉ូតូឌុបម្នាក់ ត្រូវក្មេងស្រីម្នាក់កាប់ជាច្រើនកាំបិតប៉័ងតោបណ្តាលឲ្យរងរបួសជាទម្ងន់ ដោយសារបុរសរូបនោះ បានបបួលនាងទៅម៉ាស្សាឲ្យគាត់នៅផ្ទះសំណាក់ ហើយបានចាប់នាងរំលោភសេពសន្ថវៈរហូតដល់បានសម្រេចចំនួន ២ ដងនៅផ្ទះសំណាក់មួយ នៅភូមិ ជម្ពូវ័ន សង្កាត់ចោមចៅទី ៣ ខណ្ឌពោធិ៍សែនជ័យនៅថ្ងៃទី ១ ខែ មិថុនា ឆ្នាំ ២០២០។
លោក ថេង កុសល នាយនគរបាលប៉ុស្តិ៍សង្កាត់ចោមចៅទី៣ ឲ្យដឹងពីម្សិលមិញថា បុរសដែលត្រូវក្មេងស្រីកាប់ឲ្យរងរបួសនោះមាន ឈ្មោះ រស់ ផាត អាយុ ៥៨ ឆ្នាំ ជាអ្នករត់ម៉ូតូឌុប ស្នាក់នៅបន្ទប់ជួល ភូមិចម្ការឪឡឹក សង្កាត់កាកាប ២ ខណ្ឌពោធិ៍សែនជ័យ មានស្រុកកំណើត នៅភូមិដក់ពរ ឃុំបឹងត្រាញ់ខាងត្បូង ស្រុកត្រាំកក់ ខេត្តតាកែវ។ ចំណែកក្មេងស្រីឈ្មោះ ណ.ស.ន អាយុ ១៥ ឆ្នាំ រស់នៅ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។
លោករៀបរាប់ប្រាប់តាមសម្តីបុរសដែលចាប់រំលោភក្មេងនោះថា គាត់ជាអ្នករត់ម៉តូឌុប ហើយនៅមុនពេលកើតហេតុ វេលាម៉ោងជាង ៨ព្រឹក ថ្ងៃទី ១ ខែ មិថុនា ឆ្នាំ ២០២០ ខណៈពេលគាត់កំពុងជិះម៉ូតូរកម៉ូយដល់ចំណុចក្បែរវត្តតាំងកសាងខាងត្បូង គាត់បានឃើញក្មេងស្រីខាងលើ កំពុងឈរកាន់បង្វិចខោអាវមួយ។
លោកបន្តថា ពេលនោះបុរសរូបនោះ បានឈប់ម៉ូតូសួរទៅក្មេងស្រីម្នាក់នោះថា នាងឈររងចាំអីហើយចង់ទៅណាដែរគាត់នឹងឌុបទៅ។ ពេលនោះក្មេងស្រីឆ្លើយថា នាងមកពីខេត្តកំពង់ស្ពឺ ដើម្បីរកការងារធ្វើ ហើយមិនមានលុយជិះម៉ូតូទេ។ ភ្លាមៗនោះ បុរសរងគ្រោះប្រាប់ថា៖ «បើអត់លុយទៅម៉ាស្សាឲ្យខ្ញុំទៅ ខ្ញុំឲ្យ ២០ ដុល្លារ»។ បន្ទាប់ពីនិយាយត្រូវរ៉ូវគ្នាហើយ បុរសរូបនោះ បានឌុបនាងទៅផ្ទះសំណាក់យីហោ «រស្មីជម្ពូវ័ន» ស្ថិតក្នុង សង្កាត់ចោមចៅ។
លោក នាយនគរបាលប៉ុស្តិ៍បន្ថែមថា ពេលចូលក្នុងបន្ទប់ផ្ទះសំណាក់ បុរសរងគ្រោះបានបង្គាប់ឲ្យក្មេងស្រីម្នាក់នោះងូតទឹក ហើយនាងបានផ្លាស់ខោអាវនិងយកកន្សែងដែលដាក់សម្រាប់ឲ្យភ្ញៀវជូតខ្លួន នៅលើគ្រៃមកចោមពុង ហើយដើរចូលទៅក្នុងបន្ទប់ទឹក។ តែត្រូវបុរសរូបនោះ ចាប់នាងរំលោភសេពសន្ថវៈបានសម្រេចម្តងហើយចាប់នាងរំលោភបានម្តងទៀត។ នៅពេលដែលបុរសនោះចង់ចាប់រំលោភនាងម្តងទៀត ក៏ត្រូវក្មេងស្រីរូបនោះ ប្រាប់ឲ្យគាត់ដេកថ្កាប់មុខ ហើយនាងបានកាប់បុរសរូបនោះតែម្តង។
លោកបន្តថា៖ «ក្មេងស្រីប្រាប់ឲ្យបុរសនោះដេកថ្កាប់មុខហើយ នាងទាញកាំបិតប៉័ងតោពីក្នុងបង្វិចកាប់លើបុរសរងគ្រោះតែម្តង»។
លោក បញ្ជាក់ប្រាប់ថា នៅពេលត្រូវក្មេងស្រីកាប់ បុរសរូបនោះ បានស្រែកឲ្យគេជួយ ហើយបុគ្គលិកផ្ទះសំណាក់នាំគ្នាទៅមើល ក៏ឃើញបុរសម្នាក់នោះ ប្រឡាក់ឈាមជោកខ្លួន។
បន្ទាប់មកបុគ្គលិកផ្ទះសំណាក់បានរាយការណ៍ប្រាប់សមត្ថកិច្ចរបស់លោក។ សមត្ថកិច្ចបានចុះទៅឃាត់ខ្លួនក្មេងស្រីរូបនោះ រីឯបុរសរូបនោះត្រូវសមត្ថកិច្ចហៅរថយន្តសង្គ្រោះរបស់អង្គភាព ៧១១ កងពលតូចលេខ ៧០ ដឹកយកទៅសង្គ្រោះតែក្រោយមកលោកមិនដឹងថា បុរសនោះទៅព្យាបាលនៅមន្ទីរពេទ្យផ្សេងឬយ៉ាងណាទេ។
លោក ថេង កុសល ប្រាប់តាមសម្តីក្មេងស្រីថា នាងជាកូនកំព្រា ឪពុកម្តាយស្លាប់ចោលហើយនាងបានរស់នៅជាមួយសាច់ញាតិ និងមករាជធានីភ្នំពេញ ដើម្បីរកការងារធ្វើ។ នាងនិយាយថា នាងបានដាក់កាំបិតប៉័ងតោតាមខ្លួន គ្មានបំណងអាក្រក់អ្វីទេ។ ប៉ុន្តែដោយសារតែនាងខឹងបុរសម្នាក់នោះ ដែលឲ្យនាងទៅម៉ាស្សាឲ្យគាត់ ដោយសន្យាឲ្យប្រាក់ ២០ ដុល្លារ តែបែរជាចាប់នាងរំលោភទៅវិញ។
លោកបន្តតាមសម្តីក្មេងស្រីថា៖«ដោយសារគាត់ធ្វើបែបនេះលើខ្ញុំទើបខ្ញុំខឹងឲ្យគាត់ដេកថ្កាប់មុខហើយទាញកាំបិតកាប់ទៅ»។
បើតាមលោកកុសល បុរសរូបនោះ មានស្នាមមុតនៅត្រង់ភ្លៅទាំង២ចំនួន ២ កន្លែង ត្រង់ឆ្អឹងជំនីចំនួន ១ នៅលើក្បាលចំនួន ២ កាំបិត និងនៅត្រង់ស្មាទាំងសងខាងជាច្រើនកន្លែងទៀត។ ចំពោះរបួសមួយកន្លែងៗគឺមានជម្រៅជ្រៅៗដែរ។
លោកកុសលនិយាយថា ក្រោយកើតហេតុ សមត្ថកិច្ចបានឃាត់ខ្លួនក្មេងស្រីរូបនោះ នៅប៉ុស្តិ៍ជម្ពូវ័ន្ត ដើម្បីធ្វើកំណត់ហេតុ ហើយក្រោយមកបានបញ្ជូនក្មេងស្រីរូបនេះ ទៅអធិការដ្ឋាននគរបាលខណ្ឌពោធិសែនជ័យ។
ចំណែកបុរសដែលត្រូវក្មេងស្រីកាប់ បានដាក់ពាក្យបណ្តឹងមកលោក ប៉ុន្តែលោកមិនបានទទួលបញ្ជាពីថ្នាក់លើ ឲ្យតាមយាមបុរសរូបនោះដែលកំពុងដេកក្នុងមន្ទីរពេទ្យនោះទេ។
លោក ជាសុវណ្ណ អធិការរងទទទួលបន្ទុកផ្នែកព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យ បានថ្លែងនៅល្ងាចថ្ងៃទី ១ ខែមិថុនា នេះថា ករណីនេះសមត្ថកិច្ចរបស់លោក បានឃាត់ខ្លួនក្មេងស្រីនោះបណ្តោះអាសន្នហើយ ហើយបុរសត្រូវគេកាប់នោះ កំពុងព្យាបាលនៅមន្ទីរពេទ្យ។ «ព្រោះក្មេងស្រីនោះកាប់គាត់ស្ទើរស្លាប់ស្ទើរស់ទៅហើយ»។
លោកបញ្ជាក់ថា៖ «បុរសនោះ មិនដឹងងាប់ ឬរស់ផងទេ។ ប៉ុន្តែខ្ញុំបានធ្វើកំណត់ហេតុទៅព្រះរាជអាជ្ញាអស់ហើយពីដំណើររឿង ហើយច្បាប់ចាត់ការយ៉ាងម៉េចគឺសម្រេចលើច្បាប់»៕