.jpg)
នាយកក្រុមហ៊ុនដែលជនសង្ស័យស៊ីដាច់លុយចិន។ រូបថត សហការី
ភ្នំពេញៈ អ្នកនាំពាក្យសាលាដំបូងរាជធានីភ្នំពេញ បានប្រាប់ឲ្យដឹងនៅថ្ងៃទី ២៨ ខែមករា ថា នាយកគ្រប់គ្រងក្រុមហ៊ុនហ្គោលវែល ត្រូវបានតុលាការរាជធានីភ្នំពេញ សម្រេចឃុំខ្លួនជាបណ្ដោះអាសន្នក្នុងពន្ធនាគារព្រៃស ដោយចោទប្រកាន់ពីបទ«រំលោភលើទំនុកចិត្តពិសេសដោយអភិបាល»។
លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញបានប្រាប់ ភ្នំពេញ ប៉ុស្តិ៍ថា ជនជាប់ចោទឈ្មោះ ស៊ិន ដាវុធ អាយុ ៤៦ ឆ្នាំ មានទីលំនៅភូមិបឹងឈូកសង្កាត់គីឡូម៉ែតលេខ ៦ ខណ្ឌឫស្សីកែវ រាជធានីភ្នំពេញ មានតួនាទីជានាយកគ្រប់គ្រងទូទៅនៅក្រុមហ៊ុនហ្គោលវែល (Gold Well)។
ជនសង្ស័យត្រូវបានកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃចាប់ឃាត់ខ្លួននៅព្រឹកថ្ងៃទី ២៧ ខែ មករា ឆ្នាំ ២០២១ តាមបណ្ដឹងចោទប្រកាន់ពីជនជាតិចិន ៣ នាក់ ជុំវិញករណីស៊ីដាច់លុយរត់ការច្បាប់ឲ្យពួកគេចូលសញ្ជាតិកម្ពុជា ចំនួន ៧៦ ម៉ឺនដុល្លារអាមេរិក។
លោក គឹមឡុង បានបញ្ជាក់ថា ក្រោយបញ្ចប់ការស៊ើបសួរចម្លើយ ជនសង្ស័យត្រូវបានតុលាការសម្រេចចោទប្រកាន់ពីបទ «រំលោភលើទំនុកចិត្តពិសេសដោយអភិបាល» តាមបញ្ញតិមាត្រា ៣៩៣ នៃក្រមព្រហ្មទណ្ឌ និងបានបង្គាប់ឲ្យមន្ត្រីនគរបាលយុត្តិធម៌នាំយកទៅឃុំខ្លួនជាបណ្ដោះអាសន្នក្នុងពន្ធនាគារព្រៃស ដើម្បីរង់ចាំការជំនុំជំរះទោសនៅពេលក្រោយ។
យោងតាមមាត្រានៃច្បាប់ខាងលើនេះ ជនត្រូវចោទនឹងត្រូវប្រឈមការផ្ដន្ទាទោសជាប់ពន្ធនាគារពី ២ ឆ្នាំ ទៅ ៥ ឆ្នាំ និងពិន័យជាប្រាក់ពី ៤ លានរៀល ទៅ ១០ លានរៀល។
ជុំវិញករណីនេះផងដែរ លោក ប៉ុល រតនា អនុប្រធាននាយកដ្ឋានព្រហ្មទណ្ឌក្រសួងមហាផ្ទៃបានប្រាប់ ភ្នំពេញ ប៉ុស្តិ៍ ថា តាមរយៈបណ្ដឹងរបស់ជនរងគ្រោះឈ្មោះ Chan kamfung Jane ជាថៅកែក្រុមហ៊ុន Gold Well ក្នុងអំឡុងខែសីហា ឆ្នាំ ២០១៩ គាត់បានពឹងពាក់ ឈ្មោះ ស៊ិន ដាវុធ ដែលមានតួនាទីជានាយកគ្រប់គ្រងទូទៅនៅក្នុងក្រុមហ៊ុនរបស់គាត់ ឲ្យជួយរត់ការដាក់ពាក្យសុំចូលសញ្ជាតិខ្មែរអោយបុរស-ស្ត្រីជនជាតិចិន ៣ នាក់ រួមមានឈ្មោះ Yam tak Chung, Lam Lai និងឈ្មោះ Qin zhewei ដែលពួកគេទាំង ៣ នាក់ ជាក្រុមប្រឹក្សាភិបាលក្រុមហ៊ុន Gold Well។
នៅពេលនោះ ដាវុធ បានតម្រូវឲ្យគាត់ប្រគល់ប្រាក់ចំនួន ៧៦ ម៉ឺនដុល្លារ ដើម្បីរត់ការដោយសន្យាក្នុងរយៈពេល ៩០ ថ្ងៃ ទើបទទួលបានលទ្ធផល ហើយគាត់ក៏បានយល់ព្រមតាមសំណើររបស់ ដាវុធ ដោយបានប្រគល់សែក ១០ សន្លឹក របស់ធនាគារសហពាណិជ្ជ .ក .អ មានលុយសរុបចំនួន ៧៦ ម៉ឺនដុល្លារ ទៅឲ្យ ដាវុធ ដើម្បីធ្វើកិច្ចការនោះ។
លោក រតនា បានបន្តថា ក្នុងបណ្ដឹងនោះ លោក Chan kamfung Jane បានបញ្ជាក់ថា៖ «ប៉ុន្តែ ដាវុធ បានយកលុយទាំងនោះទៅប្រើប្រាស់ជាប្រយោជន៍ផ្ទាល់ខ្លួនរបស់គាត់ ដោយមិនខ្វល់ពីកិច្ចការដែលគាត់បានព្រមព្រៀងជាមួយយើងខ្ញុំនោះទេ»។
តាមរយៈពាក្យបណ្ដឹងនោះ នៅថ្ងៃទី ២៧ ខែ មីនា ឆ្នាំ ២០២០ ដាវុធ បានប្រាប់ដល់ថៅកែគាត់ថា គាត់មិនអាចធ្វើកិច្ចការនោះបានទេ និងសន្យាថា នឹងសងលុយទាំងអស់ដល់ថៅកែគាត់វិញ។ ប៉ុន្តែនៅព្រឹកថ្ងៃទី ២៧ ខែ មករា ឆ្នាំ២០២១ បន្ទាប់ពីពិនិត្យឃើញថា ដាវុធ គ្មានលទ្ធភាពសងប្រាក់ ថៅកែរបស់គាត់ក៏បានសម្រេចដាក់ពាក្យប្ដឹងទៅមន្ត្រីនគរបាលជំនាញនៃនាយកដ្ឋានព្រហ្មទណ្ឌក្រសួងមហាផ្ទៃ ដើម្បីចំណាត់ការទៅតាមនីតិវិធីច្បាប់៕
