.jpg)
មន្ត្រីនគរបាលដែលត្រូវបានឃាត់ខ្លួនរឿងប្រើហិង្សាលើស្ត្រី។ រូប នគរបាល
ភ្នំពេញៈ នគរបាលរាជធានីភ្នំពេញកាលពីម្សិលមិញនៅកំពុងបន្តសាកសួរ លោក ហាក់ លី មន្ត្រីនគរបាលម្នាក់ បន្ទាប់ពីបានចាប់ឃាត់ខ្លួនកាលពីថ្ងៃទី ១៧ ខែកុម្ភៈ ពាក់ព័ន្ធនឹងការប្រើហិង្សា និងគំរាមបាញ់នារីម្នាក់នៅក្នុងហាងផឹកស៊ីមួយនៅខេត្តព្រៃវែង។
លោក ហាក់ លី នាយរងការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលរាជធានីភ្នំពេញត្រូវបានស្ត្រីម្នាក់ប្តឹងចោទពីបទប្រើហិង្សា និងគំរាមបាញ់រូបនាងនៅក្នុងហាងផឹកស៊ី «ជំនោរមករា» ស្ថិតនៅភូមិកំពង់ពពិល ឃុំកំពង់ពពិល ស្រុកពារាំង ខេត្តព្រៃវែង កាលពីថ្ងៃទី ១២ ខែ កុម្ភៈ ឆ្នាំ ២០២១ ដោយសារខឹងស្ត្រីរងគ្រោះ និងនារីក្នុងហាងផ្សេងទៀតមិនព្រមទៅដេកជាមួយខ្លួន។
លោក សាន សុខសីហា អ្នកនាំពាក្យស្នងការនគរបាលរាជធានីភ្នំពេញ ប្រាប់ ភ្នំពេញ ប៉ុស្តិ៍ កាលពីម្សិលមិញថា សមត្ថកិច្ចនគរបាលរាជធានីភ្នំពេញបានធ្វើការចាប់ឃាត់ខ្លួនលោក ហាក់ លី កាលពីថ្ងៃទី ១៧ ខែកុម្ភៈ តាមបញ្ជារបស់លោក នេត សាវឿន អគ្គស្នងការនគរបាលជាតិ ហើយនៅថ្ងៃទី ១៨ ខែកុម្ភៈ សមត្ថកិច្ចកំពុងបន្តសួរនាំ។
លោកថ្លែងថា៖ «អនុវត្តតាមបទបញ្ជារបស់ឯកឧត្តម អគ្គស្នងការនគរបាលជាតិក៏ដូចជា ឯកឧត្តមស្នងការយើងបានឃាត់ខ្លួនគាត់ យកមកស្នងការ ដើម្បីធ្វើការសួរនាំករណីហ្នឹង។ ឥឡូវនេះ យើងកំពុងធ្វើការសាកសួរដើម្បីបន្តតាមនីតិវិធី»។
បើតាមលោក សុខ សីហា សមត្ថកិច្ចក៏កំពុងតែរង់ចាំការសម្រេចរបស់តុលាការខេត្តព្រៃវែង ក៏ដូចជាថ្នាក់ដឹកនាំ ផងដែរ ថាតើត្រូវធ្វើយ៉ាងណាបន្តទៀត ចំពោះមន្ត្រីនគរបាលរូបនេះ។ លោកបញ្ជាក់ថា៖ «ព្រោះពាក្យបណ្តឹងដាក់នៅតុលាការខេត្តព្រៃវែង ហើយទីកន្លែងកើតហេតុនៅព្រៃវែង។ អ៊ីចឹងយើងរង់ចាំមើលការសម្រេចរបស់តុលាការយ៉ាងម៉េច អាហ្នឹងយើងនឹងធ្វើទៅតាមជាក់ស្តែង»។
លោក ចាន់ វណ្ណៈ ព្រះរាជអាជ្ញារង និងជាអ្នកនាំពាក្យសាលាដំបូងខេត្តព្រៃវែង បានឱ្យដឹងថាលោកទើបតែទទួលបានសំណុំរឿងពីសមត្ថកិច្ចកាលពីថ្ងៃទី ១៧ ខែកុម្ភៈ ហេតុនេះលោកកំពុងពិនិត្យមើលនីតិវិធីបន្ត មិនទាន់មានការសម្រេចយ៉ាងណានោះទេ។ លោកបញ្ជាក់ថា៖ «ខ្ញុំក៏ទើបតែទទួលបានការចាត់តាំងជាព្រះរាជអាជ្ញារងទទួលបន្ទុកលើសំណុំរឿងនេះដែរ អ៊ីចឹងឥឡូវនេះ ខ្ញុំកំពុងតែពិនិត្យមើលលំហូរនីតិវិធីបន្តទៀត»។
លោក ម៉េង ឆានន់ ជាកូនរបស់ស្ត្រីរងគ្រោះ បានសរសេរលើបណ្តាញសង្គមហ្វេសប៊ុកកាលពីថ្ងៃទី ១៣ ខែកុម្ភៈ ថា នៅថ្ងៃសុក្រ ទី ១២ ខែកុម្ភៈ លោក ហាក់ លី បានប្រើអំពើហិង្សាវាយទៅលើម្តាយរបស់លោក ឈ្មោះ ឡោ សារុំ ព្រមទាំងដកកាំភ្លើងគំរាមបាញ់ថែមទៀតផង។
លោកបញ្ជាក់ថា៖ «មានអំពើហិង្សាមកលើម្តាយរបស់ខ្ញុំបាទ ឈ្មោះ ឡោ សារុំ។ អ្នកបង្កហិង្សា ឈ្មោះ ហាក់ លី ហៅ ពៅ នៅក្នុងហ្វេសប៊ុក ហាក់ លី មានស្រុកកំណើតនៅភូមិ កំពង់ឫស្សី ស្រុកពោធិ៍រៀង ខេត្តព្រៃវែង។ មានគ្នា ៥ នាក់ តែបង្កហិង្សាតែ ១ នាក់ទេ ឈ្មោះ ហាក់ លី ហៅ ពៅ បានវ៉ៃម្តាយរបស់ខ្ញុំ ហើយអួតថា ខ្លួនជាប៉ូលិសក្រសួងមហាផ្ទៃ»។
លោក ឆានន់ បានបញ្ជាក់ ថា ក្រោយពីបានវាយទៅលើម្តាយរបស់លោកហើយ លោក ហាក់លី បានបើកទ្វារឡានដកកាំភ្លើងមកគំរាមរកបាញ់ថែមទៀត មូលហេតុដោយសារខឹងស្រីៗនៅក្នុងហាង ជំនោរមករា មិនព្រមទៅដេកជាមួយគាត់។ ហេតុនេះ លោកបង្ហោះហ្វេសប៊ុក «ទទូចសូមសម្តេច ក្រឡាហោម ស ខេង ជួយរកយុត្តិធម៌»៕
