The Phnom Penh Post Search

Search form




Logo of Phnom Penh Post newspaper Phnom Penh Post - នយោបាយ​ ឈ្នះ-ឈ្នះ​ ត្រូវ​បាន​ដាក់​ក្នុង​កម្មវិធីសិក្សា​សម្រាប់​យោធា

នយោបាយ​ ឈ្នះ-ឈ្នះ​ ត្រូវ​បាន​ដាក់​ក្នុង​កម្មវិធីសិក្សា​សម្រាប់​យោធា

Content image - Phnom Penh Post
បុរស​ ២​ ​នាក់​កំពុង​ដើរ​នៅ​មុខ​វិមាន ឈ្នះ-ឈ្នះ ដែល​ទើប​តែ​ត្រូវ​សាងសង់​រួច នៅក្នុង​សង្កាត់​ព្រែក​តាសេក ខណ្ឌ​ជ្រោយចង្វារ​ពី​ម្សិលមិញ​ដែល​គ្រោង​នឹង​បើកសម្ពោធ​ជា​ផ្លូវការ​នៅ​ថ្ងៃទី​ ២៩ ខែ​ធ្នូ ឆ្នាំ​ ២០១៨។ ហេង ជីវ័ន

នយោបាយ​ ឈ្នះ-ឈ្នះ​ ត្រូវ​បាន​ដាក់​ក្នុង​កម្មវិធីសិក្សា​សម្រាប់​យោធា

ភ្នំពេញៈ ប្រវត្តិ​តស៊ូ​រំដោះប្រទេស​ចេញ​ពី​របប​ខ្មែរក្រហម និង​នយោបាយ​ឈ្នះ ឈ្នះ ដែល​បាន​បញ្ចប់​សង្គ្រាម​ស៊ីវិល​ទាំងស្រុង ហើយ​នាំ​មក​នូវ​ស្ថិរភាព​នយោបាយ និង​សន្តិភាព​របស់​លោក​ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​ប្រធាន​គណបក្ស​ប្រជាជន​កម្ពុជា​ដែល​បាន​ចងក្រង​នៅ​ក្នុង​វិមាន​ឈ្នះ ឈ្នះ ត្រូវ​បាន​ដាក់​បញ្ចូល​ក្នុង​កម្មវិធីសិក្សា​របស់​កងយោធពល​ខេមរភូមិន្ទ ហើយ​គ្រោង​បញ្ចូល​ទៅ​ក្នុង​កម្មវិធីសិក្សា​របស់​ក្រសួង​អប់រំ​ផងដែរ​។

យោង​តាម​លោក ណឹម សុវត្ថិ អគ្គនាយក​នៃ​អគ្គនាយកដ្ឋាន​នយោបាយ និង​កិច្ចការបរទេស​នៃ​ក្រសួង​ការពារជាតិ និង​ជា​ប្រធាន​ក្រុម​ការងារ​សាងសង់​វិមាន​ឈ្នះឈ្នះ​បាន​អះអាង​កាលពី​ថ្ងៃ​អង្គារ​ទី​ ២៥ ខែ​ធ្នូ ឆ្នាំ​ ២០១៨​។

លោក ណឹម សុវត្ថិ បាន​សរសេរ​នៅក្នុង​ហ្វេសប៊ុក​របស់​លោក​ថា​៖ «(​វា​) ​មិន​ត្រឹម​តែ​ជា​ការ​លើក​យក​នូវ​ប្រវត្តិ និង​វីរភាព​ដ៏អស្ចារ្យ​របស់​សម្តេច​តេជោ​ទេ សំណង់​មួយ​នេះ​គឺជា​ការបំពេញ​នូវ​ចន្លោះ​ប្រហោង​នៃ​ទំព័រ​ប្រវត្តិសាស្ត្រ​ដើម្បី​ឲ្យ​យល់​ច្បាស់​ថែម​ទៅ​លើ​អ្វី​ដែល​ជា​សកម្មភាព និង​ការដឹកនាំ​របស់​សម្តេច​តេជោ ពីព្រោះ​ទៅ​ជាមួយ​នឹង​បញ្ហា​ទាំងអស់​នេះ​យើង​នឹង​បាន​ឃើញ​នូវ​ការរៀបរាប់​ពី​រឿងរ៉ាវ​ទាំងអស់​នូវ​ដំណាក់កាល​នីមួយៗ​ដែល​នឹង​ត្រូវ​មាន​ផង​ដែរ​នេះ​ជា​ចំណុច​សំខាន់​»​។

លោក សុវត្ថិ ថ្លែង​ថា​កម្មវិធីសិក្សា​នយោបាយ ឈ្នះ ឈ្នះ ខាង​អគ្គបញ្ជាការដ្ឋាន និង​ទីចាត់ការ​ហ្វឹកហ្វឺន​រួមទាំង​សាកលវិទ្យាល័យ​ការពារជាតិ​គឺ​បាន​រៀបចំ​កម្មវិធី​សម្រាប់​សិក្សា​ទៅក្នុង​កងទ័ព​វគ្គ​សិក្សា​នានា​គឺ​នឹង​មាន​រៀបចំ​សិក្សា​អំពី​អត្ថន័យ​យ៉ាង​ជ្រៅជ្រះ ពីព្រោះ​អត្ថន័យ​នៃ​ចំណុច​សំខាន់ៗ​ទាក់ទង​ជាមួយ​រឿង​យុទ្ធសាស្ត្រ​ទាក់ទង​ជាមួយ​ប្រតិបត្តិការ​ទាក់ទង​ជាមួយ​រឿងរ៉ាវ​ទាំងឡាយ​ដែល​នៅ​ក្នុង​ចង្កោម​របស់​មេរៀន​ខាង​យោធា​។

លោក សុវត្ថិ បន្ដ​ថា​៖ «​ដោយឡែក​នៅ​ខាង​កម្មវិធី​ប្រវត្តិសាស្ត្រ​ខាង​ផ្នែក​ក្រសួង​អប់រំ និង​សិក្សាធិការ ខ្ញុំ​ជឿជាក់​ថា​ក៏​មាន​ការគិតគូរ​អំពី​បញ្ហា​នេះ ដោយ​នឹង​ចែក​ទៅ​ជា​ដំណាក់កាល​តាម​កម្រិត​មធ្យម ឧត្តម យ៉ាង​ណា​ត្រូវ​រៀន​កម្រិត​ណា​ដ៏​មាន​សារៈសំខាន់​តែ​គឺជា​ភាពចាំបាច់​មួយ​ដ៏ល្អ​ដែល​ត្រូវ​តែ​ដាក់​​បញ្ចូល​ទៅក្នុង​កិច្ចការ​នេះ​ផង​ដែរ​»​។

តាមរយៈ​គេហទំព័រ​ហ្វេសប៊ុក​ផ្លូវការ​លោក​ ហ៊ុន សែន កាលពី​ថ្ងៃ​អង្គារ ម្សិលមិញ​បាន​សរសេរ​ពន្យល់​ឲ្យ​ដឹងថា វិមាន​ឈ្នះ​ឈ្នះ គឺជា​តំណាង​នៃ​ការបង្រួបបង្រួម​ជាតិ ឯករាជ្យ​ជាតិ សាមគ្គីភាព បូរណភាព​ទឹកដី វឌ្ឍនភាព និង​វិបុលភាព​នៃ​កម្ពុជា​ទាំងមូល​។ វិមាន​ឈ្នះ ឈ្នះ គឺ​បញ្ជាក់​ច្បាស់​ថា កម្ពុជា​បាន​រួបរួម​គ្នា​ជា​ធ្លុង​មួយ ឈ្នះ​រួច​ផុត​ពី​សង្គ្រាម ឈ្នះ​រួច​ផុត​ពី​របប​ប្រល័យ​ពូជសាសន៍ ឈ្នះ​រួច​ផុត​ពី​ការបែងចែក​ទឹកដី​តំបន់​ត្រួតត្រា ឈ្នះ​រួច​ផុត​ពី​ភាពក្រីក្រ និង​ឈ្នះ​រួច​ផុត​ពី​ការ​អុចអាល​ដោយ​បរទេស ដែល​ពេល​នេះ​កម្ពុជា​កំពុង​ដឹកនាំ​អនាគត​វាសនា​ប្រទេសជាតិ​ឆ្ពោះ​ទៅ​រក​ភាពរុងរឿង​នៅក្នុង​សន្តិភាព​ដ៏យូរអង្វែង​នេះ​តទៅ​។

Content image - Phnom Penh Post
មន្ត្រី​យោធា​ដើរកាត់​វិមាន​ឈ្នះ ឈ្នះ ស្ថិត​ក្នុង​ខណ្ឌ​ជ្រោយចង្វារ​។ ហេង ជីវ័ន

លោក​បាន​អំពាវនាវ​ដល់​បងប្អូន​ជន​រួម​ជាតិ និង​ភ្ញៀវទេសចរ​អន្តរជាតិ ​ចូលរួម​សម្ពោធ វិមាន​ឈ្នះ ឈ្នះ ដែល​នឹង​ប្រារព្ធ​ធ្វើ​នៅ​ថ្ងៃទី​ ២៩ ខែ​ធ្នូ ឆ្នាំ ២០១៨ (​រយៈពេល​ ៣ ​ថ្ងៃ​) នៅ​មហាវិថី​ឈ្នះ ឈ្នះ ទល់​មុខ​ពហុកីឡដ្ឋាន​ជាតិ​អូឡាំពិក​ថ្មី​នៅ​តំបន់​អភិវឌ្ឍន៍ លីយ៉ុងផាត់​។ វិមាន​ឈ្នះ ឈ្នះ គឺ​តំណាង​ឲ្យ​កម្ពុជា​មាន​សុខសន្តិភាព និង​ឈ្នះ​ជានិច្ច​និរន្តរ៍​។

គួររំឭក​ថា វិមាន​ឈ្នះ-ឈ្នះ បាន​ចាប់ផ្ដើម​សាងសង់​ឡើង​កាលពី​ខែ​កុម្ភៈ ឆ្នាំ​ ២០១៦ លើ​ទំហំ​ដី ៨ ​ហិកតា​ស្ថិត​នៅ​សង្កាត់​ព្រែកតាសេក ខណ្ឌ​ជ្រោយចង្វារ រាជធានី-ភ្នំពេញ​ហើយ​នឹង​ត្រូវ​សម្ពោធ​ជា​ផ្លូវការ​ចំនួន​ ៣ ​ថ្ងៃ​គឺ​ចាប់ពី​ថ្ងៃទី​ ២៩ ដល់​ថ្ងៃទី​ ៣១ ខែ​ធ្នូ នេះ​។

លោក​ រស់ សុវាចា អ្នកនាំពាក្យ​ក្រសួង​អប់រំ យុវជន និង​កីឡា​បាន​ថ្លែង​ថា នៅក្នុង​កំណែទម្រង់ ៥ ​ឆ្នាំ​បន្ដ​ទៅ​ទៀត​ឆ្នាំ ២០១៩-២០២៣ កម្មវិធីសិក្សា​គឺជា​អាទិភាព​មួយ​របស់​ក្រសួង ដើម្បី​ជួយ​ពង្រឹង​ទៅក្នុង​ការរៀន និង​ការបង្រៀន​។

លោក សុវាចា ថ្លែង​ថា​៖ «​កន្លែង​ប្រវត្ដិសាស្ដ្រ​ដូចជា វិមាន​ឈ្នះ ឈ្នះ គឺមាន​អត្ថន័យ​ជ្រាលជ្រៅ​ណាស់​ចំពោះ​ការពង្រឹង​ស្មារតី​នៅក្នុង​ជំនាញ​រឹង​ក៏​ដូចជា​ជំនាញ​ទន់​របស់​សិស្សានុសិស្ស​របស់​យើង​ដែរ​»​។

លោក សន ជ័យ នាយកប្រតិបត្ដិ​អង្គការ​សម្ព័ន្ធ​គណនេយ្យភាព​សង្គម​កម្ពុជា អះអាង​ថា​កម្មវិធីសិក្សា​នៅក្នុង​វិស័យ​អប់រំ​កម្ពុជា​មាន​ច្រើន ប៉ុន្ដែ​កម្មវិធី​សិក្សា​មួយ​ចំនួន​ដូចជា​ប្រវត្ដិសាស្ដ្រ​ជាដើម​នៅ​មិន​ទាន់​បង្ហាញ​ការពិត​បាន​ច្រើន​ទេ​។

លោក​បន្ដ​ថា​៖ «​យើង​ស្វាគមន៍​រាល់​ការ​ដែល​ចង់​ឲ្យ​អ្នក​ជំនាន់ក្រោយ​ចេះ​ដឹង​ក្នុង​ការ​អភិវឌ្ឍ​មនុស្ស​។ អ៊ីចឹង​អ្វី​ក៏ដោយ​ឲ្យ​តែ​ជា​ការ​រួមចំណែក​ដល់​ការអភិវឌ្ឍ​មនុស្ស​វា​មិនមែន​អ្វី​អាក្រក់​នោះ​ទេ​»៕

អត្ថបទគួរចាប់អារម្មណ៍