មណ្ឌលគិរីៈ កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តមណ្ឌលគិរីបានឃាត់រថយន្តដឹកឈើរបស់ក្រុមហ៊ុនលឹមរ៉ូយ៉ាល់ចំនួន ១៣ គ្រឿង នៅចំណុចអូររមាស ក្នុងក្រុងសែនមនោរម្យ ដោយសង្ស័យថា រថយន្តទាំងនោះផ្ទុកឈើលើសទម្ងន់ ខុសពីលិខិតអនុញ្ញាតរបស់រដ្ឋបាលព្រៃឈើ។
ស្នងការនគរបាលខេត្តមណ្ឌលគិរី លោក ឡោ សុខា បានប្រាប់ ភ្នំពេញ ប៉ុស្តិ៍ ពីម្សិលមិញថា ទាក់ទងករណីនេះខាងគណៈកម្មាធិការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិបានចុះត្រួតពិនិត្យ និងឃើញមាន PC (លិខិតអនុញ្ញាត) ត្រឹមត្រូវហើយ មុនឱ្យចេញដំណើរ។ ប៉ុន្តែលោកថា ការឃាត់រថយន្តទាំងនោះជាសមត្ថកិច្ចរបស់កម្លាំងនគរបាលប្រឆាំងបទល្មើសសេដ្ឋកិច្ច។
លោកថា៖ «ថ្នាក់ខេត្ត បង្កើតគណៈកម្មការមួយចុះវាស់វែងត្រួតពិនិត្យមាន PC ត្រឹមត្រូវ ប៉ុន្តែខាងលោកព្រះរាជអាជ្ញា និងប៉ូលិសសេដ្ឋកិច្ចសង្ស័យថា ពិនិត្យមើលទៅអត់ត្រឹមត្រូវ អ៊ីចឹងការងារនេះគាត់ត្រួតពិនិត្យថែមពីលើ បើមានការខុសឆ្គងអី គឺជាការងាររបស់ក្រុមប៉ូលិសសេដ្ឋកិច្ច និងក្រុមហ៊ុន ព្រោះក្រុមហ៊ុនជួនកាលគាត់ដាក់លើសទម្ងន់»។
បើតាមលោក ឡោ សុខា សមត្ថកិច្ចជំនាញពុំទាន់អនុញ្ញាតឱ្យរថយន្តចរាចរណ៍ទៅនោះទេ ខណៈមន្ត្រីជំនាញកំពុងពិនិត្យឈើទាំងនោះឡើងវិញ។
ជាមួយគ្នានេះដែរ អភិបាលរងខេត្តមណ្ឌលគិរីលោក ជាក់ ម៉េងហ៊ាង ប្រាប់ភ្នំពេញប៉ុស្តិ៍ថា តាមគម្រោងឡានដឹកឈើទាំងនោះ ដឹកចេញពីស្រុកកោះញែក ខេត្តមណ្ឌលគិរី ឆ្ពោះទៅខេត្តក្រចះ ដើម្បីដឹកចូលរោងចក្រកែច្នៃឈើសម្រាប់ធ្វើជាគ្រឿងសង្ហារិម និងជើងតុផ្សេងៗ។
លោកថា៖ « ឡាន (១៣ គ្រឿង) នេះរបស់ក្រុមហ៊ុនលឹមរ៉ូយ៉ាល់ ហើយឈើនេះមាន PC ត្រឹមត្រូវ ដើម្បីដឹកជញ្ជូនយកមកដាក់នៅរោងចក្រក្នុងស្រុកស្នួល ខេត្តក្រចេះ ដែលជាតំបន់សេដ្ឋកិច្ចពិសេសរបស់ក្រុមហ៊ុនចិន»។
លោកបន្តថា៖ «ក្រោយពីបានពិនិត្យ ឈើនេះគឺជាឈើដុំពន្លះ ដើម្បីយកមកចូលរោងចក្រ ដូច្នេះគណៈកម្មាធិការ (ទប់ស្កាត់ និងបង្ក្រាបបទល្មើសធនធានធម្មជាតិ) បានពិនិត្យថា ឈើនេះត្រឹមត្រូវអត់មានអីខុសទេ ប៉ុន្តែដោយសារប៉ូលិសប្រឆាំងបទល្មើសសេដ្ឋកិច្ចចោទថា លើសដុំឈើ»។
បើតាមលោក ម៉េងហ៊ាង ឈើនេះមានប្រមាណ ១៨ ម៉ែត្រគុបក្នុងមួយឡាន ទៅតាមបរិមាណឡានតូច ឬឡានធំ ដែលមានឈើដុំ និងឈើសន្លឹក ដែលគេដឹកយកទៅចូលរោងចក្រកែច្នៃ ដើម្បីផលិតទៅជារបស់ប្រើប្រាស់ដូចជាជើងតុ ជើងកៅអីតូចៗ។
អ្នកសម្របសម្រួលបណ្តាញសហគមន៍ជនជាតិដើមភាគតិច ប្រចាំខេត្តមណ្ឌលគិរី និងជាសកម្មជនព្រៃឈើលោក គ្រើង តុលា យល់ថា ក្នុងករណីរកឃើញមានភាពមិនប្រក្រតីនៃការដឹកជញ្ជូនឈើ សមត្ថកិច្ចគួរមានវិធានការតាមផ្លូវច្បាប់ដោយលោកចាត់ទុកថា នេះជាឧក្រិដ្ឋកម្មព្រៃឈើដែលនាំឱ្យប៉ះពាល់ដល់ព្រៃឈើដែលកំពុងរងគ្រោះពីការកាប់បំផ្លាញដោយជនខិលខូចមួយចំនួន។ «វាជាឧក្រិដ្ឋកម្មព្រៃឈើមួយ មិនគួរលើកលែងដោយសារកន្លងមក ឃើញមានក្រុមហ៊ុនបន្លំច្រើនមែនទែន»។ លោកថា ជារឿយៗអាជ្ញាធរបានចុះទៅពិនិត្យពាក់ព័ន្ធការដឹកឈើខុសច្បាប់ ឬលើសទម្ងន់ ប៉ុន្តែហាក់ដូចជាមិនសូវមានប្រសិទ្ធភាពឡើយ។
នាយខណ្ឌរដ្ឋបាលព្រៃឈើខេត្តមណ្ឌលគិរីលោក អ៊ុំ វណ្ណសុភ័គ៌ ថ្លែងពីម្សិលមិញថា រឿងនេះក្រុមការងារកំពុងត្រួតពិនិត្យចាំបានលទ្ធផលយ៉ាងម៉េច លោកនឹងផ្តល់ព័ត៌មានតាមក្រោយ។
មិនមានប្រភពទាក់ទងទៅក្រុមហ៊ុន លឹម រ៉ូយ៉ាល់ ជ័ញស្ដុក ដើម្បីសុំការបញ្ជាក់លើបញ្ហានេះបានទេកាលពីម្សិលមិញ៕