.jpg)
ជនសង្ស័យជនជាតិចិន ដែលត្រូវបានចាប់ខ្លួនបញ្ជូនទៅសាលាដំបូងខេត្តព្រះសីហនុ។ រូបថត នគរបាល
ព្រះសីហនុ៖ បុរសជនជាតិចិន ៣ នាក់ ត្រូវបានចាប់ខ្លួនរឿងអំពើប្លន់ប្រដាប់អាវុធកាលពីថ្ងៃទី ១៤ ខែឧសភា ក្រោយពីបានបាញ់តដៃជាមួយសមត្ថកិច្ចក្នុងអំឡុងពេលចុះបង្ក្រាប នឹងត្រូវបាននគរបាលបញ្ជូនទៅកាន់សាលាដំបូងខេត្តព្រះសីហនុ នៅថ្ងៃទី ១៦ ខែឧសភានេះ។
លោកឧត្តមសេនីយ៍ត្រី កុល ផាលី ស្នងការរងទទួលផែនការងារព្រហ្មទណ្ឌនៃស្នងការដ្ឋាននគរបាលខេត្តព្រះសីហនុ ប្រាប់ពីម្សិលមិញថា៖ «ជនទាំង ៣ នាក់នេះ ក្រៅពីពាក់ព័ន្ធអំពើប្លន់ក៏នៅជាប់ពាក់ព័ន្ធនឹងបទប្រើអាវុធខុសច្បាប់ផងដែរ ពួកគេនឹងត្រូវប្រឈមចំពោះមុខច្បាប់»។
លោកបានបញ្ជាក់ថា ជនសង្ស័យមានឈ្មោះ ZHANG DONG ភេទប្រុស អាយុ ៣៣ ឆ្នាំ ជាអ្នកកាន់កាំភ្លើង ឈ្មោះ YUE XIAO BING ភេទប្រុសអាយុ ៣៣ ឆ្នាំ និងឈ្មោះ YANG TIANYIN ភេទប្រុស អាយុ ២៦ ឆ្នាំ។
លោក ផាលី ថ្លែងថា៖ «ជនសង្ស័យទាំង ៣ នាក់នេះ បានប្រព្រឹត្តបទល្មើសប្លន់ជនជាតិចិនដូចគ្នា»។
លោក ផាលី បានឱ្យដឹងថា មុនប្រតិបត្តិការបង្ក្រាបក្រុមជនសង្ស័យនេះ គឺកម្លាំងសមត្ថកិច្ចទទួលបានសេចក្តីរាយការណ៍ពីប្រជាពលរដ្ឋពីមូលដ្ឋានកើតហេតុថា មានជនជាតិចិនមួយក្រុមមានគ្នា ៣ នាក់ បានធ្វើសកម្មភាពភ្ជង់កាំភ្លើងប្លន់បុរសជនជាតិចិននៅចំណុចក្រុមទី៧ ភូមិ ២ សង្កាត់លេខ ៣ ក្រុងព្រះសីហនុ ដោយមានកាំភ្លើងខ្លី ១ ដើម ភ្ជង់ និងមានផ្ទុះអាវុធចំនួន ១ គ្រាប់ផង។
កម្លាំងសមត្ថកិច្ចផ្នែកព្រហ្មទណ្ឌបានសហការជាមួយកម្លាំងអន្តរាគមន៍ពិសេស និងនគរបាលប៉ុស្តិ៍សង្កាត់លេខ ៣ ក្រុងព្រះសីហនុបានចុះដល់កន្លែងកើតហេតុ តែត្រូវក្រុមជនសង្ស័យគេចខ្លួនអស់។
ក្រោយពីគេចខ្លួន សមត្ថកិច្ចបានបន្តធ្វើការស្រាវជ្រាវរហូតដល់ចំណុចចំណោទសេតេត្រង់ផ្លូវលំតូចមួយស្ថិតនៅ ភូមិ ២ សង្កាត់ ៣ ក្រុង-ខេត្តព្រះសីហនុ ក៏ប្រទះឃើញជនសង្ស័យជាជនជាតិចិនទាំងនោះ។
នៅពេលនោះជនសង្ស័យម្នាក់បានបាញ់មកលើកម្លាំងសមត្ថកិច្ចចំនួន ២ គ្រាប់ តែមិនត្រូវ ហើយជនសង្ស័យបានរត់ចូលទៅពួនក្នុងផ្ទះ ដែលគេទុកចោលគ្មានមនុស្សនៅ។
សមត្ថកិច្ចបានប្រើពេលវេលារហូតម៉ោង ៧ យប់ នៅថ្ងៃទី ១៤ ឧសភា ទើបចាប់បានជនសង្ស័យបាន ដោយរឹបអូសបានកាំភ្លើងខ្លី ១ ដើម ម៉ាក K59 បង់កាំភ្លើង ១ មានគ្រាប់ ចំនួន ៤ គ្រាប់ និងសំបកគ្រាប់បាញ់រួចចំនួន ៥ គ្រាប់៕
