កណ្តាលៈ ជនសង្ស័យជាឪពុកបង្កើតដែលបានវាយកូនប្រុស ២ នាក់ បណ្តាលឱ្យឈាមខ្នង និងបែកក្បាល នៅភូមិឈើទាល២ ឃុំឈើទាល ស្រុកកៀនស្វាយ កាលពីថ្ងៃទី ១៦ តុលា ត្រូវបាននគរបាលចាប់បញ្ជូនទៅសាលាដំបូងខេត្តកណ្តាលកាលពីរសៀលម្សិលមិញ។
លោក រស់ សាវិន ប្រធានការិយាល័យជួញដូរមនុស្ស និងការពារអនីតិជនខេត្តកណ្តាលថ្លែងពីម្សិលមិញថា ជនសង្ស័យឈ្មោះ កែវ ភា អាយុ ៣៩ ឆ្នាំ ជាកសិករ រីឯកូនប្រុសរងគ្រោះម្នាក់ឈ្មោះ ភឿន សុភាព អាយុ ១៥ ឆ្នាំ និង ភឿន សុផាន់ អាយុ ៣ ឆ្នាំរស់នៅក្នុងភូមិ-ឃុំកើតហេតុខាងលើ។ ជនសង្ស័យវាយកូនបង្កឱ្យមានរបួសស្នាមធ្ងន់ធ្ងរដែលនេះ ជាការរំលោភលើសិទ្ធិរបស់ក្មេងដែលការពារដោយច្បាប់។
លោក ព្រំ សំណាង អធិការនគរបាលស្រុកកៀនស្វាយថ្លែងពីម្សិលមិញតាមសម្តីស្ត្រីជាប្រពន្ធជនសង្ស័យថា មូលហេតុដែលជនសង្ស័យខឹងវាយកូនៗ ដោយសារតែកូនរបស់គាត់មិនធ្វើតាមការបង្គាប់របស់គាត់ ដែលហាមមិនឱ្យដើរចោលផ្ទះ នៅពេលណាដែលគាត់មិននៅផ្ទះ។
កាលពីថ្ងៃទី ១៦ តុលា មុនពេលកើតហេតុជនសង្ស័យបានត្រឡប់មកផ្ទះស្រាប់តែវាយកូនប្រុសបងនឹងខ្សែភ្លើងបណ្តាលឱ្យត្រូវខ្នងចេញឈាមប្រមាណជា ២ រំពាត់ ប៉ុន្តែមិនធ្ងន់ធ្ងរទេ។ នៅពេលឃើញបងត្រូវឪពុកវាយ ក្មេងជាប្អូនបានស្ទុះទៅឱបបង តែឪពុកដែលកំពុងវាយកូនប្រុសបងនោះមិនបានបង្អង់ដៃទេ ដែលធ្វើឱ្យខ្សែភ្លើងនោះវាត់ត្រូវក្បាលកូនប្អូនចេញឈាម។
លោកបន្តទៀតថា បន្ទាប់ពីជនសង្ស័យវាយកូនមកស្ត្រីជាប្រពន្ធបានទៅប៉ុស្តិ៍នគរបាលឃុំឈើទាល បំណងឱ្យសមត្ថកិច្ចហៅប្តីមកអប់រំណែនាំកុំឱ្យប្រព្រឹត្តហិង្សាលើកូនៗទៀត។ ប្រពន្ធជនសង្ស័យថា ពេលនោះប្តីគាត់ស្រវឹងស្រា។ ពេលជនសង្ស័យកំពុងវាយកូននោះដែរ ប្អូនប្រុសជនសង្ស័យបានថតវីដេអូបង្ហោះតាមហ្វេសប៊ុក ហើយក៏មានការចែករំលែកបន្តគ្នាពី ១ ទៅ ១។
លោក សំណាង ថ្លែងថា៖ «តាមពិនិត្យទៅរបួសត្រូវក្មេងនោះហាក់មិនធ្ងន់ទេប៉ុន្តែពេលវ៉ៃភ្លាមៗថតបានថ្មីៗមានឃើញឈាមមើលទៅដូចជាធ្ងន់ធ្ងរដែរ។ ទើបមានបញ្ជាពីថ្នាក់ដឹកនាំឱ្យសមត្ថកិច្ចចាប់ខ្លួនឪពុកនោះទៅ»៕