.jpg)
ជនសង្ស័យដែលមានសតិមិនគ្រប់កាប់សម្លាប់ឪពុកខ្លួន។ រូបថត FN
ព្រៃវែងៈ បុរសជាកូនបង្កើតម្នាក់ដែលសមត្ថកិច្ចអះអាងថាមានសតិមិនគ្រប់ ត្រូវបានចាប់ខ្លួនភ្លាមៗនៅកន្លែងកើតហេតុបន្ទាប់ពីកាប់ឪពុករបស់ខ្លួនចំនួន ២ កាំបិតផ្កាក់ស្លាប់ ខណៈជនរងគ្រោះកំពុងដេកលក់កាលពីរំលងអធ្រាត្រឈានចូលថ្ងៃទី ៩ មីនាប្រព្រឹត្តនៅភូមិដីថុយ ឃុំបឹងព្រះ ស្រុកបាភ្នំ ខេត្តព្រៃវែង។
លោក មុំ សារុំ អធិការនគរបាលស្រុកបាភ្នំ បានឲ្យដឹងកាលពីម្សិលមិញថា ជនសង្ស័យឈ្មោះ ស៊ិន ថាវ័ន្ត អាយុ ២៨ ឆ្នាំរស់នៅខេត្តកំពង់ធំមានប្រពន្ធ និងមានកូនស្រីម្នាក់អាយុ ៣ ខែ រីឯជនរងគ្រោះជាឪពុកឈ្មោះ ស៊ិន ពៅ អាយុ ៥៥ ឆ្នាំរស់នៅក្នុងភូមិ-ឃុំកើតហេតុ ហើយត្រូវបានសមត្ថកិច្ចនគរបាលប៉ុស្តិ៍ឃុំបឹងព្រះចុះចាប់ខ្លួនបាននៅកន្លែងកើតហេតុ។
លោក សារុំ ថ្លែងថា៖ «ខ្ញុំសួរវាទៅវានិយាយមិនដឹងណាណីទេ វាមានសតិមិនគ្រប់ព្រោះតាមម្តាយចុងវានិយាយប្រាប់ខ្ញុំគឺវាកាប់ឪពុកវាដូចជាគ្មានរឿងអីទេ»។
លោកប្រាប់បន្តដោយយោងតាមសម្តីម្តាយចុងរបស់ជនសង្ស័យថា ជនសង្ស័យមានប្រពន្ធ និងមានកូនស្រីម្នាក់ និងរស់នៅខេត្តកំពង់ធំហើយរូបគេទើបទៅដល់ផ្ទះឪពុកកាលពីថ្ងៃទី ៨ មីនាគឺបាន ១ ថ្ងៃ ហើយមុនពេលកើតហេតុជនសង្ស័យបានជិះម៉ូតូ ១ គ្រឿងឌុបឪពុកជាជនរងគ្រោះទៅក្រុងបាវិត ខេត្តស្វាយរៀងផង។ លុះពេលជនសង្ស័យត្រឡប់មកដល់ផ្ទះវិញក៏បានទៅមើលល្ខោននៅយប់មុនពេលកើតហេតុផង។
លោក សារុំ បន្តថា ក្រោយពីជនសង្ស័យត្រឡប់មកពីមើលល្ខោនវិញបានដាំបបរសហូបជាមួយម្តាយចុង និងឪពុកដោយអង្គុយជជែកគ្នាលេងបណ្តើរហូបបបរសរបណ្តើររហូតដល់ម៉ោងជាង ១ រំលងអធ្រាត្រឈានចូលថ្ងៃទី ៩ មីនា ដែលនៅពេលនោះជនរងគ្រោះ និងប្រពន្ធរបស់គាត់បានដេកនៅលើគ្រែក្រោមផ្ទះ។ ខណៈឃើញឪពុកកំពុងដេកលង់លក់ស្រាប់តែជនសង្ស័យបានយកកាំបិតផ្កាក់ដែលជនរងគ្រោះដាក់នៅលើក្បាលដំណេកស្រាប់នោះកាប់ចំកញ្ចឹង ក ១ កាំបិត និងមួយកាំបិតទៀតចំស្មាខាងស្តាំបណ្តាលឲ្យជនរងគ្រោះដាច់ខ្យល់ស្លាប់ភ្លាមៗនៅកន្លែងកើតហេតុ។
លោកបន្តថា៖ «ជនសង្ស័យដូចជាមានសតិមិនគ្រប់ផង និយាយរួមទៅពេលខ្ញុំសួរគាត់គឺគាត់និយាយតែម្នាក់ឯងរវើរវាយស្តាប់គ្នាមិនបានផងទេ ម្តាយគាត់ថាឲ្យតែថ្ងៃសីលគឺវាមិនដឹងអីទេ»។
លោក យី ធឿន នាយនគរបាលប៉ុស្តិ៍ឃុំបឹងព្រះបានឲ្យដឹងបន្ថែមពីម្សិលមិញដែរថាជនរងគ្រោះមានប្រពន្ធ ៣ នាក់ដែលគាត់យកប្រពន្ធទី ១ បានកូន ២ នាក់ ប៉ុន្តែប្រពន្ធនោះបានស្លាប់ហើយជនរងគ្រោះបានយកប្រពន្ធទី ២ បានកូន ២ នាក់តែប្រពន្ធនោះបានស្លាប់ទៀត។ ក្រោយមកជនរងគ្រោះបានយកប្រពន្ធទី ៣ និងបានកូន ២ នាក់ដែរ តែជនសង្ស័យជាកូនរបស់ប្រពន្ធទី ២ ទេ។
ចំណែកជនសង្ស័យវិញមិនដែលរស់នៅជាមួយឪពុកម្តាយរបស់គេទេតាំងពីមានប្រពន្ធមកដោយគេទៅរស់នៅឯស្រុកកំណើតខាងប្រពន្ធនៅខេត្តកំពង់ធំដោយប្រកបរបរជាអ្នកស៊ីឈ្នួលបោកអ៊ុតខោអាវឲ្យគេ។ ពាក់ព័ន្ធនឹងជំងឺសរសៃប្រសាទនេះបើតាមការអះអាងរបស់ស្ត្រីជាម្តាយចុងប្រាប់ថា ជនសង្ស័យបានទៅពិនិត្យជំងឺនៅមន្ទីរពេទ្យមិត្តភាពខ្មែរ-សូវៀតហើយមន្ទីរពេទ្យបានបើកថ្នាំសរសៃប្រសាទឲ្យលេបផង។ ទន្ទឹមនឹងនេះខាងមន្ទីរពេទ្យបានចេញលិខិតបញ្ជាក់ថា គាត់មានជំងឺសរសៃប្រសាទដែរ។
លោកបន្តថា៖ «បើទោះជាគាត់ត្រូវអះអាងថា មានជំងឺសរសៃប្រសាទក្តី ប៉ុន្តែពាក់ព័ន្ធមនុស្សឃាត ដូច្នេះខ្ញុំត្រូវតែអនុវត្តទៅតាមច្បាប់ហើយ។ ចាំទៅតុលាការគិតយ៉ាងណានោះក៏ស្រេចតែច្បាប់ចុះ។ សាច់ញាតិគាត់ក៏ឲ្យចាត់ការតាមច្បាប់ដែរ»។
លោកថ្លែងថា ក្រោយកើតហេតុសមត្ថកិច្ចបានចុះដល់កន្លែងកើតហេតុដោយនៅខ្លួនជនសង្ស័យមានប្រឡាក់ឈាមពេញខ្លួន ហើយបានអង្គុយលុតជង្គង់សុំទោសជនរងគ្រោះ (ឪពុក)។ ចំណែកកាំបិតជាវត្ថុតាងក៏មានប្រឡាក់ឈាមនៅក្បែរជនសង្ស័យដែរ៕
