.jpg)
ទិដ្ឋភាពនៃការចតយានយន្តនៅចំណតរថយន្តក្នុងរាជធានីភ្នំពេញបច្ចុប្បន្ន។ ហេង ជីវ័ន
ភ្នំពេញៈ នគរបាលចរាចរណ៍រាជធានីភ្នំពេញបានព្រមានចាត់វិធានការតាមផ្លូវច្បាប់ ចំពោះការចតរថយន្ត និងមធ្យោបាយដឹកជញ្ជូនគ្រប់ប្រភេទដោយគ្មានសណ្ដាប់ធ្នាប់នៅតាមដងផ្លូវសាធារណៈ ពិសេសរថយន្តពាក់ស្លាកលេខ ន.ប ខ.ម និងរដ្ឋ ។ នេះបើតាមមន្ត្រីជាន់ខ្ពស់ម្នាក់នៃស្នងការដ្ឋាននគរបាលរាជធានីភ្នំពេញ។
លោក ចេវ ហាក់ ស្នងការរងរាជធានីភ្នំពេញទទួលបន្ទុកផ្នែកចរាចរណ៍បានប្រាប់ភ្នំពេញប៉ុស្តិ៍ពីម្សិលមិញថា តាមការកត់សម្គាល់កន្លងមកនេះការឈប់ចតយានជំនិះនៅតាមដងផ្លូវសាធារណៈគ្មានរបៀបរៀបរយ បានបង្កឲ្យស្ទះចរាចរណ៍ និងប៉ះពាល់យ៉ាងខ្លាំងដល់សោភណភាព និងសណ្ដាប់ធ្នាប់ក្នុងរាជធានីភ្នំពេញ។
លោកបានថ្លែងថា៖ «ចាប់ពីពេលនេះតទៅ គ្រប់មធ្យោបាយធ្វើដំណើរដែលឈប់ចតនៅលើដងផ្លូវសាធារណៈដោយគ្មានរបៀបរៀបរយ ពិសេសនៅទីតាំងដែលមានស្លាកសញ្ញាហាមឃាត់នឹងត្រូវស្ទូចយកមករក្សាទុកនៅស្នងការដ្ឋាននគរបាលរាជធានីភ្នំពេញដើម្បីផាកពិន័យតាមផ្លូវច្បាប់ដោយគ្មានការយោគយល់ទៀតឡើយ ពិសេសរថយន្តមានពាក់ស្លាកលេខ ន.ប ខ.ម និង រដ្ឋ»។
លោក ហាក់ ដែលកាលពីម្សិលមិញកំពុងឈរសម្រួលចរាចរណ៍បានប្រាប់ថា អ្នកបើកបររថយន្តដែលមានពាក់ស្លាកលេខទាំង ៣ ខាងលើនេះ គប្បីត្រូវធ្វើជាគំរូល្អដល់អ្នកបើកបរដទៃទៀតក្នុងការចូលរួមគោរព និងអនុវត្តច្បាប់ទាំងអស់គ្នា។
លោកបានបន្តថា ពេលនេះក្រុមមន្ត្រីនគរបាលចរាចរណ៍បានរៀបចំកម្លាំងចល័តចុះល្បាតដើម្បីរៀបចំសណ្ដាប់ធ្នាប់ចរាចរណ៍ និងស្ទូចអូសយានជំនិះគ្រប់ប្រភេទដែលចតរំលោភលើដងផ្លូវយកទៅផាកពិន័យតាមផ្លូវច្បាប់។
លោក គង់ រតនៈ នាយកស្ដីទីវិទ្យាស្ថានសុវត្ថិភាពចរាចរណ៍ផ្លូវគោកបានគាំទ្រចំពោះវិធានការខាងលើនេះដោយលោកបានរំពឹងថានឹងជួយជំរុញឲ្យអ្នកបើកបរយានយន្តទាំងអស់ គោរពច្បាប់ចរាចរណ៍ ខណៈកំណើនយានយន្ត និងមធ្យោបាយដឹកជញ្ជូនរួមទាំងដង់ស៊ីតេរបស់ប្រជាពលរដ្ឋនៅក្នុងរាជធានីភ្នំពេញមានការកើនឡើងគួរឲ្យកត់សម្គាល់។
លោកថ្លែងថា៖ «បច្ចុប្បន្នយើងសង្កេតឃើញបងប្អូនប្រជាពលរដ្ឋ មន្ត្រីរាជការ និងកងកម្លាំងមួយចំនួនបានចតរថយន្តយ៉ាងអនាធិបតេយ្យនៅលើដងផ្លូវសាធារណៈ ដែលបង្កការកកស្ទះចរាចរណ៍ និងខូចរបៀបរៀបរយសាធារណៈក្នុងទីក្រុង»។
ទោះជាបែបណាក្ដីលោកបានស្នើឲ្យអាជ្ញាធររាជធានីភ្នំពេញ និងស្ថាប័នពាក់ព័ន្ធសហការគ្នាបង្កើតទីតាំងចំណតសាធារណៈ ឬចំណតឯកជនឲ្យបានច្រើនដើម្បីឲ្យម្ចាស់យានយន្តចូលឈប់ចតប្រកបដោយសុវត្ថិភាពជាមួយគ្នានេះត្រូវកំណត់ចំនួនយានយន្តដោយធៀបទៅនឹងចំនួនពលរដ្ឋឲ្យបានច្បាស់លាស់ដើម្បីចៀសវាងការនាំចូលរថយន្តលើសពីតម្រូវការដែលនាំឲ្យកកស្ទះចរាចរណ៍៕
