.jpg)
នគរបាលជំនាញពិនិត្យគ្រឿងម៉ាស៊ីនដែលសង្ស័យថា ផលិត និងកែច្នៃគ្រឿងញៀនក្នុងខណ្ឌសែនសុខ រាជធានីភ្នំពេញ។ នគរបាល
ភ្នំពេញៈ ប្រភេទថ្នាំគ្រាប់ និងម្សៅសារធាតុមិនច្បាស់លាស់ជាច្រើនប្រភេទ ដែលសង្ស័យ ថាជាសារធាតុញៀនសរុបប្រមាណជាង ២០០ គីឡូក្រាមនិងម្សៅសារធាតុគីមីផ្សំ ៥៨៧ គីឡូក្រាម ត្រូវបានកម្លាំងមន្ទីរប្រឆាំងគ្រឿងញៀននៃក្រសួងមហាផ្ទៃ បង្ក្រាបចាប់និងរឹបអូសបានកាលពីរសៀលថ្ងៃអង្គារ នៅចំណុចផ្ទះលេខ ២៨៥ AE0 ផ្លូវលេខ ៣៧១ ក្រុម ៦ ភូមិ-សង្កាត់អូរបែកក្អម ខណ្ឌសែនសុខ រាជធានីភ្នំពេញ។
លោក ម៉ក់ ជីតូ អគ្គស្នងការរងនគរបាលជាតិទទួលបន្ទុកផ្នែកប្រឆាំងគ្រឿងញៀន បានប្រាប់ភ្នំពេញប៉ុស្តិ៍នៅព្រឹកថ្ងៃពុធថា ការចុះបង្ក្រាបទីតាំងសង្ស័យផលិតគ្រឿងញៀននៅទីតាំងនោះបានធ្វើឡើងបន្ទាប់ពីទទួលបានសេចក្ដីរាយការណ៍ភ្លាមៗពីម្ចាស់ផ្ទះឈ្មោះ អ៊ុយ រ៉ាស៊ី។
លោក ជីតូ បានបន្តថា តាមសម្ដីរបស់ម្ចាស់ផ្ទះឈ្មោះ អ៊ុយ រ៉ាស៊ី បានជួលឲ្យជនជាតិចិនមួយក្រុមស្នាក់នៅ ប៉ុន្តែកាលពីថ្ងៃអង្គារ គាត់បានទៅពិនិត្យផ្ទះរបស់គាត់ ប៉ុន្តែគ្មានមនុស្សនៅ។ គាត់បានធុំក្លិនស្អុយចម្លែកភាយចេញតាមចន្លោះប្រហោងទ្វារ ដែលបានចាក់សោជាប់ពីខាងក្រៅ ធ្វើឲ្យគាត់សង្ស័យហើយបានពិនិត្យមើលតាមប្រហោងទ្វារនោះឃើញមានឧបករណ៍និងសម្ភារជាច្រើននៅក្នុងនោះ បន្ទាប់មកគាត់បានរាយការណ៍ប្រាប់កម្លាំងសមត្ថកិច្ចជួយអន្តរាគមន៍ដើម្បីចូលពិនិត្យមើល។
លោកបានថ្លែងទៀតថា ដោយមានកិច្ចសហប្រតិបត្តិការពីកម្លាំងនគរបាលខណ្ឌសែនសុខ និងក្រោមកិច្ចសម្របសម្រួលផ្នែកច្បាប់ពីលោក សេង គឹមឡាំង ព្រះរាជអាជ្ញារងអមសាលាដំបូងរាជធានីភ្នំពេញ កម្លាំងមន្ទីរប្រឆាំងគ្រឿងញៀន នៅវេលាម៉ោង ១:៣០ នាទីថ្ងៃទី ២ ខែ មេសា ឆ្នាំ ២០១៩ បានចុះទៅដល់ហើយបានកាត់សោទ្វារផ្ទះនោះចូលទៅពិនិត្យមើល ហើយបានរកឃើញវត្ថុ ដែលគួរឲ្យសង្ស័យពាក់ព័ន្ធការផលិតនិងកែច្នៃគ្រឿងញៀនមួយចំនួន។
លោក ជីតូ បានបញ្ជាក់ថា៖ «ក្រោយការត្រួតពិនិត្យ ក្រុមសមត្ថកិច្ចយើងបានរកឃើញ ប្រភេទថ្នាំគ្រាប់ដែលសង្ស័យជាមេតំហ្វេតាមីន ១៨ គីឡូក្រាម, កេតាមីន ៦០ គីឡូក្រាម, ម្សៅសារធាតុមិនច្បាស់លាស់ ៥០,២ គីឡូក្រាម, ម្សៅរូបពោត ៨០ កេស, ម្សៅពណ៌សមិនច្បាស់លាស់ ៤៥ គីឡូក្រាម, ម៉ាស៊ីនលាយថ្នាំ ៩ គ្រឿង, ជញ្ជីងថ្លឹង ២ គ្រឿង, ពុម្ពគ្រាប់ថ្នាំ ១៨០ ដើម និងសម្ភារមួយចំនួនទៀត»។
លោកបានបន្ថែមថា៖ «វត្ថុតាងទាំងនេះត្រូវបានកម្លាំងមន្ទីរប្រឆាំងគ្រឿងញៀនយកទៅរក្សាទុក ដើម្បីពិសោធនិងស្រាវជ្រាវរកការពិត ថាតើវាពិតជាសារធាតុញៀនពិតប្រាកដឬយ៉ាងណា ប៉ុន្តែបើយោងតាមវត្ថុតាងទាំងនោះ វាអាចពាក់ព័ន្ធករណីផលិតនិងកែច្នៃគ្រឿងញៀន ឬឱសថក្លែងក្លាយខុសច្បាប់ ដែលបំផ្លាញដល់សុខុមាលភាពប្រជាពលរដ្ឋយើង»។
លោកបានបន្តថា នៅពេលនេះក្រុមមន្ត្រីជំនាញកំពុងធ្វើការស្រាវជ្រាវ និងស៊ើបអង្កេតបន្តតាមនីតិវិធីច្បាប់ ហើយទីតាំងផ្ទះខាងលើនេះត្រូវបានបិទទ្វារជាបណ្ដោះអាសន្ន។
ជាមួយគ្នានេះ លោក អ៊ុយ រ៉ាស៊ី អនុប្រធានសាខាគយ និងរដ្ឋាកររាជធានីភ្នំពេញ ដែលជាម្ចាស់ផ្ទះជួលខាងលើនេះ បានប្រាប់ភ្នំពេញប៉ុស្តិ៍យ៉ាងខ្លីថា៖ «នៅពេលនេះខ្ញុំកំពុងបន្តកិច្ចសហការជាមួយក្រុមសមត្ថកិច្ចជំនាញ ដូច្នេះខ្ញុំសូមអធ្យាស្រ័យ ដែលមិនអាចប្រាប់ឲ្យលម្អិតជុំវិញករណីនេះ ព្រោះវាកំពុងស្ថិតក្រោមនីតិវិធីនៃការស៊ើបអង្កេត»។
យោងតាមរបាយការណ៍ដែលបានផ្សព្វផ្សាយនៅលើគេហទំព័រ Facebook ផ្លូវការរបស់មន្ទីរប្រឆាំងគ្រឿងញៀន កាលពីរសៀលថ្ងៃពុធ វត្ថុតាងដែលបានរឹបអូសពីទីតាំងខាងលើនេះពិតជាសារធាតុញៀន ដែលត្រូវបានហាមឃាត់ ដោយច្បាប់ស្ដីពីការត្រួតពិនិត្យគ្រឿងញៀន។
របាយការណ៍នោះបញ្ជាក់ថា៖ «សារធាតុញៀនប្រភេទពីរ៉ូវ៉ាឡេរ៉ូន (Pyrovalerone) ទម្ងន់ ២០០,២ គីឡូក្រាម វាជាសារធាតុញៀន ដែលមាននៅក្នុងតារាងទី៣ នៃច្បាប់ត្រួតពិនិត្យគ្រឿងញៀន។ វាក៏ជាប្រភេទគ្រឿងញៀនថ្មី ដែលទើបមានវត្តមាននៅកម្ពុជាផងដែរ។ ក្រៅពីនេះមានម្សៅសារធាតុគីមីផ្សំចំនួន ៥៨៧,៥ គីឡូក្រាម និង ម៉ាស៊ីនកែច្នៃចំនួន ១ ឈុត»។
លោក ជីតូ បាននិយាយថា ករណីនេះមិនមានជាប់ពាក់ព័ន្ធករណីនៅមជ្ឈមណ្ឌលកម្សាន្តរ៉ុក និងករណីជនជាតិឥណ្ឌូនេស៊ី ដែលទើបបង្ក្រាបចាប់បាននៅឯច្រកព្រំដែនអន្តរជាតិត្រពាំងក្រៀលក្នុងខេត្តស្ទឹងត្រែងនោះទេ។
ជាមួយគ្នានេះ ការិយាល័យអង្គការសហប្រជាជាតិទទួលបន្ទុកគ្រឿងញៀននិងឧក្រិដ្ឋកម្ម (UNODC) នៅថ្ងៃពុធម្សិលមិញនេះ បានរៀបចំវេទិកាពិភាក្សាមួយនៅទីក្រុងបាងកកប្រទេស ថៃ ស្ដីពីសន្តិសុខតំបន់ព្រំដែនថ្នាក់តំបន់អាស៊ាន ដោយផ្ដោតសំខាន់ទៅលើការធ្វើសមាហរណកម្មផែនការពាណិជ្ជកម្ម និងសន្តិសុខក្នុងការគាំទ្រអាស៊ានឆ្នាំ ២០២៥។
វេទិកានេះមានការចូលរួមពីមន្ត្រីជាន់ខ្ពស់នៃតំបន់អាស៊ាននិងសហគមន៍អន្តរជាតិមួយចំនួន ដែលធ្វើការពាក់ព័ន្ធទៅនឹងកិច្ចការងារសន្តិសុខនៅតាមព្រំដែន។
យោងតាមសេចក្ដីប្រកាសព័ត៌មាន ដែលចេញផ្សាយក្រោយបញ្ចប់ក្នុងវេទិកានោះ លោក Jereme Douglas តំណាងឲ្យអង្គការ UNODC បាននិយាយថា៖ «ក្រុមឧក្រិដ្ឋជនដែលត្រូវបានគេរៀបចំឡើងនោះ បានជះឥទ្ធិពលលើគោលនយោបាយ និងភាពខុសគ្នានៃសមត្ថភាពដើម្បីពង្រីកពាណិជ្ជកម្មគ្រឿងញៀន និងអាជីវកម្មខុសច្បាប់ដទៃទៀតនៅអាស៊ីអាគ្នេយ៍ ហើយយើងជឿជាក់ថាយុទ្ធសាស្ត្រគ្រប់គ្រងរួមអាស៊ានមួយនឹងជួយឲ្យមានការឆ្លើយតបនៅក្នុងតំបន់»៕
