.jpg)
ភ្នំពេញៈ បណ្ឌិត្យសភានគរបាលកម្ពុជាសហការជាមួយអង្គការសម្ព័ន្ធសិទ្ធិកុមារកម្ពុជាក្រោមការឧបត្ថម្ភរបស់អង្គការភ្លែនអន្តរជាតិ បាននិងកំពុងពិនិត្យឡើងវិញនូវខ្លឹមសារសៀវភៅមគ្គុទ្ទេសក៍ស្តីពីនីតិវិធីនគរបាលយុត្តិធម៌ បែបកុមារមេត្រីដើម្បីឲ្យសៀវភៅមគ្គុទ្ទេសក៍នេះមានគុណភាពក្នុងការជួយការពារសិទ្ធិអនីតិជន។ នេះបើតាមលោក សុន ពេញ នាយកប្រតិបត្តិអង្គការសម្ព័ន្ធសិទ្ធិកុមារកម្ពុជាឲ្យដឹងពីម្សិលមិញ។
ការត្រួតពិនិត្យ និងធ្វើបច្ចុប្បន្នភាពឡើងវិញនេះធ្វើឡើងក្រោយពីអង្គការសម្ព័ន្ធសិទ្ធិកុមារកម្ពុជាបានសហការជាមួយបណ្ឌិត្យសភានគរបាលកម្ពុជាបង្កើត និងដាក់ឲ្យប្រើប្រាស់សៀវភៅមគ្គុទេ្ទសក៍ស្តីពីនីតិវិធីនគរបាលយុត្តិធម៌បែបកុមារមេត្រីឲ្យមានការពិនិត្យឡើងវិញនូវការអនុវត្តគន្លឹះសំខាន់ៗក្រោមការឧបត្ថម្ភរបស់អង្គការភ្លែនអន្តរជាតិ ដោយបានបង្កើត និងដាក់ឲ្យប្រើប្រាស់សៀវភៅមគ្គុទ្ទេសក៍នេះកាលពីខែកក្កដា ឆ្នាំ ២០១៧ ដែលសៀវភៅនេះឆ្លុះបញ្ចាំងអំពីគន្លឹះសំខាន់ៗ ដើម្បីបង្កើនការអនុវត្តនីតិវិធីនគរបាលយុត្តិធម៌បែបកុមារមេត្រី និងគុណភាពនៃការចូលរួមរបស់កុមារនៅគ្រប់ដំណាក់កាលនៃនីតិវិធីនគរបាលយុត្តិធម៌ដែលស្របនឹងច្បាប់ស្តីពីយុត្តិធម៌ អនីតិជន ក្រមព្រហ្មទណ្ឌ ក្រមនីតិវិធីព្រហ្មទណ្ឌព្រមទាំងច្បាប់ជាតិ និងអន្តរជាតិផ្សេងៗ។
លោក សុន ពេញ ប្រាប់ភ្នំពេញប៉ុស្តិ៍ម្សិលមិញថា៖ «ដោយសារតែយើងមើលឃើញថាសម្រាប់និន្នាការនៃការផ្លាស់ប្តូរនៃបទល្មើស និងដោយសារព័ត៌មានមួយចំនួនទៀត យើងត្រូវការធ្វើបច្ចុប្បន្នភាព ពីព្រោះកាលពីយើងធ្វើដំបូង យើងមិនទាន់បានគិតពីនិន្នាការបទល្មើសផ្សេងៗ ជាពិសេសបទល្មើសនៅក្នុង online និងបទល្មើស Cyber Crime ដូច្នេះយើងមានចំណុចមួយចំនួនដែលយើងត្រូវធ្វើបច្ចុប្បន្នភាពដើម្បីធ្វើម៉េចឲ្យសៀវភៅមគ្គុទ្ទេសក៍នេះមានគុណភាព និងឆ្លុះបញ្ចាំងពីតថភាពពិតៗ និងជាក់ស្តែង ហើយនគរបាលយុត្តិធម៌អាចយកទៅប្រើប្រាស់បាននៅក្នុងការរៀន និងបង្រៀនរបស់ខ្លួន»។
លោកបញ្ជាក់ថា៖ «ដោយសារយើងមើលឃើញថាការអន្តរាគមន៍ ឬក៏ដោះស្រាយករណីដែលពាក់ព័ន្ធនឹងអាទិភាពពិសេសកុមារដែលប្រព្រឹត្តខុសនឹងច្បាប់ពេលខ្លះមន្ត្រីយុត្តិធម៌អនុវត្តនីតិវិធីតែមួយដូចនឹងមនុស្សចាស់ដែរ»។
លោក សុន ពេញ បន្តថា៖ «ដូច្នេះហើយយើងចង់ជំរុញ និងលើកកម្ពស់ឲ្យមានការអនុវត្តនីតិវិធីនគរបាលកុមារមេត្រីនៅក្នុងការដោះស្រាយ ឬអន្តរាគមន៍នៅដំណាក់កាលនគរបាល ដូច្នេះយើងបានរៀបចំសៀវភៅមគ្គុទ្ទេសក៍មួយដែលមានការចងក្រងច្បាប់ជាតិ និងអន្តរជាតិ ជាពិសេសអនុសញ្ញាគោលការណ៍សំខាន់ៗស្តីពីសិទ្ធិកុមារ»។
លោកបន្ថែមថាសៀវភៅមគ្គុទ្ទេសក៍នេះផ្តល់ចំណេះដឹងអំពីកុមារក្នុងការអនុវត្តច្បាប់ជាតិ និងអន្តរជាតិនានាពាក់ព័ន្ធនឹងប្រព័ន្ធយុត្តិធម៌កុមារ និងហិង្សាលើកុមារដល់អ្នកពាក់ព័ន្ធទាំងអស់ ជាពិសេសនគរបាលយុត្តិធម៌ក្នុងការកសាងសមត្ថភាព និងឆន្ទៈដើម្បីជំរុញដល់ការអនុវត្តច្បាប់ និងជួយការពារសិទ្ធិអនីតិជន។
លោក Jan Jaap Kleinrensink នាយកអង្គការភ្លែនអន្ដរជាតិកម្ពុជាចាត់ទុកការពិនិត្យឡើងវិញនូវខ្លឹមសារសៀវភៅមគ្គុទ្ទេសក៍ស្តីពីនីតិវិធីនគរបាលយុត្តិធម៌បែបកុមារមេត្រី និងការបង្កើតសៀវភៅដៃសម្រាប់គ្រូស្តីពីនីតិវិធីនគរបាលយុត្តិធម៌បែបកុមារមេត្រី គឺជាការចាំបាច់ដើម្បីធ្វើការអន្តរាគមន៍ឲ្យកាន់តែមានប្រសិទ្ធភាព និងកាន់តែប្រសើរឡើងចំពោះការដែលកុមារជាជនល្មើស កុមារ ដែលជាជនរងគ្រោះកុមារដែលជាសាក្សី និងកុមារដែលត្រូវបានចោទ។
តាមរយៈអ្នកបកប្រែលោកថ្លែងថា៖ «សៀវភៅមគ្គុទ្ទេសក៍ស្តីពីនីតិវិធីនគរបាលយុត្តិធម៌បែបកុមារមេត្រីដែលបាននិងកំពុងតែអនុវត្តជាក់ស្តែង និងសៀវភៅមគ្គុទ្ទេសក៍សម្រាប់គ្រូមិនត្រឹមតែផ្តល់នូវប្រសិទ្ធភាពដោះស្រាយឧក្រិដ្ឋកម្មពាក់ព័ន្ធនឹងកុមារផ្សេងៗប៉ុណ្ណោះទេ ប៉ុន្តែថែមទាំងអាចឲ្យមន្ត្រីនគរបាលជាតិកម្ពុជាចូលរួមចំណែកយ៉ាងសំខាន់ដល់ការប្តេជ្ញាចិត្តរបស់រដ្ឋាភិបាលកម្ពុជាចំពោះអនុសញ្ញាអង្គការសហប្រជាជាតិស្តីពីសិទ្ធិកុមារនៅកម្ពុជាផងដែរ»។
លោកថាកុមារដែលហ៊ុមព័ទ្ធទៅដោយការធ្វេសប្រហែសគឺងាយរងគ្រោះណាស់ជាពិសេសកុមាររស់នៅក្នុងស្ថានភាពលំបាកធ្ងន់ធ្ងរហើយពួកគេងាយត្រូវបានបង្ខំឲ្យបំពានច្បាប់យ៉ាងធ្ងន់ធ្ងរដែលពួកគេទាំងនោះត្រូវការជំនួយផ្នែកច្បាប់ចាំបាច់ទោះបីជាពួកគេមិនដឹងថា ពួកគេបាននិងកំពុងប្រព្រឹត្តខុសនឹងច្បាប់ក៏ដោយ៕
