ភ្នំពេញៈ អគ្គនាយកដ្ឋានពន្ធនាគារនៃក្រសួងមហាផ្ទៃទទួលបានជំនួយពីប្រទេសជប៉ុន ជាសម្ភារការពារកូវីដ ១៩ តាមរយៈការិយាល័យអង្គការសហប្រជាជាតិស្ដីពីគ្រឿងញៀន និងឧក្រិដ្ឋកម្ម UNODC កាលពីថ្ងៃទី ២២ ធ្នូ ប៉ុន្តែមិនទាន់សម្រេចចែកទៅអ្នកជាប់ឃុំនៅឡើយ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារបានប្រាប់ឱ្យដឹងពីថ្ងៃទី ២៣ ធ្នូ ថា សម្ភារដែលទទួលបានរួមមានម៉ាស់ សាប៊ូលាងចាន សាប៊ូដុសខ្លួន និងម៉ាស៊ីនភ្លើងចំនួន ៣ គ្រឿង។
លោកថ្លែងថា៖ «ជំនួយឧបត្ថម្ភសម្ភារអនាម័យនេះមានមួយចំណែកមកពីរាជរដ្ឋាភិបាលជប៉ុន តាមរយៈ UNODC ដែលយើងគ្រោងសម្រាប់ជនជាប់ឃុំ ៣ ៣៣៥ នាក់ដែលកាលនៅមានបញ្ហាទឹកជំនន់នៅ ម២ និងនៅបន្ទាយមានជ័យ។ យើងត្រៀមអីវ៉ាន់អស់ហ្នឹងសម្រាប់គាត់ ប៉ុន្តែដោយសារឥឡូវវាអស់ទឹកជំនន់ហើយ អ៊ីចឹងសម្ភារនេះកំពុងពិចារណាបែងចែកថ្មីថាតើត្រូវបែងចែកជនជាប់ឃុំណាខ្លះ?»។
លោកស្រី ផូលីន ថាមេស៊ីស អ្នកសម្របសម្រួលរបស់អង្គការសហប្រជាជាតិប្រចាំកម្ពុជាបានថ្លែងប្រាប់តាមអ៊ីមែលកាលពីថ្ងៃទី ២៣ ធ្នូ ថា អង្គការសហប្រជាជាតិប្រចាំកម្ពុជាបានផ្ដល់ការគាំទ្រដល់ប្រព័ន្ធ ពន្ធនាគារកម្ពុជាអស់រយៈពេលជាង ២០ ឆ្នាំមកហើយ តាមរយៈភ្នាក់ងារជាច្រើន និងគ្របដណ្ដប់លើផ្នែកនានា។ ការគាំទ្រទាំងនោះរួមមានការអភិវឌ្ឍ ផ្នែកច្បាប់ និងគោលនយោបាយ សម្ភារ ជំនាញប្រព័ន្ធពន្ធនាគារ និងការបណ្ដុះបណ្ដាល និងការតស៊ូមតិលើការឃ្លាំមើលពន្ធនាគារ»។
លោកស្រីថ្លែងថា ក្រុមការងារអង្គការសហប្រជាជាតិបានជួបជាមួយអគ្គនាយកដ្ឋានពន្ធនាគារ និងបានធ្វើទស្សនកិច្ចទៅពន្ធនាគាក្នុងទីក្រុងភ្នំពេញ ដែលរងការប៉ះពាល់ពីទឹកជំនន់កាលពីខែតុលា។ ជំនួយពី UNODC ដែលត្រូវបានប្រគល់ទៅអគ្គនាយកដ្ឋានពន្ធនាគារកាលពីថ្ងៃទី ២២ ធ្នូ រួមមានថ្នាំពេទ្យដែលចាំបាច់ សម្ភារអនាម័យ និងសម្ភារផ្សេងទៀតដែលអគ្គនាយកដ្ឋានពន្ធនាគារបានស្នើសុំ។
លោកស្រីបញ្ជាក់ថា ជំនួយសម្រាប់ឆ្លើយតបទៅនឹងទឹកជំនន់នៅពន្ធនាគារ ក៏ត្រូវបានផ្ដល់ដោយគណៈកម្មាធិការកាកបាទក្រហមអន្តរជាតិ ICRC ផងដែរ។ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស OHCHR ក៏បានផ្ដល់បាវខ្សាច់ចំនួន ៩៥០ ដល់ពន្ធនាគារខេត្តបាត់ដំបង និងបានប្រគល់សម្ភារអនាម័យផ្សេងទៀតដល់អគ្គនាយកដ្ឋានពន្ធនាគារ រួមមានសាប៊ូដុសខ្លួន សាប៊ូលាងចាន ថ្នាំ និងច្រាសដុសធ្មេញដល់ពន្ធនាគារក្នុងកិច្ចការពារការឆ្លងកូវីដ១៩។
អង្គការយូនីសេហ្វក៏បានផ្ដល់សាប៊ូចំនួន ១ ០០០ ដុំ ដល់អនីតិជន និងអ្នកជាប់ឃុំស្ត្រីដែលត្រូវបានជម្លៀសពីពន្ធនាគារខេត្តបន្ទាយមានជ័យទៅពន្ធនាគារខេត្តសៀមរាបក្នុងពេលមានគ្រោះទឹកជំនន់កាលពីខែតុលា។ នេះបើតាមលោកស្រី ផូលីន។
លោកស្រីថ្លែងថា៖ «អង្គការសហប្រជាជាតិចាត់ទុកសុខភាពនៅពន្ធនាគារគឺជាសុខភាពសាធារណៈ ជាពិសេសក្នុងបរិបទជំងឺកូវីដ១៩នាពេលបច្ចុប្បន្ន។ វាជាការទទួលខុសត្រូវរបស់រដ្ឋក្នុងការអនុវត្តការផ្ដល់សុខុមាលភាពសម្រាប់អ្នកទោស និងអ្នកជាប់ឃុំ និងធានាថា ពួកគេទទួលបាននូវស្តង់ដាសុខុមាលភាពដូចអ្វីដែលសាធារណជនទូទៅនៅក្នុងប្រទេសនេះអាចទទួលបាន»។
លោកស្រីបន្តថា៖ «ប្រព័ន្ធអង្គការសហប្រជាជាតិនៅកម្ពុជាចូលរួមជាមួយអាជ្ញាធរជាបន្តបន្ទាប់ និងលើកទឹកចិត្តឱ្យពួកគាត់ចាត់វិធានការចាំបាច់ដើម្បីធានាថា អ្នកទោសនិងអ្នកជាប់ឃុំមិនត្រូវបានគេបំភ្លេចចោល ហើយថា ពួកគេទទួលបានវិធានការសុខាភិបាលស្មើៗគ្នា»។
លោក នុត សវនា បានបញ្ជាក់ថា អគ្គនាយកដ្ឋានពន្ធនាគារនៃក្រសួងមហាផ្ទៃមិនទាន់បានកំណត់ការបែងចែកជំនួយឧបត្ថម្ភពីគណៈកម្មាធិការកាកបាទក្រហមអន្តរជាតិ និងពី UNODC នៅឡើយទេ។
លោក នុត សវនា បានថ្លែងយ៉ាងដូច្នេះថា៖ «អ៊ីចឹង អីវ៉ាន់ ២ កញ្ចប់នេះ យើងអត់ទាន់បានបែងចែកទៅតាមគោលដៅនៅឡើយទេ ដោយសារយើងនៅរង់ចាំពិនិត្យស្ថានភាពជាក់ស្ដែង លទ្ធភាពជាក់ស្ដែងថាតើតម្រូវការនោះវាយ៉ាងម៉េច? ទើបយើងបែងចែកតាមតារាងសម្រាប់ចែកទៅតាមគោលដៅនីមួយៗ»៕