ភ្នំពេញៈ ក្រសួងមហាផ្ទៃបានសម្រេចដកហូតឋានន្តរស័ក្ដិមន្ត្រីនគរបាលនៃស្នងការដ្ឋាននគរបាលរាជធានីភ្នំពេញចំនួន ២០ នាក់ និងបណ្ដេញចេញពីក្របខ័ណ្ឌនគរបាលជាតិ ដោយសារមូលហេតុពួកគេបានបោះបង់ចោលការងារ។ នេះបើតាមសេចក្ដីប្រកាសមួយរបស់ក្រសួងមហាផ្ទៃ ចុះងៃទី ១៧ ខែ មិថុនា ដែលចុះហត្ថលេខាដោយលោក ស ខេង រដ្ឋមន្ត្រីក្រសួងមហាផ្ទៃ។
សេចក្ដីប្រកាសដដែលនេះបានឲ្យដឹងថា ប្រាក់បៀវត្សរ៍ និងរបបឧបត្ថម្ភផ្សេងៗ របស់មន្ត្រីនគរបាលទាំង ២០ នាក់ ដែលមានឋានន្តរស័ក្ដិជាអនុសេនីយ៍ឯក អនុសេនីយ៍ទោ និងអនុសេនីយ៍ត្រី ត្រូវបានកាត់ផ្ដាច់ និងលុប ចេញពីក្របខ័ណ្ឌមន្ត្រីនគរបាលជាតិចាប់ពីខែ សីហា ឆ្នាំ ២០១៩ នេះតទៅ។
លោក ស ថេត ស្នងការនគរបាលរាជធានីភ្នំពេញមិនអាចទាក់ទងបានទេកាលពីម្សិលមិញ ដើម្បីសុំអត្ថាធិប្បាយលម្អិតអំពីមន្ត្រីទាំង ២០ នាក់នោះ។
លោក ឆាយ គឹមខឿន មន្ត្រីនាំពាក្យអគ្គស្នងការនគរបាលជាតិបានឲ្យដឹងកាលពីម្សិលមិញថា មិនមែនតែមន្ត្រីនគរបាលជាតិទេដែលត្រូវបណ្ដេញចេញពីក្របខ័ណ្ឌ ក្នុងនោះកន្លងមក មន្ត្រីរាជការស៊ីវិល និងកងយោធពលខេមរភូមិន្ទ ក៏ត្រូវបណ្ដេញចេញពីក្របខ័ណ្ឌដូចគ្នាជាបន្តបន្ទាប់ដែរ ប្រសិនបើពួកគេមិនបានគោរពតាមលក្ខខណ្ឌការងារ ឬវិន័យក្នុងនាមជាមន្ត្រីទេនោះ ហើយការបណ្ដេញមន្ត្រីនគរបាលទាំង ២០ នោះក៏មិនមែនជាករណី ទើបចាប់ផ្ដើមដែរ។
លោក គឹមខឿន ថ្លែងថា៖ «យើងអនុវត្តជាបន្តបន្ទាប់មកហើយ ប៉ុន្តែដោយសារការអនុវត្តកន្លងមកវាមានរូបភាពតូចតាច ដល់អ៊ីចឹងវាអត់ផ្អើលទេ ហើយដល់ពេល ២០ នាក់អ៊ីចឹងទៅ នាំគ្នាផ្អើល។ មិនមែនទើបធ្វើទេ ធ្វើរៀងរាល់ឆ្នាំ ធ្វើរាល់ខែហ្នឹ»។
លោក ឆាយ គឹមខឿន ថ្លែងថា មន្ត្រីនគរបាលដែលត្រូវបណ្ដេញកន្លងមក មានខ្លះបានបោះបង់ចោលការងារដោយខ្លួនឯង និងខ្លះទៀតដោយសារចង់បានតួនាទីជាមន្ត្រីនគរបាលដើម្បីប្រើប្រាស់ក្នុងការរកស៊ីរបស់ខ្លួន ដែលលោកថា មន្ត្រីប្រភេទនេះ តែងបង្កជាបញ្ហានៅក្នុងសង្គម និងនាំឱ្យមានការវាយប្រហារខូចឈ្មោះមកលើមន្ត្រីនគរបាលដែលត្រឹមត្រូវនិងខិតខំធ្វើការងារពិតប្រាកដ។ ទោះជាយ៉ាងណា លោក ឆាយ គឹមខឿន បានអះអាងផងដែរថាមិនមានតួលេខមន្ត្រីប៉ុន្មាននាក់ដែលធ្លាប់ត្រូវបានបណ្ដេញចេញនោះទេ។
លោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា (ANSA) បានអះអាងថា មូលហេតុនាំឲ្យមន្ត្រីនគរបាលខ្លះបោះបង់ចោលការងាររបស់ពួកគេរហូតមានការបណ្ដេញចេញពីក្របខ័ណ្ឌ អាចដោយសារមានការបាក់ទឹកចិត្ត នៅពេលពួកគេបានខិតខំប្រឹងធ្វើការងាររាប់ឆ្នាំ ប៉ុន្តែបែរជាមិនទទួលបានការលើកទឹកចិត្តតាមរយៈការដំឡើងឋានន្តរស័ក្តិឲ្យបានស្មើគ្នាក្នុងចំណោមមន្ត្រីនគរបាល។
លោក ជ័យ ថ្លែងថា មន្ត្រីទាំងនោះអាចសុខចិត្តបោះបង់ការងារជាមន្ត្រីរាជការដើម្បីទៅរកការងារអ្វីផ្សេងធ្វើវិញដែលពួកគេគិតថា អាចជួយគ្រួសារ របស់ពួកគេបានរឹតតែប្រសើរជាងមុន។
លោក ជ័យ ថ្លែងថា៖ «យើងនៅតែឮសូរមន្ត្រីមួយចំនួនគាត់ត្អូញត្អែរថា អ្នកខំធ្វើការពុំសូវទទួលបានការលើកទឹកចិត្តអីជាដើម វាមិនទាំងអស់ទេ ប៉ុន្តែគ្រាន់តែថា យើងមើលទៅលើទិដ្ឋភាពជារួម ប្រសិនបើមានប្រព័ន្ធមួយ រៀបចំ គ្រប់គ្រង និងវាយតម្លៃពីការដំឡើងឋានៈបុណ្យស័ក្ដិឲ្យបានល្អត្រឹមត្រូវ វាក៏ជាការលើកចិត្តមួយកុំឱ្យមានភាពអសកម្មដែរ»៕