.jpg)
នគរបាលបង្ហាញគ្រឿងញៀន និងសារធាតុគីមីផ្សំ។ រូបថត នគរបាល
ភ្នំពេញៈ លោក មាស វិរិទ្ធ អ្នកនាំពាក្យ និងអគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានឲ្យដឹងកាលពីម្សិលមិញថា នគរបាលជំនាញប្រឆាំងគ្រឿងញៀនបានបង្ក្រាបបទល្មើសជួញដូរគ្រឿងញៀនឆ្លងដែន ១ ករណីកាលពីខែកក្កដា ដែលមានបណ្ដាញចាត់តាំងនៅក្នុងខណ្ឌកំបូល ជ្រោយចង្វារ និងដង្កោដោយរឹបអូសបានគ្រឿងញៀនប្រភេទមេតំហ្វេតាមីន និងសារធាតុគីមីផ្សំជាង ៣ តោន និងឃាត់ខ្លួនបុរសចិនម្នាក់ និងជនបរទេសម្នាក់ទៀតដែលមិនបានបញ្ជាក់អត្តសញ្ញាណ។ ជនសង្ស័យទាំង ២ នាក់ត្រូវបានជាប់ឃុំ និងជាប់ចោទពីបទជួញដូរគ្រឿងញៀនឆ្លងដែន។
លោក មាស វីរិទ្ធ បានថ្លែងប្រាប់ភ្នំពេញប៉ុស្តិ៍កាលពីម្សិលមិញថា ការបង្ក្រាបបទល្មើសគ្រឿងញៀនឆ្លងដែនអន្តរជាតិ ១ ករណីនេះ មានកិច្ចសហប្រតិបត្តិការជាមួយសមត្ថកិច្ចនៃនាយកដ្ឋានកណ្តាលសន្តិសុខក្រសួងមហាផ្ទៃ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងមន្ទីរប្រឆាំងគ្រឿងញៀន។
លោក វិរិទ្ធ ថ្លែងថា៖ «សមត្ថកិច្ចពាក់ព័ន្ធកំពុងបន្តស៊ើបអង្កេតទៀតព្រោះថាបទល្មើសមួយនេះមានអង្គការចាត់តាំងច្បាស់លាស់»។
លោកបានឲ្យដឹងទៀតថា ជនសង្ស័យជាបុរសបរទេស ២ នាក់ក្នុងនោះម្នាក់ជាជនជាតិចិន និងបុរសម្នាក់ទៀតសមត្ថកិច្ចមិនទាន់កំណត់អត្តសញ្ញាណបាននៅឡើយទេព្រោះថា ជនម្នាក់នោះបាត់លិខិតឆ្លងដែនដែលបញ្ហានេះសមត្ថកិច្ចកំពុងស្រាវជ្រាវរកអត្តសញ្ញាណរបស់គេ។
លោក អ៊ិន សុង នាយករងមន្ទីរប្រឆាំងគ្រឿងញៀនបានឲ្យដឹងកាលពីម្សិលមិញដែរថាចំពោះជនសង្ស័យទាំង ២ នាក់នោះ ត្រូវបានសាលាដំបូងរាជធានីភ្នំពេញចោទប្រកាន់ និងបញ្ជូនទៅពន្ធនាគារឃុំខ្លួនបណ្តោះអាសន្នកាលពីសប្តាហ៍មុន។ ចំណែកឯគ្រឿងញៀនដែលសមត្ថកិច្ចរឹបអូសបានពីក្រុមជនសង្ស័យមានចំនួនជិត ២០០ គីឡូក្រាមជាប្រភេទមេតំហ្វេតាមីន។
កាលពីម្សិលមិញភ្នំពេញ-ប៉ុស្តិ៍បានទូរស័ព្ទទំនាក់ទំនងទៅលោក ឌី វិជ្ជា ប្រធាននាយកដ្ឋានកណ្តាលសន្តិសុខក្រសួងមហាផ្ទៃដែរ តែលោកមិនលើកទូរស័ព្ទ។
ទោះយ៉ាងណាបើយោងតាមកំណត់ហេតុរបស់សមត្ថកិច្ចកម្ពុជាបង្ហាញថា មុនមានការបង្ក្រាបករណីជួញដូរគ្រឿងញៀនឆ្លងដែននេះគឺសមត្ថកិច្ចកម្ពុជាបានស្រាវជ្រាវដឹងថាមានករណីជួញដូរគ្រឿងញៀនឆ្លងដែនទ្រង់ទ្រាយធំ ហើយសមត្ថកិច្ចកម្ពុជាបានសុំសហការជាមួយអង្គភាពគយនៃប្រទេសចិនតាមរយៈអង្គការ UNODC ប្រចាំប្រទេសថៃ។
យោងតាមកំណត់ហេតុដដែលនេះបង្ហាញថានៅថ្ងៃទី ១៩ ខែកក្កដា ឆ្នាំ ២០២០ ខាងនាយកដ្ឋានកណ្តាលសន្តិសុខបានបើកប្រតិបត្តិការដោយសហការជាមួយអង្គភាពអន្តរាគមន៍នៃអគ្គស្នងការដ្ឋាននគរបាលជាតិ និងស្នងការដ្ឋាននគរបាលរាជធានីភ្នំពេញ និងដោយមានការសម្របសម្រួលផ្លូវច្បាប់ពីលោក ព្រះរាជអាជ្ញារង សាយ ណូរ៉ា នៃសាលាដំបូងរាជធានីភ្នំពេញផង។ ក្នុងប្រតិបត្តិការនោះសមត្ថកិច្ចចម្រុះឃាត់ខ្លួនបុរសជនបរទេសម្នាក់នៅខណ្ឌជ្រោយចង្វារជាមួយវត្ថុតាងគ្រឿងញៀនមេតំហ្វេតាមីនចំនួន ១៩៨ ដុំស្មើ ១៨៥ គីឡូក្រាមលាក់បង្កប់ក្នុងកេសការ៉ូឈើបន្លំជាគ្រឿងសង្ហារិម។
បន្ទាប់មកសមត្ថកិច្ចបានស្រាវជ្រាវឈានទៅឃាត់បុរសជនជាតិចិនបានម្នាក់ទៀតនៅខណ្ឌជ្រោយចង្វារដដែល និងរឹបអូសបានគ្រឿងញៀនប្រភេទមេតំហ្វេតាមីនចំនួន ៨,៤៥ គីឡូក្រាម រួមជាមួយសារធាតុគីមីផ្សំសម្រាប់កែច្នៃគ្រឿងញៀនចំនួន ២០,១៦ គីឡូក្រាម ព្រមទាំងឧបករណ៍សម្រាប់កែច្នៃមួយចំនួនទៀតក្នុងបន្ទប់ខុនដូរបស់ជនសង្ស័យ។
យោងតាមកំណត់ហេតុដដែលបង្ហាញទៀតថា បន្ទាប់ពីសមត្ថកិច្ចពាក់ព័ន្ធឃាត់ខ្លួនបុរសជនជាតិចិនបានម្នាក់ទៀតហើយក៏បន្តទៅឆែកឆេរទីតាំងលាក់ទុកសារធាតុគីមីសម្រាប់ផលិតគ្រឿងញៀន ១ កន្លែងនៅក្នុងខណ្ឌកំបូល ក្នុងនោះសមត្ថកិច្ចដកហូតបានសារធាតុគីមីចំនួន ១១ មុខ សរុបទាំងមុន និងក្រោយមានទម្ងន់ ៣ ១៤៦,១៩ គីឡូក្រាម និងបន្តចុះឆែកឆេរទីតាំងរក្សាទុកម៉ាស៊ីនសម្រាប់ផលិតជាថ្នាំញៀនគ្រាប់មួយកន្លែងទៀតស្ថិតក្នុងខណ្ឌដង្កោ ដោយរឹបអូសបានម៉ាស៊ីនអុកគ្រាប់ថ្នាំញៀនចំនួន ២ គ្រឿង និងពុម្ពគ្រាប់ថ្នាំញៀនចំនួន ១៤ សម្រាប់ដែលក្រុមជនសង្ស័យមានបំណងនាំគ្រឿងញៀនទាំងនោះចេញទៅកោះតៃវ៉ាន់។
លោក អ៊ិន សុង បានឲ្យដឹងផងដែរថា ពាក្យថាសារធាតុញៀនបានន័យថា ជាផលិតផលសម្រេចដែលអាចយកទៅប្រើប្រាស់បាន។ រីឯគីមីផ្សំគឺជាវត្ថុធាតុដើមដែលគេយកទៅផ្សំប៉ុន្តែមិនទាន់ចេញជាគ្រឿងញៀនទេដែលបានន័យថាជាវត្ថុធាតុដើម៕
វីដេអូ៖
