.jpg)
ជនសង្ស័យជាជនជាតិខ្មែរចំនួន ៧ នាក់ ដែលត្រូវបានឃាត់ខ្លួនកាលពីថ្ងៃទី ២៤ ខែសីហា។ រូបថត នគរបាល
ពោធិ៍សាត់ៈ នគរបាលក្រុងពោធិ៍សាត់កាលពីម្សិលមិញនៅកំពុងបន្ដសាកសួរ និងកសាងសំណុំរឿងជនសង្ស័យជាជនជាតិខ្មែរចំនួន ៧ នាក់ ដើម្បីបញ្ជូនទៅតុលាការករណីបើកហ្គេមអនឡាញ (Game Online) និងភ្នាល់បាល់ក្នុងទីតាំងផ្ទះជួល ១ កន្លែង ស្ថិតក្នុងភូមិបន្ទាយដីក្រោម សង្កាត់បន្ទាយដី ក្រុងពោធិ៍សាត់ ក្រោយពីត្រូវបានឃាត់ខ្លួនកាលពីថ្ងៃទី ២៤ ខែសីហា។
លោក យឹម សាងហៃ អធិការនគរបាលក្រុងពោធិ៍សាត់ថ្លែងប្រាប់ភ្នំពេញប៉ុស្ដិ៍កាលពីម្សិលមិញថា តាមបទបញ្ជាពីលោក ម៉ៅ ធនិន អភិបាលខេត្តពោធិ៍សាត់ និងមានការសម្របសម្រួលពីព្រះរាជអាជ្ញាអមសាលាដំបូងខេត្តបានដឹកនាំកម្លាំងបង្ក្រាបទីតាំង ហ្គេមអនឡាញ និងភ្នាល់បាល់នេះក្នុងនោះឃាត់ខ្លួនបានមនុស្សចំនួន ៧ នាក់ ប្រុស ៤ នាក់។
លោកអធិការក្រុងបានថ្លែងថា៖ «ពួកគាត់កំពុងឃុំខ្លួនបណ្ដោះអាសន្ននៅអធិការដ្ឋាននគរបាលក្រុងពោធិ៍សាត់។ ក្នុងចំណោម ៧ នាក់នេះ ពួកគាត់ជាពលរដ្ឋរស់នៅក្នុងខេត្ដពោធិ៍សាត់ ៥ នាក់ ២ នាក់ មកពីខេត្ដបាត់ដំបង។ ពេលនេះយើងកំពុងកសាងសំណុំរឿងដើម្បីបញ្ជូនបន្តទៅតុលាការអនុវត្ដនីតិវិធីច្បាប់បន្ត»។
បើតាមលោក សាងហៃ កាលពីមុនខេត្ដ-ក្រុងពោធិ៍សាត់ មិនដែលមានបទល្មើស ល្បែងហ្គេមអនឡាញបែបនេះទេ។ ករណីនេះគឺជាករណីថ្មី ហើយជនសង្ស័យទើបមកបើកដំណើរការបានជិត ២ ខែប៉ុណ្ណោះ។
លោកបន្តថា អាជីវកម្មហ្គេមអនឡាញនេះ គឺជាអាជីវកម្មគ្មានច្បាប់ និងមិនទាន់ដឹងថា អ្នកណាជាម្ចាស់នៅឡើយទេ។ ប៉ុន្ដែម្ចាស់ផ្ទះជួលឱ្យបើកហ្គេមអនឡាញនេះ មានឈ្មោះ សឿន សុខចំរើន ភេទប្រុស អាយុ ២៧ ឆ្នាំ រស់នៅភូមិ សង្កាត់ ខាងលើ។
បើយោងតាមរបាយការណ៍របស់នគរបាលក្រុងពោធិ៍សាត់បានឱ្យដឹងថា ជនសង្ស័យដែលឃាត់ខ្លួនបានទាំង ៧ នាក់នេះ រួមមាន ១- យិន រីណា ភេទស្រី អាយុ ២៨ ឆ្នាំ មុខរបរមេផ្ទះ រស់នៅភូមិពាលញែក ១ សង្កាត់ផ្ទះព្រៃ ក្រុងពោធិ៍សាត់។ ២- តែ ហៃរិទ្ធ ភេទប្រុស អាយុ ៦១ ឆ្នាំ មុខរបររត់ម៉ូតូឌុប ទីលំនៅភូមិពាលញែក ២ សង្កាត់ផ្ទះព្រៃ។ ៣- គីម សួរ ភេទប្រុស អាយុ ៣៦ ឆ្នាំ មុខរបរប្រកបអាជីវកម្មខ្លួនឯង ទីលំនៅភូមិពាលញែក ១ សង្កាត់ផ្ទះព្រៃ។ ៤- ឆាន ហួន ភេទស្រី អាយុ ១៧ ឆ្នាំ ជាតិខ្មែរ មុខរបរកម្មករ។ ទី៥- វ៉ា សុខពិសី ភេទស្រី អាយុ ១៥ ឆ្នាំ មុខរបរកម្មករ។ ៦- សឿន សុខចំរើន ភេទប្រុស អាយុ ២៧ ឆ្នាំ មុខរបរកម្មករ និងទី ៧ សួន សុខនិត ភេទប្រុស អាយុ ២៣ ឆ្នាំ មុខរបរជាកម្មករ អ្នកទាំង ៤ ស្នាក់នៅភូមិបន្ទាយដីក្រោម សង្កាត់បន្ទាយដី ក្រុងពោធិ៍សាត់។
របាយការណ៍នគរបាលបានបង្ហាញថា សម្ភារដកហូតមានដូចជាផ្ទាំងស្លាយអេឡិចត្រូនិកសម្រាប់ចាក់លេខ ចំនួន ៧ ផ្ទាំង ទូរទស្សន៍ចំនួន ៥ គ្រឿង។ កុំព្យូទ័រចំនួន ៥ គ្រឿង ។ ប្រាក់រៀលជាង ១ លាន ៣ សែនរៀល ប្រាក់ដុល្លារចំនួន ៧៥ ដុល្លារ។ ទូរស័ព្ទចំនួន ៨ គ្រឿង។ កាមេរ៉ាសុវត្ថិភាព ១ ឈុតចំនួន ៤ គ្រាប់។ ក្រៅពីនេះមានសៀវភៅទូទាត់លុយហ្គេមចំនួន ១ ក្បាល និងម៉ូតូចំនួន ៤ គ្រឿង៕
