ភ្នំពេញៈ នាយកដ្ឋានប្រយុទ្ធនឹងជំងឺឆ្លង CDC នៃក្រសួងសុខាភិបាលចេញវីដេអូខ្លីបង្ហាញពីផលប៉ះពាល់នៃការជក់បារីដែលអាចប្រឈមខ្លាំងនឹងការឆ្លងជំងឺកូវីដ ១៩ ខណៈអង្គការចលនាដើម្បីសុខភាពកម្ពុជាព្រមានពីការប្រើប្រាស់បារីអេឡិចត្រូនិក (Vape) ក៏ប្រឈមនឹងការឆ្លងនូវជំងឺនេះផងដែរ ដែលទាមទារឲ្យមានវិធានការជាក់លាក់។
តាមរយៈវីដេអូអប់រំខ្លី បង្ហោះនៅលើទំព័រហ្វេសប៊ុករបស់នាយកដ្ឋានប្រយុទ្ធនឹងជំងឺឆ្លង CDC កាលពីចុងសប្តាហ៍មុនបានឲ្យដឹងថា ការជក់ថ្នាំ ជក់បារី បានធ្វើឲ្យប៉ះពាល់ និងបំផ្លាញសួត និងផ្នែកផ្សេងៗទៀតនៃរាងកាយរបស់យើង។ បន្ថែមពីនេះការជក់ថ្នាំជក់បារីក៏បង្កើនការប្រឈមទៅនឹងជំងឺឆ្លងជំងឺកូវីដ ១៩ ធ្ងន់ធ្ងរផងដែរ។
ស្ថាប័ននេះបានអះអាងថា មានតែការផ្តាច់បារីនោះទេដែលជួយឲ្យអ្នក និងក្រុមគ្រួសារចៀសផុសពីជំងឺឆ្លងផ្សេងៗបាន ខណៈអ្នកជក់បារីប្រឈមការឆ្លងខ្លាំងជាងអ្នកមិនជក់។CDC បញ្ជាក់ថាៈ «វាគឺជាការត្រឹមត្រូវបើអ្នកសម្រេចចិត្តដើម្បីឈប់ជក់បារីពីពេលនេះតទៅ។
ឈប់ជក់បារីធ្វើឲ្យសុខភាពសួតកើនឡើង ៣០ ភាគរយក្នុងរយៈពេលប្រមាណ ២ ទៅ ៣ សប្តាហ៍បន្ទាប់ពីឈប់ជក់»។
លោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល មិនអាចសុំការអត្ថាធិប្បាយបន្ថែមជុំវិញបញ្ហានេះបានទេកាលពីម្សិលមិញ ដោយសារទូរស័ព្ទរបស់លោកមិនមានអ្នកទទួល។
អង្គការចលនា ដើម្បីសុខភាពកម្ពុជាកាលពីថ្ងៃចន្ទបានលើកឡើងក្នុងសេចក្ដីប្រកាសព័ត៌មានស្តីពីសិស្សសាលាប្រឈមនឹងការឆ្លងកូវីដ១៩ និងជំងឺផ្សេងៗដោយសារការជក់បារីអេឡិចត្រូនិក (Vape) ថាមានការប្រើប្រាស់បារីអេឡិចត្រូនិក (Vape) ជាច្រើនក្នុងចំណោមយុវជនវ័យក្មេង ជាពិសេសសិស្សសាលា ហើយការប្រើប្រាស់បារីអេឡិចត្រូនិកនេះពួកគេតែងតែធ្វើជាក្រុម។
អង្គការចលនាដើម្បីសុខភាពកម្ពុជាបានសង្កេតឃើញថា ការប្រើប្រាស់ឧបករណ៍ជក់រួមគ្នាបែបនេះ ប្រឈមខ្លាំងនឹងការឆ្លងកូវីដ១៩ ពីមនុស្សម្នាក់ទៅម្នាក់ទៀតព្រមទាំងអាចលើកទឹកចិត្ត និងងាយជំរុញឲ្យពួកគេឈានទៅប្រើគ្រឿងញៀនផ្សេងៗទៀត។
អង្គការនេះបានបញ្ជាក់ថា៖ «ដោយសារតែការប្រើប្រាស់បារីអេឡិចត្រូនិក (Vape) បង្កឲ្យគ្រោះថ្នាក់ធ្ងន់ធ្ងរដល់សួត ប្រសិនបើអ្នកប្រើប្រាស់បារីអេឡិចត្រូនិកឆ្លងជំងឺកូវីដ១៩ គាត់នឹងប្រឈមនឹងគ្រោះថ្នាក់កាន់តែខ្ពស់។ ក្រោមហេតុផលនេះ អាជ្ញាធរមានសមត្ថកិច្ចគួរតែរឹតបន្តឹងវិធានការហាមឃាត់ការលក់ និងការប្រើប្រាស់បារីអេឡិចត្រូនិកឲ្យបានហ្មត់ចត់ ដើម្បីទប់ស្កាត់ការរីករាលដាលកូវីដ១៩ និងជំងឺផ្សេងៗ ជាពិសេសក្នុងចំណោមសិស្សសាលាវ័យក្មេង»។
បារីអេឡិចត្រូនិក និង Sisha ត្រូវបានអាជ្ញាធរជាតិប្រយុទ្ធប្រឆាំងគ្រឿងញៀន ហាមលក់ និងមិនឲ្យមានការប្រើប្រាស់ឡើយ ក៏ប៉ុន្តែអង្គការចលនាដើម្បីសុខភាពកម្ពុជាបានលើកឡើងថា ទោះជាមានបម្រាមបែបនេះក្តី ក៏នៅតែមានការផ្សព្វផ្សាយលក់បារីអេឡិចត្រូនិក (Vape) នៅលើបណ្ដាញសង្គមជាច្រើន ដោយប្រើឈ្មោះថា ម៉ាស៊ីនផ្ដាច់បារី។
តាមសេចក្តីណែនាំរបស់រដ្ឋាភិបាលក្នុងការចាត់វិធានការបង្ការ និងបញ្ឈប់ការប្រើប្រាស់ការធ្វើអាជីវកម្ម និងនាំចូលផលិតផលស៊ីហ្សា និងបារីអេឡិចត្រូនិកបានឲ្យដឹងថា ផលិតផលទាំងនេះមិនមានផ្ទុកធាតុញៀនដែលត្រូវបានហាមដោយច្បាប់កម្ពុជាទេ ប៉ុន្តែវាមានផ្ទុកនូវសារធាតុនីកូទីនសំយោគកម្រិតខ្ពស់ ដែលបង្កផលប៉ះពាល់ដល់សុខភាពធ្ងន់ធ្ងរជាងបារី។ ដូច្នេះសេចក្តីណែនាំនេះបានផ្តល់សិទ្ធិឲ្យសមត្ថកិច្ចបញ្ឈប់ការប្រើប្រាស់ និងធ្វើអាជីវកម្មគ្រប់រូបភាព ប៉ុន្តែមិនមានបញ្ញត្តិពីការដាក់ទោសក្រៅតែពីការដកហូត និងហាមឃាត់នូវសារធាតុទាំងនោះនោះទេ។
លោក មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនបានប្រាប់ភ្នំពេញប៉ុស្តិ៍កាលពីម្សិលមិញថា ប្រភេទបារីអេឡិចត្រូនិកមិនមានការអនុញ្ញាតឲ្យនាំចូលមកកម្ពុជាទេ ប៉ុន្តែលោកថា ការមានចរាចរណ៍ និងប្រើប្រាស់បែបនេះ គឺធ្វើឡើងតាមរូបភាពលួចលាក់ និងខុសច្បាប់ ខណៈសមត្ថកិច្ចពាក់ព័ន្ធតែងរួមគ្នាចាត់វិធានការ។
លោកបញ្ជាក់ថា៖ «ការលើកឡើងទាំងនេះគឺក្តីព្រួយបារម្ភមួយសមហេតុសមផលដែលការប្រើប្រាស់នូវថ្នាំជក់ទាំងនេះ វាធ្វើឲ្យប៉ះពាល់ខ្លាំងដល់សុខភាព។ យើងបានដាក់ចេញនូវការទប់ស្កាត់រួចហើយនូវការចរាចរណ៍ ការជួញដូរនូវបារីអេឡិចត្រូនិកនេះ ហើយជាលទ្ធផលថ្នាំជក់គ្រប់ប្រភេទរួមទាំងបារី ក៏ទទួលបានការអនុញ្ញាតក្នុងការសហការគ្នារឹតត្បិត ការចែកចាយ ផ្សព្វផ្សាយ និងការជក់»៕