កំពង់ស្ពឺៈ នគរបាលបានបញ្ជូនបុរសម្នាក់អាយុ ៣០ ឆ្នាំ ទៅកាន់សាលាដំបូងខេត្តកំពង់ស្ពឺកាលពីម្សិលមិញ ក្រោយពីចាប់ខ្លួនបានជាមួយវត្ថុតាងគ្រឿងញៀន និងកាំភ្លើងកែច្នៃ និងកាំបិត ដាវជាច្រើនដើម។
លោក ម៉ាត់ ធុច ស្នងការរងទទួលផែនគ្រឿងញៀនបានឲ្យដឹងថា ជនសង្ស័យឈ្មោះ ទ្រី ឡិន ភេទប្រុស អាយុ ៣០ ឆ្នាំ មានលំនៅភូមិក្រាំងទំនប់ ឃុំចាន់សែន ស្រុកឧដុង្គ ខេត្ត កំពង់ស្ពឺដែលជនរូបនេះមិនត្រឹមតែជួញដូរគ្រឿងញៀនប្រភេទមេតំហ្វេតាមីន ប៉ុណ្ណោះទេតែថែមទាំងមានលាក់កាំភ្លើងកែច្នៃ និងកាំបិតទៀតផង។
លោក ធុច ថ្លែងថា៖ «ករណីនេះច្បាប់នឹងរកហេតុផលគាត់បន្តទៀត។ ជននោះសមត្ថកិច្ចជំនាញរបស់ខ្ញុំបានសាកសួរគាត់តាមនីតិវិធីចប់ហើយហើយរៀបចំសំណុំរឿងដើម្បីបញ្ជូនគាត់បន្តទៅតុលាការ»។
លោក ខឹម សាម៉ុន អធិការនគរបាលស្រុកឧដុង្គបានឲ្យដឹងថា មុនការឃាត់ខ្លួនជនសង្ស័យរូបនេះ គឺសមត្ថកិច្ចបានប្រើពេលស្រាវជ្រាវស៊ើបអង្កេតជាច្រើនថ្ងៃមកហើយព្រោះថា មានអ្នកភូមិឲ្យដំណឹងថាក្នុងភូមិ មានមុខសញ្ញាសង្ស័យពាក់ព័ន្ធនឹងបទល្មើស ប៉ុន្តែគេមិនដឹងថាជនសង្ស័យមានជាប់ពាក់ព័ន្ធនឹងបទល្មើសអ្វីប្រាកដទេ។
លុះវេលាម៉ោង ៣ និង ១០ នាទីរសៀលថ្ងៃទី ២៧ មីនា ជនសង្ស័យបានធ្វើសកម្មភាពបម្រុងជួញដូរចែកចាយគ្រឿងញៀនខុសច្បាប់នៅក្នុងមូលដ្ឋានភូមិក្រាំងទំនប់ ឃុំចាន់សែន ស្រុកឧដុង្គ ។ សមត្ថកិច្ចបានចុះដល់ទីតាំងប្រព្រឹត្តបទល្មើសហើយបានធ្វើការឃាត់ខ្លួនជនសង្ស័យតែម្តងហើយក្រោយឃាត់ខ្លួនសមត្ថកិច្ចបានធ្វើការឆែកឆេរខ្លួនឃើញមានម្សៅក្រាមពណ៌សថ្លាច្រកក្នុងថង់ចំនួន ៤ កូនថង់តូចដើម្បីយកទៅចែកចាយបន្ត។
លោកថា៖ «ពេលយើងឃាត់ខ្លួនគាត់ហើយយកគាត់ទៅសាកសួរនៅប៉ុស្តិ៍នគរបាលទើបលេចចេញពីការលាក់កាំបិតនេះ»។
លោកបានឲ្យដឹងថា ចំពោះវត្ថុតាងដែលរឹបអូសបានពីជនសង្ស័យរួមមាន៖ ថ្នាំញៀន ៤ កញ្ចប់ (៣ តូច និង មធ្យម ១), កាំភ្លើងកែច្នៃចំនួន ២ ដើម ដាវចំនួន ៧ ដើម និងកាំបិតផ្គាក់ចំនួន ១០ ដើមរួមនឹងឧបករណ៍ប្រើប្រាស់គ្រឿងញៀនមួយចំនួនទៀត។
ដោយឡែកជនសង្ស័យបានឆ្លើយសារភាពថាថ្នាំញៀនចំនួន ៤ កញ្ចប់នេះគាត់បានទិញពីបុរសម្នាក់តែគាត់មិនស្គាល់ឈ្មោះបុរសនោះទេ ហើយគាត់ទិញថ្នាំញៀននេះមកគឺដើម្បីបំណងរំលែកលក់ ប៉ុន្តែគាត់មិនទាន់ចាត់ចែងយកគ្រឿងញៀនទៅរំលែកលក់ផង ក៏ស្រាប់តែសមត្ថកិច្ចឃាត់ខ្លួនគាត់តែម្តង។
លោកថ្លែងថា ជនសង្ស័យបានប្រាប់ថាពាក់ព័ន្ធនឹងដាវ កាំបិតដែលគេបានលាក់ទុកនោះគឺគេមិនបានយកទៅធ្វើសកម្មភាពអ្វីទេប៉ុន្តែបើទោះជាជនសង្ស័យមិនបានសារភាពប្រាប់ត្រង់ក៏ដោយក៏សមត្ថកិច្ចជឿថា កាំបិតដាវទាំងនោះអាចជនសង្ស័យយកទៅធ្វើសកម្មភាពល្មើសផ្សេងៗ។ ព្រោះបើសិនជាទុកសម្រាប់ប្រើប្រាស់ក្នុងកិច្ចការប្រចាំថ្ងៃក៏មិនអាចមានចំនួនច្រើនបែបនេះដែរ។ សមត្ថកិច្ចនឹងបន្តស្រាវជ្រាវទៀតដើម្បីស្វែងរកបក្ខពួករបស់ជននេះ៕