ក្រចេះ៖នគរបាលស្រុកសំបូរបានបញ្ជូនបុរស ៣ នាក់ទៅស្នងការដ្ឋាននគរបាលខេត្តក្រចេះនៅថ្ងៃនេះ បន្ទាប់ពីឃាត់ខ្លួនកាលពីយប់ថ្ងៃទី ២៥ មេសាពាក់ព័ន្ធករណីលួចជីកយករ៉ែមាសនៅទីតាំង ១ កន្លែងរបស់ក្រុមហ៊ុនចិននៅតំបន់អូរត្រូននៃឃុំក្បាលដំរី។
លោក ជ្រិន សុទ្ធា អធិការស្រុកសំបូរបានប្រាប់ភ្នំពេញប៉ុស្តិ៍នៅរសៀលថ្ងៃទី ២៦ ខែមេសានេះថា បុរសជាជនសង្ស័យទាំងនោះរួមមាន ឈ្មោះ ស៊ិន សុខេត អាយុ ៥២ ឆ្នាំ មានលំនៅក្នុងភូមិអូរពោធិ៍ ឃុំក្បាលដំរី ស្រុកសំបូរ ខេត្តក្រចេះ និងបក្ខពួក ២ នាក់ទៀត ឈ្មោះ អាន រ៉ាវី អាយុ ២៩ ឆ្នាំ និងឈ្មោះ ជឹម សុឡា អាយុ ២៤ ឆ្នាំ ដែលពួកគេរស់នៅក្នុងភូមិជាមួយ គ្នា។ ការឃាត់ខ្លួន ខណៈពេលពួកគេកំពុងជីកយករ៉ែមាសក្នុងទីតាំងអាជីវកម្មរ៉ែមាស ១ កន្លែងរបស់ក្រុមហ៊ុន [ចិន] ស៊ីង យ័ងគ័ងយិ កាលពីយប់ ២៥ ខែមេសា។
លោក សុទ្ធា បានថ្លែងថា៖ «ជនសង្ស័យទាំង ៣ ត្រូវបានកម្លាំងនគរបាលជំនាញផ្នែកព្រហ្មទណ្ឌ កសាងសំណុំរឿងចោទប្រកាន់ក្នុងបទល្មើសអំពើលួច ហើយបានបញ្ជូនទៅកាន់ស្នងការដ្ឋាននគរបាលខេត្តក្រចេះ នៅរសៀលថ្ងៃទី ២៦ ខែមេសា នេះដើម្បីចាត់ការបន្តតាមនីតិវិធីច្បាប់»។
ចំណែក លោក ប៊ុន ឈឿន ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តក្រចេះបានប្រាប់ភ្នំពេញប៉ុស្តិ៍នៅរសៀលថ្ងៃចន្ទនេះដែរថា ក្រុមការងាររបស់លោកបានទទួលសំណុំរឿង និងជនសង្ស័យទាំង ៣ នាក់នោះហើយ និងកំពុងបន្តនីតិវិធីស៊ើបសួរយកចម្លើយបន្ថែម ដើម្បីកសាងសំណុំរឿងនៃបទល្មើសបញ្ជូនទៅតុលាការ។
លោកបានបញ្ជាក់ថា៖ «នៅពេលនេះ ការស៊ើបសួរចម្លើយលើជនសង្ស័យទាំង ៣ ខាងលើនេះ នៅមិនទាន់ចប់សព្វគ្រប់នៅឡើយទេ។ ប៉ុន្តែទោះយ៉ាងណាក៏ដោយ ក្រុមមន្ត្រីជំនាញយើងគ្រោងនឹងបញ្ជូនសំណុំរឿង និងពួកគេទាំង ៣ នាក់ទៅកាន់តុលាការខេត្តក្រចេះនៅថ្ងៃទី ២៧ ខែមេសាស្អែកនេះ ដើម្បីចាត់វិធានការបន្តតាមនីតិវិធីច្បាប់»។
ករណីលួចធ្វើអាជីវកម្មរ៉ែមាសខុសច្បាប់ក្នុងតំបន់អូរត្រូននៃឃុំក្បាលដំរី ស្រុកសំបូរ ខេត្តក្រចេះ នាប៉ុន្មានឆ្នាំចុងក្រោយនេះមានកម្មករជាច្រើននាក់មកហើយដែលបានស្លាប់ ដោយសារការបាក់ដីមាត់រណ្ដៅរ៉ែមាសសង្កត់លើ។
ទន្ទឹមនឹងនេះ អាជ្ញាធរខេត្តក៏ធ្លាប់បានចុះផ្សព្វផ្សាយណែនាំអប់រំ និងបង្ក្រាបជាច្រើនលើករួចមកហើយដែរ ជុំវិញការលួចធ្វើអាជីវកម្មរ៉ែមាសខុសច្បាប់ក្នុងតំបន់ដីសម្បទានសេដ្ឋកិច្ចដែលរាជរដ្ឋាភិបាលកម្ពុជាបានផ្ដល់សិទ្ធិទៅឲ្យក្រុមហ៊ុនចិនឈ្មោះ ស៊ីង យ័ងគ័ងយិ ៕