.jpg)
ប៉ូលិសចរាចរណ៍ កំពុងសម្រួលចរាចរណ៍នៅតាមដងមហាវិថីព្រះនរោត្តម រាជធានីភ្នំេពញ នាពេលកន្លងមក។ ហុង មិនា
ភ្នំពេញៈ អាជ្ញាធររាជធានីភ្នំពេញ នឹងដាក់ពង្រាយកម្លាំងប្រមាណជិត ២០ គោលដៅនៅទូទាំងរាជធានី ដើម្បីត្រួតពិនិត្យអ្នកបើកម៉ូតូមិនពាក់មួកសុវត្ថិភាព រួមទាំងការដាក់ពង្រាយ ២ គោលដៅផ្សេងទៀត នៅពេលយប់ ដើម្បីត្រួតពិនិត្យរកសារធាតុញៀន ព្រមទាំងគ្រឿងស្រវឹង ចំពោះអ្នកបើកបររថយន្តធំ។
លោក ស ថេត ស្នងការដ្ឋាននគរបាលរាជធានីភ្នំពេញ បានប្រាប់ភ្នំពេញប៉ុស្តិ៍ពីម្សិលមិញ ក្រោយដឹកនាំកិច្ចប្រជុំមួយនៅស្នងការដ្ឋាននគរបាលរាជធានីភ្នំពេញ ដើម្បីដាក់ចេញនូវយុទ្ធនាការរឹតបន្ដឹងការគោរពច្បាប់ចរាចរណ៍ផ្លូវគោកថា ចាប់ពីថ្ងៃចន្ទនេះទៅ យុទ្ធនាការរឹតបន្តឹងច្បាប់ចរាចរណ៍ផ្លូវគោក នឹងត្រូវចាប់ផ្ដើមនៅតាមបណ្ដាគោលដៅនានាក្នុងរាជធានីភ្នំពេញ។
លោកបន្តថា ការពង្រាយកម្លាំងនេះ នឹងធ្វើឡើងចំនួន ១៦ គោលដៅ ទាំងយប់ទាំងថ្ងៃ ដោយមានកម្លាំងជំនាញ ចន្លោះពី ១៥ ទៅ ២០ នាក់ ដោយធ្វើការផ្លាស់ប្តូរវេនគ្នា ដើម្បីត្រួតពិនិត្យអ្នកបើកបរម៉ូតូ និងអ្នករួមដំណើរដែលមិនពាក់មួកសុវត្ថិភាព។
លោកបន្តថា៖ «មួយគោលដៅកម្លាំងមានចំនួន ១៥ នាក់ ហើយពេលយប់អាចមានគ្នាច្រើនជាងហ្នឹង។ ដាក់កម្លាំងនេះ គឺចាប់អ្នកមិនពាក់មួក បើពាក់មួកទៅ មានទៅអី។ នៅពេលអ្នកជិះម៉ូតូដែលមិនពាក់មួកសុវត្ថិភាព ត្រូវឃាត់ ហើយតម្រូវឲ្យរកមួកសុវត្ថិភាពមកពាក់ ទើបអនុញ្ញាតឲ្យបន្តដំណើរទៅមុខទៀត។ ប៉ុន្តែមិនមានការផាកពិន័យទេ ហើយបើមិនព្រមទៅយកមួកមកទេ យកម៉ូតូទៅទុកនៅខណ្ឌហើយ»។
លោក ស ថេត អះអាងថា ចំណែក ២ គោលដៅផ្សេងទៀត នឹងដាក់ពង្រាយនៅពេលយប់ចាប់ពីម៉ោង ៩ យប់ទៅ នៅលើផ្លូវវិមានឈ្នះៗ និងផ្លូវជាតិលេខ ៤ ដើម្បីត្រួតពិនិត្យសារធាតុ ញៀន និងជាតិស្រវឹង ចំពោះអ្នកបើកបរ និងព្រូរថយន្តធុនធំផងដែរ។ លោកបញ្ជាក់ថា នៅពេលពិនិត្យនោះ បើរកឃើញអ្នកបើកបររថយន្តធុនធំ ឬព្រូ មានសារធាតុញៀន គឺត្រូវឃាត់រថយន្តទុក ហើយស្នើសុំបញ្ជូនអ្នកបើកបរ ឬព្រូរថយន្ត យកទៅស្ដារនីតិសម្បទា នៅមណ្ឌលអប់រំ កែប្រែ ឬឲ្យអាណាព្យាបាលដើម្បីយកទៅបន្សាបសារធាតុញៀន។
លោក ស ខេង រដ្ឋមន្ត្រីក្រសួងមហាផ្ទៃ កាលពីថ្ងៃពុធសប្តាហ៍មុន ធ្លាប់លើកឡើងពីក្តីព្រួយបារម្ភជុំវិញគ្រោះថ្នាក់ចរាចរណ៍ ដែលគ្មានការថយចុះសោះ ដែលលោកជំរុញឲ្យមានវិធានការជាបន្ទាន់ដើម្បីទប់ស្កាត់។
លោកបញ្ជាក់ថា៖ «បើប្រៀបធៀបរយៈពេលដូចគ្នា ចំនួន ៦ ខែដើមឆ្នាំ ២០១៨ និង២០១៩ ជាលទ្ធផលមិនជាទីពេញចិត្តទេតួលេខគឺខុសគ្នាគួរឲ្យបារម្ភណាស់។ ពិសេសគឺអ្នកស្លាប់ និងអ្នករបួស។ អាចទុកថា នេះគឺគ្រោះអាសន្នមួយដែរ ជាគ្រោះថ្នាក់មួយ ដែលយើងត្រូវប្រកាសទាំងអស់គ្នា ដើម្បីយើងចាប់អាម្មណ៍ ដើម្បីយើងរួមគ្នាធ្វើ ដើម្បីដោះស្រាយបញ្ហានេះ ក្នុងគោលដៅកាត់បន្ថយគ្រោះថ្នាក់ចរាចរណ៍ទាំងស្លាប់ និងរបួស»។
មន្ត្រីនគរបាលកំពុងធ្វើចរាចរណ៍នៅលើដងផ្លូវនៅក្នុងរាជធានីភ្នំពេញ។ ហុង មិនា
ជាមួយនឹងការបារម្ភនេះ លោក ស ខេង បានថ្លែងថា កំណើនយានយន្តបានកើនឡើងជាង ៣០ ភាគរយ ជាពិសេសភាគច្រើននៃយានយន្តដែលកើនឡើង គឺនៅទីប្រជុំជន ដូចជាភ្នំពេញ ខេត្តព្រះសីហនុ និងសៀមរាបជាដើម ប៉ុន្តែចំពោះ ស្ថានភាពផ្លូវ គឺមិនមានកំណើនដូចការឡើងនៃយានយន្តនោះទេ ខណៈលោកអះអាងថា គ្រោះថ្នាក់ដោយសារម៉ូតូ មានដល់ទៅ ៥០ ភាគរយ ស្របពេលអ្នកស្លាប់ដោយសារគ្រោះថ្នាក់ម៉ូតូនេះ មានដល់ទៅ ៧០ ភាគរយ។
លោកបញ្ជាក់ថា៖ «អ៊ីចឹងនាំឲ្យយើងមានការបារម្ភទាក់ទងនឹងគ្រោះថ្នាក់ចរាចរណ៍នេះ ដែលវាប៉ះពាល់ដល់ធនធានមនុស្សរបស់យើងយ៉ាងសន្ធឹកសន្ធាប់ ហើយដែលយើងត្រូវចាត់វិធានការជាបន្ទាន់។ ការផ្សព្វផ្សាយអប់រំច្បាប់ដោយផ្ទាល់ផង តាមភូមិឃុំរោងចក្រ។ កម្មករធ្វើដំណើរតាមការដឹកជញ្ជូន ជិះរួម តែឥឡូវគាត់មានលុយទិញម៉ូតូ ជិះរថយន្តដឹកថយម៉ូតូកើន។ ប្រហែលអ៊ីចឹង»។
លោក គង់ រតនៈ នាយកស្ដីទីវិទ្យាស្ថានសុវត្ថិភាពចរាចរណ៍ផ្លូវគោកបានថ្លែងថា ចំពោះវិធានការនៅពេលនេះ អាជ្ញាធរមានចេតនាក្នុងការទប់ស្កាត់គ្រោះថ្នាក់ចរាចរណ៍ ដែលកំពុងតែកើនឡើង ប៉ុន្តែយុទ្ធនាការនេះ វាអាចមានប្រសិទ្ធភាពតែមួយរយៈពេលខ្លីប៉ុណ្ណោះ ហើយក៏មិនអាចចូលរួមជួយឲ្យការគោរពច្បាប់របស់ប្រជាពលរដ្ឋ មានប្រសិទ្ធភាពខ្ពស់ល្អដែរ។
លោកបញ្ជាក់ថា៖ «អ្វីដែលយើងចង់ឲ្យមានតម្លាភាព គឺយើងនៅតែចង់ឲ្យសមត្ថកិច្ច គួរតែអនុវត្តអ្វីដែលមាននៅក្នុងច្បាប់ ហើយអនុវត្តតាមច្បាប់តែម្ដងទៅ។ ជាជាងធ្វើឡើងតាមតែការលើកឡើងរបស់ប្រសាសន៍សម្តេចក្រឡាហោម តែម្ខាង ដោយអត់មានឆ្លងកាត់ការសិក្សាអ្វី ការអនុវត្តបែបនេះ មិនមានចែងក្នុងច្បាប់ចរាចរណ៍យើងទេ។ ព្រោះសម្រាប់ខ្ញុំ នៅពេលសមត្ថកិច្ចចាប់គាត់ រួចបង្ខំ ទោះចង់មិនចង់គាត់ត្រូវទៅរកមួកពីណាមកឲ្យបាន ប៉ុន្តែមួកនោះអាចពួកគាត់ខ្ចីពីគេ ដោយមិនមែនជារបស់ពួកគាត់នោះទេ»។
សម្រាប់លោក វិធានការដែលមានប្រសិទ្ធភាពបំផុតនោះ គឺការអនុវត្តច្បាប់ចរាចរណ៍ដោយមានតម្លាភាព និងការផ្សព្វផ្សាយ ពន្យល់ដោយធ្វើយ៉ាងណា ឲ្យប្រជាពលរដ្ឋទទួលស្គាល់ថា ការពាក់មួកសុវត្ថិភាព គឺដើម្បីការពារអាយុជីវិតរបស់ពួកគាត់ នោះទើបជាការប្រសើរ។
តាមរបាយការណ៍គណៈកម្មាធិការជាតិសុវត្ថិភាពចរាចរណ៍ផ្លូវគោក បានបង្ហាញថា រយៈពេល ៦ ខែ ឆ្នាំ ២០១៩ គ្រោះថ្នាក់ចរាចរណ៍នៅកម្ពុជា បានកើតឡើងចំនួន ២ ១៧១ លើក កើនឡើង ៥៣៨ លើក ស្មើនឹងប្រមាណ ៣៣ ភាគរយ បើធៀបនឹងរយៈពេលដូចគ្នាក្នុងឆ្នាំ ២០១៨។ ជាមួយនឹងការកើនឡើងនេះរបាយការណ៍ដដែល បានបញ្ជាក់ថា ចំពោះអ្នកស្លាប់ដោយគ្រោះថ្នាក់ចរាចរណ៍ក្នុងរយៈពេលនេះវិញ គឺមានចំនួន ១ ០៣៣ នាក់ និងរបួសចំនួន ៣ ២២៤ នាក់៕
