.jpg)
សមត្ថកិច្ចចុះដុតកម្ទេចទីតាំងដាំកញ្ឆាមួយកន្លែងក្នុងខេត្តតាកែវ។ រូបថត ប៉ូលិស
ខេត្តតាកែវ៖ កម្លាំងនគរបាលស្រុកគិរីវង់បានកាប់ដុតបំផ្លាញចោលនូវដំណាំកញ្ឆាខុសច្បាប់ចំនួន ៨ ទីតាំង ដែលមានផ្ទៃដីប្រមាណ ៩៧៥ ម៉ែត្រការ៉េ កាលពីធ្ងៃទី ១៧ ខែមីនា នៅចំណុចខ្នងភ្នំដុបខាងលិចប្រាសាទបាយ៉ង់កោរ ស្ថិតក្នុងឃុំព្រះបាទជាន់ជុំ ស្រុកគិរីវង់។
លោក ស៊ុត ខុន អភិបាលស្រុកគិរីវង្សប្រាប់ ភ្នំពេញ ប៉ុស្តិ៍ ពីម្សិលមិញថា នៅក្នុងមូលដ្ឋានស្រុកគិរីវង្ស តែងមានជនខិលខូចមួយចំនួនបានទៅលួចដាំដំណាំកញ្ឆានៅតាមភ្នំ ហើយសមត្ថកិច្ចស្រុក តែងតែទៅបង្ក្រាបជាបន្តបន្ទាប់ ប៉ុន្តែហាក់នៅតែមានសកម្មភាពដាំនៅតែបន្តមាន។
ទោះយ៉ាងណា សមត្ថកិច្ចមិនដែលព្រងើយកន្តើយនឹងសកម្មភាពនេះនោះទេ គឺនៅតែបន្តចុះស្រាវជ្រាវ ដើម្បីបង្ក្រាប និងទប់ស្កាត់ការដាំដំណាំកញ្ឆានេះជាហូរហែ ខណៈបច្ចុប្បន្នកម្លាំងជំនាញកំពុងស្រាវជ្រាវស្វែងរកអ្នកដាំដំណាំកញ្ឆាទាំងនោះ ដើម្បីយកមកផ្តន្ទាទោសតាមច្បាប់។
លោក ស៊ុត ខុន ថ្លែងថា៖ «កិច្ចការនេះ យើងធ្វើជាប្រចាំ ប៉ុន្តែខ្ញុំមិនចាំថា បានធ្វើ និងចាប់ជនល្មើសបញ្ជូនជនល្មើសប៉ុន្មានរួចមកហើយដែរ។ យើងធ្វើម្តងនៅទីនេះ ម្តងនៅទីនោះដែលភាគច្រើនជនខិលខូចបានដាំនៅចន្លោះថ្ម និងនៅលើភ្នំ ដែលពិបាកដល់សមត្ថកិច្ចក្នុងការចុះស្រាវជ្រាវ ដើម្បីកាប់ដុតកម្ទេចចោល»។
លោក ស៊ុត ខុន ប៉ាន់ស្មានថា អ្នកដែលដាំដំណាំកញ្ឆានេះ គឺជាអ្នករស់នៅក្នុងស្រុកនេះ ហើយអាជ្ញាធរក៏កំពុងស្វែងរកអ្នកទាំងនោះ និងអ្នកនៅពីក្រោយ ដើម្បីចាប់យកមកផ្តន្ទាទោសតាមច្បាប់។ ប៉ុន្តែមានការលំបាកខ្លះដល់សមត្ថកិច្ចក្នុងការស្វែងរកទីតាំងដាំកញ្ឆា និងអ្នកដាំ ព្រោះគេដាំនៅលើភ្នំមិនមែនដាំលើដីឯកជនរបស់គេនោះទេ។
លោក ហៀម ស្រ៊ីម អធិការរងស្រុកគិរីវង់ទទួលបន្ទុកផ្នែកគ្រឿងញៀនបានបដិសេធធ្វើអត្ថាធិប្បាយ ជុំវិញករណីនេះ ដោយបានថ្លែងថា លោកមិនមែនជាអ្នកទទួលបន្ទុកឆ្លើយតបជាមួយនឹងអ្នកសារព័ត៌មានទេ។ លោកបានស្នើឱ្យទាក់ទៅលោក យុគ សារ៉ាត់ អធិការនគរបាលស្រុកគិរីវង់។ លោក យុគ សារ៉ាត់ មិនអាចទាក់ទងសុំអត្ថាធិប្បាយបានទេ ដោយសារទូរស័ព្ទរបស់លោកពុំមានអ្នកទទួលឡើយ។
ចំណែក លោក អិន វុធ នាយប៉ុស្ដិ៍ឃុំព្រះបាទជាន់ជុំ ស្រុកគិរីវង់ ថ្លែងថា លោកក៏មិនអាចធ្វើការអត្ថាធិប្បាយជូន ភ្នំពេញ ប៉ុស្តិ៍ បានដែរលុះត្រាតែមានគោលការណ៍អនុញ្ញាតពីលោក យុគ សារ៉ាត់។
លោក មាស សុវណ្ណ ប្រធានសមាគមសង្គ្រោះជនរងគ្រោះគ្រឿងញៀនបានថ្លែងថា ការដាំកញ្ឆានៅក្នុងប្រទេសកម្ពុជា កាលពីមុន គឺមិនខុសច្បាប់នោះទេ ដោយពលរដ្ឋគាត់ដាំយកទៅដាក់ក្នុងសម្ល ឬយកទៅធ្វើអ្វីៗផ្សេងទៀតបានប៉ុន្តែ ក្រោយមករដ្ឋាភិបាលបានពិនិត្យឃើញថា កញ្ឆានេះ គឺជាគ្រឿងផ្សំមួយផ្នែកនៃការផលិតគ្រឿងញៀនទើបរដ្ឋាភិបាលបង្កើតច្បាប់មិនឱ្យមានការដាំកញ្ឆាបន្តទៀត។
ទោះបីជាយ៉ាងណា លោក មាស សុវណ្ណ បញ្ជាក់ថា លោកមិនបានចាំពីទំហំទោសទណ្ឌកម្រិតណា ឬការផាកពិន័យចំនួនប៉ុន្មាននោះទេ ចំពោះអ្នកដាំកញ្ឆាដោយចំនួនទោសទណ្ឌ គឺមានចែងនៅក្នុងច្បាប់ត្រួតពិនិត្យគ្រឿងញៀន។
លោកបានថ្លែងថា៖ «ពីសង្គមចាស់ ចាស់ៗ ដាំជក់លេងធ្វើមិនដឹង ប៉ុន្តែក្រោយមកកម្ពុជាយើងបានដាំកញ្ឆានេះ សម្រាប់ធ្វើការនាំចេញរ៉ាប់រយហិកតា ហើយត្រូវបានគេគិតថា វាអាចកែច្នៃ ឬផ្សំទៅជាគ្រឿងញៀន និងធ្វើឱ្យប៉ះពាល់ដល់សរសៃប្រសាទបាន។ អ៊ីចឹងហើយបានគេហាមមិនឱ្យដាំបន្តទៀត»៕
