.jpg)
ទិដ្ឋភាពលំនៅឋាននៅខណ្ឌទួលគោករាជធានីភ្នំពេញដែលត្រូវអគ្គិភ័យឆេះពីសប្ដាហ៍មុន។ រូបថត Fresh News
ភ្នំពេញៈ មន្ត្រីនគរបាលពន្លត់អគ្គិភ័យរាជធានីភ្នំពេញបានអំពាវនាវដល់ឪពុកម្ដាយ និងអាណាព្យាបាលឲ្យបញ្ឈប់ការប្រើកុមារដែលមានអាយុក្រោម ១៣ ឆ្នាំ ឲ្យធ្វើការណាដែលអាចបង្កឲ្យមានគ្រោះអគ្គិភ័យ បន្ទាប់ពីមានករណីគ្រោះអគ្គិភ័យមួយបានកើតឡើងកាលពីសប្ដាហ៍មុននៅក្នុងរាជធានីភ្នំពេញដែលបានបង្កឲ្យក្មេង-ចាស់ប្រុស-ស្រីចំនួន ៦ នាក់បានស្លាប់ និងរងរបួស។
លោក ព្រំ យ៉ន ប្រធានការិយាល័យបង្ការទប់ស្កាត់ និងពន្លត់អគ្គិភ័យរាជធានីភ្នំពេញបានថ្លែងកាលពីចុងសប្ដាហ៍មុនថា៖ «ការប្រើកូនចៅក្រោមអាយុ ១៣ ឆ្នាំ ឲ្យជួយដាំស្ល ឬចាក់ផ្ទេរសាំងពីធុងចូលដប ឬពីដបចូលទៅក្នុងគ្រឿងចក្រអ្វីមួយអាចបង្កឲ្យមានគ្រោះអគ្គិភ័យកើតឡើង ដែលធ្វើឲ្យខូចខាតធ្ងន់ធ្ងរដល់ទ្រព្យសម្បត្តិ និងអាយុជីវិតមនុស្សទាំងក្នុងគ្រួសារ និងសហគមន៍»។
លោកបានបន្តថា ករណីគ្រោះអគិ្គភ័យកាលពីសប្ដាហ៍មុននៅក្បែរផ្សារដេប៉ូក្នុងសង្កាត់ផ្សារដេប៉ូទី ២ ខណ្ឌទួលគោក រាជធានីភ្នំពេញបានបង្កឲ្យស្ត្រីម្នាក់ឈ្មោះ យន ស្រ៊ីបអាយុ ៧១ ឆ្នាំស្លាប់ និងសមាជិកគ្រួសារគាត់ ៥ នាក់ទៀត រួមមានឈ្មោះ ប៊ុន សោរ៉ន អាយុ ៤១ ត្រូវជាកូនប្រុសបង្កើត និងឈ្មោះ ស៊ូ ស៊ីថា អាយុ ៣៧ ឆ្នាំត្រូវជាកូនប្រសាស្រី, កុមារី ភឿន លីដា អាយុ ១២ ឆ្នាំ និងកុមារីភឿន លីកា អាយុ ៨ ឆ្នាំដែលជាចៅស្រីរបស់គាត់ និងឈ្មោះ គៀត ឡាង អាយុ ៦៥ ឆ្នាំត្រូវជាដន្លងស្រីរបស់គាត់បានរងរបួសធ្ងន់។ ចំណែកទំនិញ និងទ្រព្យសម្បត្តិមួយចំនួនទៀតត្រូវបានឆេះខូចខាតស្ទើរទាំងស្រុង។
លោក យ៉ន បានបញ្ជាក់ថា៖ «គ្រោះអគ្គិភ័យនោះគឺបណ្ដាលមកពីកុមារីក្រោមអាយុ ១៣ ឆ្នាំម្នាក់ឈោងយកដបសាំងមួយដបទៅចាក់ម៉ូតូ ហើយបានរអិលជើងដួលកំពប់សាំងទៅលើដី ហើយបានខ្ទាតទៅប៉ះនឹងចំហេះនៃម៉ាស៊ីនម៉ូតូបង្កឲ្យមានវិនាសកម្មភ្លើងឆេះផ្ទះស្លាប់ស្ត្រីអាយុ ៧១ ម្នាក់ និងរងរបួសមនុស្ស ៥ នាក់ដែលក្នុងនោះរួមទាំងក្មេងស្រីអាយុ ៨ ឆ្នាំម្នាក់ផង»។
ករណីគ្រោះអគ្គិភ័យខាងលើនេះបានធ្វើឲ្យចំនួនជនរងគ្រោះដែលបានស្លាប់ ដោយសារគ្រោះអគ្គិភ័យគិតត្រឹមថ្ងៃទី ២៦ ខែ មីនា ឆ្នាំ ២០២០ មានការកើនឡើងដល់ ៦ នាក់ ខណៈដែលអ្នករងរបួសបានកើនដល់ចំនួន ៣១ នាក់។ នេះយោងបើតាមទិន្នន័យដែលភ្នំពេញប៉ុស្តិ៍ទទួលបានពីនាយកដ្ឋានបង្កទប់ស្កាត់ និងពន្លត់អគ្គិភ័យនៃអគ្គស្នងការដ្ឋានគរបាលជាតិកាលពីចុងសប្ដាហ៍មុន។
របាយការណ៍ដដែលនេះបានបង្ហាញថា នៅក្នុងរាជធានីភ្នំពេញមានជនរងគ្រោះស្លាប់ និងរបួសដោយសារគ្រោះអគ្គិភ័យច្រើនជាងគេគឺស្លាប់ ២ នាក់ និងរបួស ៨ នាក់ បន្ទាប់មកខេត្តប៉ៃលិន សៀមរាប ព្រៃវែង និងខេត្តកំពង់ចាម។ ចំណែកខេត្តកំពង់ឆ្នាំងនៅតែជាខេត្ត «គំរូ» ដដែលដែលគ្មានករណីភ្លើងឆេះកើតឡើងនៅដើមឆ្នាំនេះគិតត្រឹមថ្ងៃ ២៦ ខែមីនា។
មូលហេតុដែលបង្កឲ្យមានគ្រោះអគ្គិភ័យបណ្ដាលមកពីទូស្សេចរន្តអគ្គិសនីមាន ៤១ ភាគរយ បណ្ដាលមកពីការប្រើប្រាស់ភ្លើង ៣៩ ភាគរយ និង ២០ ភាគរយទៀត គឺនៅមិនទាន់ដឹងពីមូលហេតុ។
របាយការណ៍ដដែលនោះបានបញ្ជាក់ថា៖ «ស្ថានីយប្រេងឥន្ធនៈ និងឧស្ម័ននៅទូទាំងប្រទេសចំនួន ៨ ៥៩២ ទីតាំង គឺជាគោលដៅដែលងាយរងគ្រោះពីអគ្គិភ័យជាងគេបំផុតក្នុងនោះនៅក្រុងភ្នំពេញមានចំនួន ៥៩៥ ទីតាំង»។
ទាក់ទិននឹងបញ្ហានេះលោក យ៉ន បានអំពាវនាវដល់ពលរដ្ឋជាមាតាបិតា និងអាណាព្យាបាលនៅក្នុងគ្រួសារនីមួយៗឲ្យបញ្ឈប់ការប្រើកូនចៅតូចៗអាយុក្រោម ១៣ ឆ្នាំ ឲ្យជួយធ្វើការណាដែលងាយបង្កឲ្យមានគ្រោះអគ្គិភ័យ និងស្នើឲ្យប្រុងប្រយ័ត្នចំពោះគ្រោះអគ្គិភ័យបន្ថែមទៀតដោយត្រូវពន្លត់ភ្លើងចង្ក្រាន ទៀន ធូប និង បិទផ្ដាច់ចរន្តអគ្គិសនីឲ្យអស់មុនពេលចាកចេញពីផ្ទះ។
ជុំវិញករណីនេះអ្នកស្រី ខៀវ ស៊ីថា អាយុ ៥៣ ឆ្នាំ ជាកសិករម្នាក់ រស់នៅឃុំ-ស្រុកតំបែរ ខេត្តត្បូងឃ្មុំបានប្រាប់ភ្នំពេញ-ប៉ុស្តិ៍ថា កាលពីប៉ុន្មានឆ្នាំមុនគ្រួសារអ្នកស្រីធ្លាប់បានជួបប្រទះករណីភ្លើងឆេះផ្ទះ កាលពីក្នុងខែមិថុនា ឆ្នាំ ២០១៨ ដែលពេលនោះស្ទើរតែបាត់បង់អស់កូន ៣ នាក់។
អ្នកស្រីបានបញ្ជាក់ថា៖ «នៅពេលរសៀលថ្ងៃនោះខ្ញុំ និងប្ដីបានទៅធ្វើចម្ការដោយទុកកូន ៣ នាក់អាយុពី ៨ ឆ្នាំដល់ ១២ ឆ្នាំឲ្យនៅចាំផ្ទះ។
មុនចាកចេញ ខ្ញុំបានប្រាប់កូនស្រីច្បងឲ្យជួយដាំបាយទុកជាមុន។ ប៉ុន្តែពេលនាងបង្កាត់ភ្លើងដាំបាយក៏កំពប់ប្រេងកាតពីដបបណ្ដាលឲ្យឆាបឆេះផ្ទះបាយរាលដល់ផ្ទះធំតែម្ដង។
សំណាងដែលនាងបាននាំប្អូនៗរត់ចេញពីផ្ទះទាន់ពេល»។
អ្នកស្រី ស៊ីថា បានបន្ថែមថា៖ «វាមិនប្រសើរឡើយ ដែលយើងជាឪពុកម្ដាយប្រើកូនតូចៗឲ្យជួយដាំស្លបែបនេះ។ បទពិសោធគ្រួសារខ្ញុំគឺគ្រប់គ្រាន់សម្រាប់ពលរដ្ឋទាំងអស់យកពិចារណា និងបញ្ឈប់ប្រើកូនតូចៗឲ្យធ្វើកិច្ចការទាំងនេះ»៕
