.jpg)
សំណាកបូជនីយដ្ឋានសាសនាក្នុងវត្ត ដែលត្រូវបុរស ២ នាក់ វាយបំផ្លាញ។ រូបថត នគរបាល
កណ្ដាល: មន្ត្រីជំនាញនៃអធិការដ្ឋាននគរបាលស្រុកពញាឮពីម្សិលមិញបានបញ្ជូនជនសង្ស័យចំនួន ២ នាក់ ទៅសាលាដំបូងខេត្តកណ្ដាល ដើម្បីចាត់ចែងតាមនីតិវិធី បន្ទាប់ពីឃាត់ខ្លួនពីថ្ងៃទី ១៧ ខែវិច្ឆិកា ក្នុងអំឡុងពួកគេវាយបំផ្លាញរូបសំណាកបូជនីយដ្ឋានសាសនានៅលើភ្នំប្រសិទ្ធិ៍ក្នុងវត្តត្រ័យត្រឹង្ស ស្ថិតនៅភូមិតាពិជ ឃុំឈ្វាំង ស្រុកពញាឮ ខេត្តកណ្តាល។
លោក ដួង តេង អធិការនគរបាលស្រុកពញាឮបានថ្លែងពីម្សិលមិញថា សមត្ថកិច្ចជំនាញបានបញ្ជូនជនសង្ស័យចំនួន ២ នាក់ឈ្មោះ គង់ សំណាង និងឈ្មោះ ប៊ិន សុភា ទៅសាលាដំបូងខេត្តនៅថ្ងៃទី ១៨ ខែវិច្ឆិកា ដើម្បីឱ្យតុលាការចាត់ចែងតាមនីតិវិធីច្បាប់។ សមត្ថកិច្ចបានឃាត់ខ្លួនពួកគេពាក់ព័ន្ធការធ្វើឱ្យខូចខាតដោយចេតនានូវបូជនីយដ្ឋានសាសនា ឬបូជនីយដ្ឋានវត្ថុក្នុងព្រះពុទ្ធសាសនា នៅចំណុចលើភ្នំប្រសិទ្ធិ៍ ក្នុងបរិវេណវត្តត្រ័យត្រឹង្ស។
ជនសង្ស័យបានធ្វើឱ្យខូចខាតរូបសំណាកព្រះនាងគ្រប់លក្ខណ៍ ១ រូបសំណាកព្រះនាងពៅ ១ រូបសំណាកកុមារពេជ្រ ១ រូបសំណាកព្រះអង្គចេក១ ព្រះក្លស្សចំនួន ៣ ផើងផ្កា ១ ពាង ២ បង្គោលសូឡា ១ គ្រឿងសក្ការៈដូចជា បាយសីផ្កាភ្ញីមួយចំនួន រូបសំណាកព្រះនាងទេពប្រណម្យ ៤ រូបសំណាកក្បាលនាគ ២ អាស្រមអ្នកតា ១ និងរបារដែកទ្វារព្រះវិហារ។
លោក ដួង តេង បញ្ជាក់ថា ជនសង្ស័យឈ្មោះ គង់ សំណាង ជាអ្នកប្រព្រឹត្ត រីឯឈ្មោះ ប៊ិន សុភា ជាអ្នករត់តាក់ស៊ីដឹកជនសង្ស័យមកកន្លែងកើតហេតុ។ ចំពោះមូលហេតុនៃការវាយបំផ្លាញនេះ គឺមិនមែនដោយសារកំហឹងបន់ស្រន់អ្វីមួយមិនបានសម្រេចទេ គឺជនសង្ស័យមានជំងឺសរសៃប្រសាទ (បញ្ហាខួរក្បាល) ប៉ុន្ដែគ្មានលិខិតពេទ្យបញ្ជាក់ទេ ជំងឺគាត់រើឡើងម្ដង។
បុរសឈ្មោះ ប៊ិន សុភា មិនមានទោសកំហុសរហូតដល់ការឃុំខ្លួនទេ ដោយសារគាត់ជាអ្នករត់តាក់ស៊ី ហើយត្រូវជនសង្ស័យជួលឱ្យដឹកមករកកន្លែងស័ក្តិសិទ្ធិអុជធូបបន់ស្រន់ ប៉ុន្ដែមិននឹកស្មានថា ជនសង្ស័យទៅវាយបំផ្លាញរូបសំណាកទេ។
លោក សូ សារិន អ្នកនាំពាក្យសាលាដំបូងខេត្តកណ្ដាលពីម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបានទេ ដោយទូរស័ព្ទលោកគ្មានអ្នកទទួល។
លោក សូត្រ ស៊ីម មន្ត្រីនៃមន្ទីរវប្បធម៌ និងវិចិត្រសិល្បៈខេត្តកណ្ដាលដែលជាអ្នកអភិរក្សភ្នំប្រសិទ្ធិ៍បានថ្លែងពីម្សិលមិញថា លោកបានទូរស័ព្ទរាយការណ៍ទៅមន្ត្រីប៉ុស្តិ៍នគរបាលរដ្ឋបាលឃុំឈ្វាំង ដោយសារមានបុរស ២ នាក់បានជិះរថយន្តមកឈប់លើភ្នំប្រសិទ្ធិ៍ ហើយក្នុងនោះជនសង្ស័យម្នាក់ឈ្មោះ គង់ សំណាង បានរត់សំដៅទៅព្រះវិហាររួចធ្វើសកម្មភាពធាក់ទ្វារព្រះវិហារ និងវាយកម្ទេចវត្ថុបូជា៕
