សៀមរាបៈ នគរបាលប្រឆាំងការជួញដូរមនុស្សខេត្តសៀមរាបបានបញ្ជូនបុរសជាឪពុកចុងអាយុ ៣៤ ឆ្នាំម្នាក់ ទៅសាលាដំបូងខេត្តសៀមរាបកាលពីរសៀលថ្ងៃទី ១៤ ខែវិច្ឆិកា បន្ទាប់ពីចាប់ខ្លួនកាលពីថ្ងៃទី ១៣ វិច្ឆិកា ពាក់ព័ន្ធចាប់កូនស្រីចុងអាយុទើប ៥ ឆ្នាំ រំលោភសេពសន្ថវៈចំនួន ២ លើកនៅឃុំល្វាក្រាំង ស្រុកវ៉ារិនកាលពីអំឡុងខែ កញ្ញា ឆ្នាំ ២០១៩។
លោក ជា ហេង ប្រធានការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាល ខេត្តសៀមរាបបានឲ្យដឹងថា ជនសង្ស័យឈ្មោះ ព្រឿង សំ ត្រូវបានសមត្ថកិច្ចចាប់បញ្ជូនទៅសាលាដំបូងខេត្តកាលពីរសៀលថ្ងៃម្សិលមិញ បន្ទាប់ពីជនសង្ស័យបានឆ្លើយសារភាពពីសកម្មភាពប្រព្រឹត្តរបស់គេ។
លោកថ្លែងថា៖ «ករណីនេះ ជនសង្ស័យបានសារភាពនៅចំពោះមុខសមត្ថកិច្ចពីទង្វើប្រព្រឹត្តទៅលើកូនស្រីចុងរបស់គាត់មែន ហើយជននេះនឹងប្រឈមចំពោះមុខច្បាប់»។
លោក ប៊ូយ សុគន្ធ អធិការរងទទួលផែនព្រហ្មទណ្ឌនៃអធិការដ្ឋាននគរបាលស្រុកវ៉ារិនក៏បានឲ្យដឹងដែរថា កុមារីរងគ្រោះឈ្មោះ ស.ច. រ . អាយុ ៥ ឆ្នាំ ដែលឪពុកចុងចាប់រំលោភនោះត្រូវបានសមាគមនារី ស្រុកវ៉ារិន នាំទៅមន្ទីរពេទ្យបង្អែក ខេត្តសៀមរាបដើម្បីឲ្យគ្រូពេទ្យធ្វើកោសល្យវិច័យ។
លោកបញ្ជាក់ថា៖ «ដំបូងខាងមន្ទីរពេទ្យបង្អែកស្រុកវ៉ារិន ធ្វើកោសល្យវិច័យដែរ តែមិនច្បាស់។ ដូច្នេះក៏យកក្មេងទៅមន្ទីរពេទ្យខេត្តទៅ។ ប៉ុន្តែប្រដាប់ភេទក្មេងគ្រាន់តែដាច់រលាត់ស្បែកទេ»។
បើតាមលោក សុគន្ធ ម្តាយក្មេងស្រីរងគ្រោះជាស្ត្រីមេម៉ាយមានកូន ៣ នាក់ ហើយក្មេងរងគ្រោះជាកូនទី ៣ និងបានយកជនសង្ស័យជាប្តីបាន ៥ ឆ្នាំ ហើយ និងមានកូនមួយជាមួយគ្នា។ កាលពីអំឡុងខែកញ្ញាឆ្នាំ ២០១៩ ជនសង្ស័យបានលួងលោមក្មេងស្រីរងគ្រោះរួមភេទបានម្តងហើយមកដល់ថ្ងៃទី ១៣ ខែវិច្ឆិកា ឆ្នាំ ២០១៩ ជនសង្ស័យបានធ្វើសកម្មភាពរំលោភក្មេងរងគ្រោះម្តងទៀតនៅផ្ទះ តែចៃដន្យត្រូវបានយាយរបស់នាងបានឃើញសកម្មភាពជនសង្ស័យ ហើយក៏ប្តឹងសមត្ថកិច្ចឲ្យចាប់ខ្លួនតែម្តង។
លោកបញ្ជាក់ថា ក្រោយចាប់ខ្លួនជនសង្ស័យបានឆ្លើយសារភាពពីសកម្មភាពរបស់ខ្លួនថា គាត់រំលោភកូនស្រីចុងបាន ២ លើកពិតប្រាកដមែន។ ចំណែកឯក្មេងរងគ្រោះនាងឆ្លើយមិនបានច្បាស់ទេ ដោយសារនាងនៅក្មេងពេក តែចម្លើយរបស់នាងមានចំណុចខ្លះ ស៊ីចង្វាក់នឹងចម្លើយរបស់ជនសង្ស័យ។
លោកបានបញ្ជាក់ទៀតថា៖ «រឿងនេះជនសង្ស័យបានសារភាព តែប្រពន្ធរបស់គាត់ (ម្តាយក្មេងស្រីរងគ្រោះ) ថាប្តីគាត់មិនអាចធ្វើរឿងអាក្រក់បែបនេះលើកូនស្រីខ្លួនទេ។ តែទោះជាយ៉ាងណា ទុកជូនច្បាប់ជាអ្នកវិនិច្ឆ័យទៅ»៕