ភ្នំពេញៈ កម្លាំងនគរបាលបង្ក្រាបបានសកម្មភាពលួចនិងឆក់ចំនួន ៥០ ករណី និងចាប់ជនល្មើសបាន ៦៤ នាក់ ក្នុងចំណោមសកម្មភាពលួច និងឆក់ដែលកើតមានឡើងចំនួន ៦៣ ករណី ក្នុងខែសីហានៅក្នុងរាជធានីភ្នំពេញ ខណៈ ១៣ ករណីទៀតកំពុងស្ថិតនៅក្នុងការស៊ើបអង្កេតតាមចាប់ខ្លួន។ ករណីចោរឆក់ និងលួចនេះមានការកើនឡើងចំនួន ៣០ ករណី បើប្រៀបធៀបទៅនឹងខែកក្កដា។
លោក ស៊ុយ សុគន្ធា អនុប្រធាននាយកដ្ឋាននគរបាលព្រហ្មទណ្ឌបានប្រាប់ភ្នំពេញ-ប៉ុស្ដិ៍ម្សិលមិញថា ថ្វីដ្បិតនៅក្នុងខែសីហាមានករណីលួច និងឆក់កើតឡើងច្រើនជាងខែកក្កដាក្ដី ប៉ុន្តែក្នុងខែសីហាអាជ្ញាធរបង្ក្រាបបានច្រើនជាងកាលពីខែកក្កដាដែលកាលពីខែកក្កដាមានករណីចោរលួច និងឆក់ ៣៣ លើក ហើយមាន ២២ ករណី និងជនល្មើស ៣២ នាក់ ត្រូវអាជ្ញាធរបង្ក្រាបបាន។
លោក សុគន្ធា បានថ្លែងថា៖ «សម្រាប់ខែសីហាកន្លងទៅនេះ មិនមានករណីប្លន់កើតឡើងទេ ហើយចំពោះករណីលួចហ្នឹង ដូចជាការគាស់ផ្ទះបានកើតឡើងច្រើនជាងករណីឆក់កាបូប និងទូរស័ព្ទរបស់ប្រជាពលរដ្ឋ និងជនបរទេសនៅតាមដងផ្លូវ»។
យោងតាមគេហទំព័ររបស់អគ្គស្នងការនគរបាលជាតិចុះផ្សាយថានៅថ្ងៃទី ១១ ម្សិលមិញ នាយកដ្ឋាននគរបាលព្រហ្មទណ្ឌបានបើកកិច្ចប្រជុំមួយស្ដីពីកិច្ចប្រជុំដកពិសោធការងារបង្ការ និងទប់ស្កាត់អំពើលួច និងឆក់ក្នុងរាជធានីភ្នំពេញ។
លោក អ៊ិន បូរ៉ា អគ្គស្នងការរងនគរបាលជាតិបានលើកឡើងនៅក្នុងកិច្ចប្រជុំនោះថា ថ្វីដ្បិតករណីលួចនិងឆក់កើនឡើងក្ដី ប៉ុន្តែវាជាមោទនភាពចំពោះកងកម្លាំងទាំងអស់ដែលបានសហការគ្នាយ៉ាងល្អហើយអាចបង្ក្រាបករណីលួច និងឆក់បានកាន់តែមានប្រសិទ្ធភាពជាងមុន។
លោក បូរ៉ា ថ្លែងថា៖ «ថ្នាក់ដឹកនាំ និងកម្លាំងនគរបាលពាក់ព័ន្ធទាំងអស់ត្រូវតែរួមគ្នាបង្ការ និងទប់ស្កាត់បន្ថែមទៀតសំដៅកាត់បន្ថយរាល់គ្រប់បទល្មើស ដែលអាចកើតមានឡើង ដើម្បីរក្សាសន្ដិសុខ សណ្ដាប់ធ្នាប់ និងសុវត្ថិភាពសង្គមជូនប្រជាពលរដ្ឋ និងភ្ញៀវទេសចរ»។
លោក ស ថេត ស្នងការនគរបាលរាជធានីភ្នំពេញបានលើកឡើងនៅថ្ងៃម្សិលមិញដែរថា ករណីលួច និងឆក់ គឺខែខ្លះកើនឡើងប៉ុន្តែខែខ្លះទៀតក៏មានការថយចុះដែរ។ លោកបានអះអាងផងដែរថា មូលហេតុកើនឡើងចោរលួចនិងឆក់នេះគឺដោយសារមួយចំនួនជាមុខសញ្ញាចាស់ធ្លាប់ជាប់ពន្ធនាគារ ប៉ុន្តែចេញមកវិញមិនកែប្រែមុខសញ្ញាសេសសល់មិនទាន់ចាប់ មុខសញ្ញាថ្មី និងកើតឡើងពីការប្រើប្រាស់គ្រឿងញៀនជាដើម។
លោក ថេត ថ្លែងថា៖ «ឧទាហរណ៍អ្នកធ្លាប់ជាប់ពន្ធនាគារ ១០ នាក់នៅពេលចេញមកវិញ វាមិនមែនកែប្រែទាំងអស់ទេ គឺមានអ្នកខ្លះកែ និងខ្លះមិនកែ។ (បទល្មើសចោរលួច និងឆក់) គឺកើតឡើងច្រើននៅខណ្ឌពោធិ៍សែនជ័យ និងទួលគោក ដោយសារទីតាំងនេះមានការប្រមូលផ្ដុំពីអ្នកមកពីតាមបណ្ដាខេត្តច្រើន និងមានសំណង់មិនរៀបរយច្រើន»។
លោក សន ជ័យ នាយកប្រតិបត្តិអង្គការសម្ព័នគណនេយ្យភាពសង្គមកម្ពុជាបានចាត់ទុកអំពើចោរលួច និងឆក់ថាជាបន្ទុកដ៏ធំមួយរបស់សង្គមដែលអាជ្ញាធរត្រូវខិតខំបង្ការ និងទប់ស្កាត់។
លោក ជ័យ ថ្លែងថា៖ «អ៊ីចឹង! សមត្ថកិច្ចគួរមានវិធានការសមស្របមួយដើម្បីជួយទៅដល់ជនរងគ្រោះតាមរយៈវិធីបង្ការ និងចាត់វិធានការ»។
កាលពីថ្ងៃម្សិលមិញ សាលាដំបូងរាជធានីភ្នំពេញបានសម្រេចចោទប្រកាន់យុវជនចំនួន ២ នាក់មានឈ្មោះ ហាក់ ម៉េងហ៊ាង អាយុ ១៧ និងឈ្មោះ ផៃ បូបញ្ញាបុត្រ អាយុ ១៧ ឆ្នាំ ពីបទលួចមានស្ថានទម្ងន់ទោសដែលបណ្ដាលឱ្យមរណភាពជនរងគ្រោះ និងបញ្ជូនទៅឃុំឃាំងក្នុងពន្ធនាគារព្រៃសដើម្បីរង់ចាំការកាត់ទោស។ នេះបើតាមការចុះផ្សាយដោយសារព័ត៌មានហ្វ្រេសញូវ។ យុវជនទាំងនេះបានធ្វើសកម្មភាពជិះម៉ូតូ ១ គ្រឿងទៅឆក់ទូរស័ព្ទពីជនជាតិចិនម្នាក់នៅសង្កាត់ទួលស្វាយព្រៃទី ១ ហើយបានបណ្ដាលឱ្យជនជាតិចិននោះធ្លាក់ពីលើកង់ ៣ បោកក្បាលស្លាប់៕