.jpg)
ជនសង្ស័យ សុង វិសិដ្ឋ មន្ត្រីនគរបាលប៉ុស្តិ៍សង្កាត់បឹងសាឡាង។ រូបថត FN
ភ្នំពេញៈ មន្ត្រីនគរបាលជំនាញបានអះអាងកាលពីម្សិលមិញថា មន្ត្រីនគរបាលដែលបានបើកការបាញ់ប្រហារទៅលើពលរដ្ឋម្នាក់បណ្ដាលឲ្យរបួសកាលពីដើមសប្ដាហ៍នោះ ត្រូវបានរកឃើញថា ញៀនគ្រឿងញៀនរហូតបាត់បង់សតិដែលមិនទាន់អាចផ្ដល់ចម្លើយក្នុងការបន្តនីតិវិធីផ្លូវច្បាប់នៅឡើយទេ ខណៈដែលជនសង្ស័យកំពុងត្រូវបានឃុំខ្លួន។
លោក ហេង សុភា នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញបានប្រាប់ភ្នំពេញប៉ុស្តិ៍កាលពីម្សិលមិញថា នៅពេលនេះក្រុមមន្ត្រីជំនាញកំពុងដំណើរការនីតិវិធី សួរចម្លើយលើជនសង្ស័យ។
លោក សុភា ថ្លែងថា៖ «នៅពេលនេះមន្ត្រីជំនាញយើងនៅមិនទាន់បញ្ចប់នីតិវិធីនៃការស៊ើបសួរទៅលើជនសង្ស័យនៅឡើយទេ ដោយហេតុមន្ត្រីនគរបាលរូបនោះសេពគ្រឿងញៀនរហូតដល់បាត់ស្មារតីហើយបានប្រព្រឹត្តបទល្មើសបង្កឲ្យពលរដ្ឋម្នាក់រងរបួស ជនសង្ស័យនៅមិនទាន់អាចនិយាយស្ដីបានទេ ដូច្នេះមន្ត្រីនគរបាលជំនាញនៅមិនទាន់អាចយកចម្លើយពីជនសង្ស័យនោះបាននៅឡើយទេ»។
លោក សុភា ថ្លែងថា៖ «សង្ស័យអាចនឹងប្រឈមចំពោះការចោទប្រកាន់ពីបទមនុស្សឃាត»។
មន្ដ្រីនគរបាលម្នាក់ត្រូវបានកម្លាំងការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញចាប់ឃាត់ខ្លួនជនសង្ស័យភ្លាមៗ បន្ទាប់ពីគេបានបំផ្ទុះអាវុធចំនួន ៣ គ្រាប់កាលពីព្រឹកថ្ងៃចន្ទនៅចំណុចផ្លូវលេខ ២៧១Z សង្កាត់បឹងសាឡាង ខណ្ឌទួលគោក រាជធានីភ្នំពេញដោយបានបង្កឲ្យពលរដ្ឋម្នាក់រងរបួស។
លោក គឹម កូលីដូ នាយនគរបាលប៉ុស្តិ៍សង្កាត់បឹងសាឡាងបានប្រាប់ភ្នំពេញប៉ុស្តិ៍នៅរសៀលថ្ងៃចន្ទថា ជនសង្ស័យឈ្មោះ សុង វិសិដ្ឋ ជាមន្ត្រីនគរបាលប៉ុស្តិ៍សង្កាត់បឹងសាឡាងមានឋានន្តរស័ក្ដិ ថ្នាក់ព្រឹន្ទបាលឯក ស្នាក់នៅផ្ទះជួល ក្បែរកន្លែងកើតហេតុ។ ចំណែកបុរសរងគ្រោះឈ្មោះ សឹង សុផល អាយុ ៥២ ឆ្នាំ ជាអ្នករកស៊ីម៉ៅការសំណង់មានទីលំនៅក្បែរគ្នានឹងផ្ទះជនសង្ស័យ។
លោក កូលីដូ មិនបានប្រាប់ឲ្យដឹងអំពីមូលហេតុដែលនាំឲ្យមន្ត្រីនគរបាលរូបនោះផ្ទុះអាវុធឡើយ។
លោកថ្លែងថា៖ «ខ្ញុំមិនដឹងថាជនសង្ស័យ និងជនរងគ្រោះមានទំនាស់អ្វីនឹងគ្នា រហូតដល់មានការផ្ទុះអាវុធបែបនេះនោះទេ»។
លោកបានបន្តថា ក្រោយកើតហេតុជនសង្ស័យត្រូវបានកម្លាំងនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញចាប់ឃាត់ខ្លួនបញ្ជូនទៅកាន់ស្នងការដ្ឋាននគរបាលរាជធានីភ្នំពេញភ្លាមៗដើម្បីសួរចម្លើយ។ ចំណែកជនរងគ្រោះត្រូវបានសាច់ញាតិបញ្ជូនទៅកាន់មន្ទីរពេទ្យរុស្ស៊ី ដើម្បីព្យាបាលរបួស។ នៅកន្លែងកើតហេតុសមត្ថកិច្ចបានរកឃើញសម្បកគ្រាប់កាំភ្លើងអាកាចំនួន ៣ គ្រាប់។
កញ្ញា សឹង សុធី អាយុ ២៣ ឆ្នាំ ដែលជាកូនស្រីរបស់ជនរងគ្រោះបានឲ្យដឹងថា ជនសង្ស័យមុនពេលផ្ទុះអាវុធបានស្ពាយកាំភ្លើងអាកាមួយដើមដើរចូលទៅកាន់ច្រកផ្លូវលំមួយដោយស្រែកខ្លាំងៗថា «អាហ៊ាងអ្ហែងនៅណា?» ជនសង្ស័យបានស្រែករកឈ្មោះ ហ៊ាង នេះជាច្រើនដង ហើយបានអាម៉េកាំភ្លើងរួចបាញ់ឡើងលើ ១ គ្រាប់។
ដោយឃើញសភាពមិនស្រួល អ្នកភូមិដែលរស់នៅក្បែរកន្លែងកើតហេតុបាននាំគ្នាចូលទៅក្នុងផ្ទះហើយបិទទ្វារ ចំណែកឪពុករបស់នាង គឺ លោក សឹង សុផល បានជិះម៉ូតូចេញទៅធ្វើការងារក៏ត្រូវជនសង្ស័យផ្ទុះអាវុធចំនួន ២ គ្រាប់ទៀតបណ្ដាលឲ្យរងរបួសខ្នង។ កញ្ញា សុធី បានបន្តថា៖ «នៅពេលនេះប៉ារបស់ខ្ញុំកំពុងសម្រាកព្យាបាលនៅក្នុងបន្ទប់សង្គ្រោះបន្ទាន់នៃមន្ទីរពេទ្យមិត្តភាពកម្ពុជា-សូវៀត»។
លោក យី សុខសាន្ត មន្ត្រីជាន់ខ្ពស់ផ្នែកសិទ្ធិមនុស្សនៃសមាគមអាដហុកបានឲ្យដឹងកាលពីម្សិលមិញថា ទង្វើរបស់មន្ត្រីនគរបាលរូបនោះគឺជាបទល្មើសព្រហ្មទណ្ឌ ដូច្នេះសុំទទូចឲ្យមន្ត្រីអនុវត្តច្បាប់ចាត់វិធានការលើមន្ត្រីនគរបាលរូបនោះ ដើម្បីកុំឲ្យមន្ត្រីអនុវត្តច្បាប់ផ្សេងទៀតប្រព្រឹត្តតាមព្រោះបទល្មើសនេះពាក់ព័ន្ធការប៉ុនប៉ងមនុស្សឃាតដោយចេតនាដែលមិនត្រូវទទួលបានលើកលែងទោស។
លោកថា៖ «យើងមានការបារម្ភចំពោះមន្ត្រីអនុវត្តច្បាប់ ដែលប្រព្រឹត្តបទល្មើសសេពគ្រឿងញៀន ហើយបានបង្កការភ័យខ្លាចដល់ប្រជាពលរដ្ឋដោយការបាញ់បោះសេរីដែលជាអំពើល្មើសច្បាប់ និងរំលោភសិទ្ធិមនុស្សធ្ងន់ធ្ងរ»៕
