.jpg)
អាវុធកែច្នៃដែលសមត្ថកិច្ចប្រមូលពីពលរដ្ឋនៅស្ទឹងត្រែង។រូប ប៉ូលិស
ស្ទឹងត្រែងៈ នគរបាលស្រុកសេសានពីម្សិលមិញបានយកអាវុធកែច្នៃ ៣៩ ដើម ដែលប្រមូលបានពីពលរដ្ឋក្នុងមូលដ្ឋានមកប្រគល់ជូនការិយាល័យអាវុធជាតិផ្ទុះនៃស្នងការដ្ឋាននគរបាលខេត្តស្ទឹងត្រែងដើម្បីរក្សាទុក និងចាត់ចែងបន្តតាមនីតិវិធីច្បាប់។
លោក ទេស ភាលាប អធិការស្រុកសេសានបានប្រាប់ភ្នំពេញ-ប៉ុស្តិ៍ថា បន្ទាប់ពីយល់ច្បាស់ពីគោលនយោបាយភូមិ-ឃុំមានសុវត្ថិភាព និងហានិភ័យនៃការកាន់កាប់អាវុធខុសច្បាប់រួចមកពលរដ្ឋក្នុងមូលដ្ឋានក្នុងឃុំទាំង ៧ នៃស្រុកសេសាន ជាពិសេសអ្នកធ្លាប់បរបាញ់សត្វព្រៃបានភ្ញាក់រឭកនាំយកអាវុធ និងអាវុធកែច្នៃរបស់ពួកគេមកប្រគល់ជូនសមត្ថកិច្ចជាបន្តបន្ទាប់ ដើម្បីរក្សាទុក និងកម្ទេចចោលតាមនីតិវិធីច្បាប់។
លោក ភាលាប បានបញ្ជាក់ថា៖ «ខ្ញុំមានភាពរីករាយណាស់នៅពេលឃើញពលរដ្ឋយើងភ្ញាក់រឭកនាំយកអាវុធទាំងនេះមកប្រគល់ជូនសមត្ថកិច្ចយើងរក្សាទុកដើម្បីចាត់ការបន្តតាមនីតិវិធីច្បាប់។ អាវុធទាំង ៣៩ ដើមនោះរួមមាន AK44 ចំនួន ១ ដើម, AK47 ចំនួន ២ ដើម,CKC ចំនួន ១ ដើមហើយក្រៅពីនោះជាអាវុធកែច្នៃ»។
បើតាមលោក ភាលាប បច្ចុប្បន្ននេះអាវុធទាំង ៣៩ ដើមនោះត្រូវបានមន្ត្រីនគរបាលខេត្តនាំយកទៅរក្សាទុកនៅស្នងការដ្ឋាននគរបាលខេត្តស្ទឹងត្រែង ដើម្បីបន្តតាមនីតិវិធី៕
