ភ្នំពេញ៖ នាយកដ្ឋានព័ត៌មានវិទ្យា នៃក្រសួងមហាផ្ទៃ បានស្រាវជ្រាវរកឃើញបទល្មើសបច្ចេកវិទ្យាព័ត៌មានធំៗចំនួន៥ ដែលកំពុងកើតមាននៅកម្ពុជា ក្នុងនោះមានការលួចកាន់កាប់គណនីបណ្តាញទំនាក់ទំនងសង្គម ការបរិហារកេរ្តិ៍លើបណ្តាញផ្សព្វផ្សាយសង្គម ការបន្លំលួចប្រាក់ពីគណនីធនាគារ ការចម្លងមេរោគកុំព្យូទ័រនិងទូរស័ព្ទដៃ និងការជ្រៀតចូលប្រព័ន្ធព័ត៌មាន។
នាយកដ្ឋានព័ត៌មានវិទ្យា បានផ្សព្វផ្សាយប្រាប់ប្រជាពលរដ្ឋ ក្រោយពីបានរកឃើញនេះកាលពីថ្ងៃទី ៥ ខែមិថុនា ថា ដើម្បីការពារខ្លួនពីបទល្មើសបច្ចេកវិទ្យាព័ត៌មាន ដូចបានរៀបរាប់ខាងលើ សូមបងប្អូនប្រជាពលរដ្ឋ ត្រូវមានការប្រុងប្រយ័ត្ន និងស្វែងយល់អំពីហានិភ័យនានា នៃបច្ចេកវិទ្យា។
នាយកដ្ឋានព័ត៌មានវិទ្យាបញ្ជាក់ថា៖«យោងតាមការសិក្សាស្រាវជ្រាវ អំពីបទល្មើសបច្ចេកវិទ្យាព័ត៌មាន ថ្ងៃនេះក្រុមការងារបច្ចេកទេស នៃនាយកដ្ឋានព័ត៌មានវិទ្យា សូមធ្វើការរៀបរាប់ អំពីនិន្នាការបទល្មើសបច្ចេកវិទ្យាព័ត៌មានធំៗទាំង៥ ដែលកំពុងកើតមានក្នុងព្រះរាជាណាចក្រកម្ពុជា រួមមាន ១- ការលួចកាន់កាប់គណនីបណ្តាញទំនាក់ទំនងសង្គម (Account Hijack) ២- ការបរិហារកេរ្តិ៍ លើបណ្តាញផ្សព្វផ្សាយសង្គម (Social Media Defamation) ៣- ការបន្លំលួចប្រាក់ពីគណនីធនាគារ (Money Fraud) ៤- ការចម្លងមេរោគកុំព្យូទ័រ និងទូរស័ព្ទដៃ (Malware Attack) ៥- ការជ្រៀតចូលប្រព័ន្ធព័ត៌មាន (Systems Hacking)»។
នាយកដ្ឋាននេះ បានអំពាវនាវថា ដើម្បីការពារខ្លួនពីបទល្មើសបច្ចេកវិទ្យាព័ត៌មាន ដូចបានរៀបរាប់ខាងលើ សូមបងប្អូនប្រជាពលរដ្ឋត្រូវមានការប្រុងប្រយ័ត្ន និងស្វែងយល់អំពីហានិភ័យនានានៃបច្ចេកវិទ្យា។ ប្រសិនប្រជាពលរដ្ឋមានចម្ងល់ផ្សេងៗពាក់ព័ន្ធនឹងហានិភ័យបច្ចេកវិទ្យា អាចធ្វើការសាកសួរក្រុមការងារបច្ចេកទេសតាមរយ:ប្រអប់សារទំព័រ Facebook Page របស់នាយកដ្ឋានព័ត៌មានវិទ្យាផ្ទាល់តែម្ដង។
លោក ហោ សំអាត អគ្គលេខាធិការរង នៃអគ្គលេខាធិការដ្ឋាន ក្រសួងមហាផ្ទៃ និងជាប្រធាននាយកដ្ឋានព័ត៌មានវិទ្យាមិនអាចទាក់ទងសុំការអត្ថាធិប្បាយបន្ថែមបានទេនៅថ្ងៃទី ៧ ខែមិថុនា។
ទាក់ទិនទៅនឹងការគ្រប់គ្រងបទល្មើសបច្ចេកវិទ្យាព័ត៌មាននៅកម្ពុជានេះ ក្រសួងមហាផ្ទៃ និងអ្នកពាក់ព័ន្ធនានានឹងបន្ដកិច្ចប្រជុំជាបន្តបន្ទាប់លើសេចក្ដីព្រាងច្បាប់ ស្ដីពីបទល្មើសបច្ចេកវិទ្យាព័ត៌មាន ហើយកាលពីថ្ងៃទី ២ ខែមិថុនា ក្រសួងមហាផ្ទៃ អង្គភាពពាក់ព័ន្ធ រួមនឹងអគ្គនាយកដ្ឋានព័ត៌មានវិទ្យា ក៏បានចូលរួមក្នុងកិច្ចប្រជុំដោយបន្តពិភាក្សា និងពិនិត្យលើសេចក្តីព្រាងច្បាប់នេះផងដែរ។
ក្រសួងមហាផ្ទៃបញ្ជាក់ថា កិច្ចប្រជុំនេះ បន្តពិភាក្សា និងពិនិត្យលើសេចក្តីព្រាងច្បាប់ស្តីពី បទល្មើសបច្ចេកវិទ្យាព័ត៌មាន ក្រោមអធិបតីភាព លោក ប៊ុន ហុន រដ្ឋលេខាធិការក្រសួងមហាផ្ទៃ ទទួលបន្ទុកក្រុមប្រឹក្សានីតិកម្ម និងមានការចូលរួមពី រដ្ឋលេខាធិការ អនុរដ្ឋលេខាធិការក្រសួងមហាផ្ទៃ និងអង្គភាពជំនាញពាក់ព័ន្ធជាច្រើនទៀត។
លោក ប៊ុន ហុន ថ្លែងក្នុងកិច្ចប្រជុំនេះថា៖«អង្គប្រជុំបានពិនិត្យពិភាក្សា និងកែសម្រួលបានចំនួន ១២ មាត្រា ហើយនៅថ្ងៃនេះ កិច្ចប្រជុំនឹងបន្តពិនិត្យ និងពិភាក្សាលើមាត្រា ១៣ ដល់មាត្រា ១៦ ដែលជាមាត្រាចុងក្រោយនៃជំពូកទី៤»។
បើតាមការជូនដំណឹងរបស់ក្រសួងមហាផ្ទៃក្នុងកិច្ចប្រជុំនេះ ក្រុមការងារពាក់ព័ន្ធកំពុងបន្តពិភាក្សា និងពិនិត្យលើសេចក្តីព្រាងច្បាប់ ស្តីពីបទល្មើសបច្ចេកវិទ្យាព័ត៌មាននេះ ចាប់ផ្តើមតាំងពីឆ្នាំ ២០១៦ ដោយកិច្ចប្រជុំអន្តរក្រសួង និងអន្តរអគ្គនាយកដ្ឋានសរុបទាំងអស់ ៥០ លើក ដោយឡែកកិច្ចប្រជុំក្នុងក្របខណ្ឌអគ្គនាយកដ្ឋាន ៧ លើក។
ក្រសួងបញ្ជាក់ថា ច្បាប់នេះមានគោលបំណងធានាសុច្ចរិតភាព នៃការប្រើប្រាស់ ការគ្រប់គ្រងប្រព័ន្ធកុំព្យូទ័រ ទិន្នន័យកុំព្យូទ័រ និងការការពារសន្តិសុខ សណ្តាប់ធ្នាប់សាធារណៈ ព្រមទាំងការការពារសិទ្ធិសេរីភាពបុគ្គល ដើម្បីបង្ការទប់ស្កាត់ និងបង្រ្កាបការប្រព្រឹត្តបទល្មើសតាមប្រព័ន្ធបច្ចេកវិទ្យាព័ត៌មានវិទ្យាដែលមាន ៧ ជំពូក ៤៨ មាត្រា៕