.jpg)
ការដុតសំរាមចោលដែលជាដើមហេតុបង្កឲ្យកើតមានគ្រោះអគ្គិភ័យ។ រូបថត សហការី
ភ្នំពេញៈ បន្ទាប់ពីមានគ្រោះអគ្គិភ័យកើតឡើងជាបន្តបន្ទាប់នាប៉ុន្មានថ្ងៃជាប់ៗគ្នានេះ លោក នេត វន្ថា ប្រធាននាយកដ្ឋានបង្ការ និងពន្លត់អគ្គិភ័យនៃអគ្គស្នងការដ្ឋាននគរបាលជាតិបានជំរុញឲ្យគ្រប់អង្គភាពកងពន្លត់អគ្គិភ័យ រាជធានី-ខេត្តបង្កើនការយកចិត្តទុកដាក់ ចុះអប់រំផ្សព្វផ្សាយអំពីវិធានការបង្ការទប់ស្កាត់គ្រោះអគ្គិភ័យដល់ប្រជាពលរដ្ឋដល់ថ្នាក់មូលដ្ឋាន ដើម្បីឲ្យពួកគាត់មានការយល់ដឹង និងចូលរួមបង្ការទប់ស្កាត់គ្រោះអគ្គិភ័យដែលអាចកើតឡើងជាយថាហេតុ។
លោក វន្ថា បាននិយាយកាលពីថ្ងៃចន្ទថា គ្រាន់តែក្នុងរយៈពេល ៣ ថ្ងៃគឺពីថ្ងៃទី ១៤ ដល់ ថ្ងៃទី ១៦ ខែកុម្ភៈ ឆ្នាំ ២០២០ មានករណីភ្លើងឆេះផ្ទះ និង ភ្លើងឆេះព្រៃកើតឡើងចំនួន ១០ ករណីនៅក្នុងរាជធានី-ខេត្តចំនួន ៥ រួមមានរាជធានីភ្នំពេញ កំពង់ស្ពឺ តាកែវ កំពត សៀមរាប និងកំពង់ធំ ដែលសរុបការខូចខាតអស់ផ្ទះជាង ២០ ខ្នង និងទ្រព្យសម្បត្តិគិតជាប្រាក់អស់រាប់សិបម៉ឺនដុល្លារ។
លោកនិយាយទៀតថា គ្រោះអគ្គិភ័យទាំងអស់ដែលបានកើតឡើង នាពេលកន្លងមកនេះភាគច្រើនបណ្ដាលមកពីការធ្វេសប្រហែសរបស់ប្រជាពលរដ្ឋនៅតាមមូលដ្ឋានដែលមិនបានយកចិត្តទុកដាក់ក្នុងការត្រួតពិនិត្យ និងផ្លាស់ប្ដូរប្រព័ន្ធខ្សែបណ្ដាញអគ្គិសនី ទុយោហ្គាស ដែលមានសភាពចាស់ទ្រុឌទ្រោម ដាច់រលាត់ និងលេចធ្លាយដោយកន្លែង បន្ទាប់ពីមានការប្រើប្រាស់យូរឆ្នាំ។ ម្យ៉ាងទៀតការបោះចោលកន្ទុយបារី ឬប្រភពភ្លើងពាសវាលពាសកាល នៅតែបន្តកើតមានក្នុងតំបន់ដាច់ស្រយាលមួយចំនួនដែលការបោះចោលប្រភពភ្លើង ដោយឥតសណ្ដាប់ធ្នាប់នារដូវប្រាំងបែបនេះ បង្កឲ្យមានភ្លើងឆេះព្រៃ និងរាលដាលឆេះដល់ផ្ទះអ្នកដទៃក្នុងភូមិមួយចំនួនផងដែរ។
លោក វន្ថា បញ្ជាក់ថា៖ «កន្លងមកមន្ត្រីជំនាញផ្នែកបង្ការ និងពន្លត់អគ្គិភ័យ បានចុះអប់រំផ្សព្វផ្សាយអំពីវិធានការការពារ និង ទប់ស្កាត់គ្រោះអគ្គិភ័យដល់ថ្នាក់មូលដ្ឋានមួយចំនួនដែរ ប៉ុន្តែការយល់ដឹង និងការចូលរួមរបស់ប្រជាពលរដ្ឋយើងនៅមានកម្រិត ដូច្នេះយើងចាំបាច់ត្រូវចុះអប់រំផ្សព្វផ្សាយបន្ថែមទៀតដល់ពួកគាត់ ដើម្បីឲ្យពួកគាត់មានការយល់ដឹង និងចូលរួមបង្ការទប់ស្កាត់គ្រោះអគ្គិភ័យឲ្យកាន់តែមានប្រសិទ្ធភាព»។
លោក វន្ថា បាន បន្ថែមថា តាមការកត់សម្គាល់នាពេលកន្លងមកប្រជាពលរដ្ឋនៅតាមមូលដ្ឋាន មិនថានៅតាមទីប្រជុំជនរាជធានី ខេត្ត ឬតំបន់ដាច់ស្រយាលនោះទេនៅពេលមានអគ្គិភ័យកើតឡើង អ្នកភូមិ ឬម្ចាស់ផ្ទះ នៅតែប្រកាន់ទស្សនៈស្ដាយនេះស្ដាយនោះមិនហ៊ាន កាត់ផ្ដាច់ ឬវាយកម្ទេចផ្នែកណាមួយនៃផ្ទះ ឬអគាររបស់ខ្លួនចោល ដើម្បីការពារការឆេះឆ្លងរាលដាលទៅដល់ផ្ទះអ្នកដទៃនោះទេ។
លោកបានបន្តថា ប្រជាពលរដ្ឋមួយចំនួនបានសម្រេចចិត្តទិញឧបករណ៍បំពង់បង្ការពន្លត់អគ្គិភ័យមកប្រើប្រាស់ជាលក្ខណៈគ្រួសារដែរ ប៉ុន្តែដោយសារស្ថានភាពហិរញ្ញវត្ថុនៅក្នុងគ្រួសាររបស់គាត់មានកម្រិត ដូច្នេះពួកគាត់មិនហ៊ានចំណាយលុយ ទិញផលិតផលដែលផលិតចេញពីក្រុមហ៊ុនដែលមានស្ដង់ដាទទួលស្គាល់ជាអន្តរជាតិមកប្រើប្រាស់នោះទេ។ ការប្រើប្រាស់ បំពង់បង្ការ និងពន្លត់អគ្គិភ័យដែលគ្មានគុណភាព មិនគ្រាន់តែបង់ខាតលុយឥតប្រយោជន៍ក្នុងការទិញវានោះទេ តែថែមទាំងនាំឲ្យចង្អៀតផ្ទះ ព្រមទាំងមិនអាចយកទៅប្រើការជាប្រយោជន៍អ្វីបានឡើយ។
ជុំវិញករណីនេះលោក អ៊ុក កុសល ស្នងការនគរបាលខេត្តកំពង់ធំបានប្រាប់ភ្នំពេញប៉ុស្តិ៍កាលពីថ្ងៃចន្ទថា ចាប់ពីថ្ងៃទី ២២ ដល់ថ្ងៃទី ២៧ ខែកុម្ភៈ ខាងមុខនេះ ខេត្តរបស់លោកនឹងមានការរៀបចំយុទ្ធនាការអប់រំផ្សព្វផ្សាយពីវិធានការបង្ការទប់ស្កាត់គ្រោះអគ្គិភ័យដល់ប្រជាពលរដ្ឋតាមបណ្ដាស្រុកនានាក្នុងខេត្តកំពង់ធំដែលក្នុងនោះ មន្ត្រីជំនាញនឹងមានការបង្ហាញពីបច្ចេកទេសមួយចំនួនក្នុងការពន្លត់ភ្លើងដែលកំពុងឆាបឆេះ ដើម្បីឲ្យពលរដ្ឋយកទៅប្រើប្រាស់ជួយគ្នាពេលមានគ្រោះអគ្គិភ័យកើតឡើង។
លោក កុសល បានថ្លែងថា៖ «ជាការពិត ប្រជាពលរដ្ឋយើងភាគច្រើនមិនបានយល់អំពីបច្ចេកទេស ពន្លត់ភ្លើងនោះទេ ពួកគាត់ភាគច្រើនបាត់បង់ភាពម្ចាស់ការ នៅពេលឃើញអណ្ដាតភ្លើងឆាបឆេះកាន់តែខ្លាំង»។
លោក កុសល បានលើកឡើងថា ពាក្យចាស់បានពោលតៗគ្នាថា ស៊ូឲ្យលិចទូកកណ្ដាលទន្លេ កុំឲ្យភ្លើងឆេះផ្ទះ ព្រោះលិចទូកកណ្ដាលទន្លេ វាបង់ខាតតិចតួចប៉ុណ្ណោះ ប៉ុន្តែបើភ្លើងឆេះផ្ទះ គឺបង្កឲ្យមានខាតបង់ទ្រព្យសម្បត្តិទាំងអស់ហើយមនុស្សមួយគ្រួសារយ៉ាងតិចត្រូវប្រឈមនឹងភាពស្រេកឃ្លាន និងគ្មានទីជម្រក៕
