ភ្នំពេញៈ អ្នកនាំពាក្យនៃអគ្គស្នងការនគរបាលជាតិកាលពីចុងសប្ដាហ៍កន្លងមកនេះបានចេញសេចក្ដីប្រកាសជាផ្លូវការដល់សាធារណជនជាតិ និងអន្តរជាតិត្រូវបញ្ឈប់ជាបន្ទាន់នូវរាល់ចេតនារារាំងការអនុវត្តដីការបស់តុលាការ ក្នុងការស្វែងរក និងចាប់ខ្លួនទណ្ឌិត សម រង្ស៊ី និងបក្ខពួកយកមកផ្ដន្ទាទោសតាមច្បាប់។
សេចក្ដីប្រកាសព័ត៌មានដដែលនេះបានឲ្យដឹងថា៖ «ក្នុងស្មារតីរួមចំណែកពង្រឹង និងការពារនីតិរដ្ឋ ព្រមទាំងធានាការរក្សាសន្តិសុខ និងសណ្ដាប់ធ្នាប់សង្គមឲ្យបានល្អប្រសើរ អគ្គស្នងការដ្ឋាននគរបាលជាតិ សូមអំពាវនាវដល់សាធារណជនជាតិ និងអន្តរជាតិ ចូលរួមគាំទ្រដល់ការអនុវត្តភារកិច្ចរបស់កងកម្លាំងអនុវត្តច្បាប់ និងកុំធ្លាក់ក្នុងឧបាយកលញុះញង់របស់ជនអគតិមួយក្តាប់តូច ដែលកំពុងបំផុសឲ្យប្រជាពលរដ្ឋបះបោរប្រឆាំងអាជ្ញាធរមានសមត្ថកិច្ច ដែលសកម្មភាពនេះ គឺជាទង្វើខុសច្បាប់ ហើយក៏ជាទង្វើដែលបង្កឲ្យមានអសន្តិសុខដល់សង្គម។ ជាមួយគ្នានេះដែរ សូមបញ្ឈប់ជាបន្ទាន់នូវរាល់ចេតនារារាំងការអនុវត្តដីការបស់តុលាការ ព្រោះ សកម្មភាពរារាំងការអនុវត្តដីការបស់តុលាការ គឺជាអំពើដែលត្រូវផ្តន្ទាទោសតាមច្បាប់ជាធរមាន»។
សេចក្ដីប្រកាសព័ត៌មានរបស់អគ្គស្នងការដ្ឋាននគរបាលជាតិ បានធ្វើឡើងជួនគ្នា ក្រោយពីលោក សម រង្ស៊ី ប្រធានស្ដីទីគណបក្សសង្គ្រោះជាតិដែលមានមូលដ្ឋាននៅក្រៅប្រទេស បានប្រកាសជាញយៗថា នឹងវិលត្រឡប់មកកម្ពុជាវិញក្នុងពេលឆាប់ខាងមុខនេះនៅក្នុងខែកញ្ញា ព្រមទាំងបានអំពាវនាវឲ្យប្រជាពលរដ្ឋចូលរួមចលនាស្ដារលទ្ធិប្រជាធិបតេយ្យនៅកម្ពុជាឡើងវិញ។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ បានឲ្យដឹងផងដែរកាលពីម្សិលមិញថា អគ្គស្នងការដ្ឋាននគរបាលជាតិបានស្នើសុំឲ្យប្រទេសដែលជាប់ព្រំដែនជាមួយប្រទេស កម្ពុជា ជួយសហការក្នុងការស្វែងរក និងចាប់ខ្លួនលោក សម រង្ស៊ី និងបក្ខពួក។
លោក គឺមខឿន ថ្លែងថា៖ «ពាក់ព័ន្ធនឹងកិច្ចសហការ វាអាស្រ័យទៅលើប្រទេសជាដៃគូយើង យើងបានស្នើសុំ ហើយពេលដែលគេសហការចាប់ (លោក សម រង្ស៊ី) ឲ្យយើង យើងមានក្ដីត្រេកអរ»។
លោក ឡៅ ម៉ុងហៃ អ្នកវិភាគនយោបាយ បានអះអាងថា អគ្គស្នងការដ្ឋាននគរបាលជាតិគ្រាន់តែអនុវត្តតាមសាលក្រមរបស់តុលាការតែប៉ុណ្ណោះពុំមានអ្វីប្លែកនោះទេ។
គួររំឭកផងដែរថា គណបក្សសង្គ្រោះជាតិត្រូវបានតុលាការកំពូលរំលាយចោលកាលពីខែវិច្ឆិកា ឆ្នាំ ២០១៧ ពីអំពើក្បត់ជាតិ និងហាមឃាត់មនុស្សនៅក្នុងបក្សនេះជាង ១០០ នាក់ មិនឲ្យធ្វើសកម្មភាពនយោបាយ។ លោក រង្ស៊ី ត្រូវបានតុលាការចោទប្រកាន់ជាច្រើនករណី និងជាប់ទោសជាច្រើនឆ្នាំ ហើយបានគេចខ្លួនចេញពីប្រទេស កម្ពុជា។
លោក រង្ស៊ី កាលពីម្សិលមិញ មិនបានឆ្លើយតបតាមរយៈអ៊ីមែល ក្នុងការសុំអត្ថាធិប្បាយពីភ្នំពេញប៉ុស្តិ៍ អំពីពេលវេលាពិតប្រាកដនៃការកៀរគរមនុស្សឲ្យវិលត្រឡប់មកជាមួយ៕