.jpg)
នាយកដ្ឋានព័ត៌មានវិទ្យានៃក្រសួងមហាផ្ទៃ ប្រាប់ពលរដ្ឋឱ្យការពារខ្លួនពីការឆបោកតាមទូរស័ព្ទ។ រូបថត ក្រសួងមហាផ្ទៃ
ភ្នំពេញៈ នាយកដ្ឋានព័ត៌មានវិទ្យានៃក្រសួងមហាផ្ទៃ ប្រាប់ពីរបៀបការពារខ្លួនដោយប្រើប្រាស់នូវកម្មវិធីឈ្មោះ Hiya: Spam Phone Call Blocker ដែលវាមានសមត្ថភាពអាចជួយប្លុកលេខដែលសង្ស័យថា ឆបោកបានដោយស្វ័យប្រវត្តិ ខណៈលេខឆបោកទាំងនេះអាចនឹងលួចកាត់ប្រាក់ពីទូរស័ព្ទរបស់អ្នក បន្ទាប់ពីមានការខលចេញត្រឡប់ទៅវិញ។
ការប្រកាសឱ្យអ្នកប្រើប្រាស់ទូរស័ព្ទមានការប្រុងប្រយ័ត្នយ៉ាងដូច្នេះបានធ្វើឡើងដោយសារតែមានករណីខលទូរស័ព្ទពីក្រៅប្រទេសជាបន្តបន្ទាប់ ដែលជាលេខទូរស័ព្ទសង្ស័យ (Spam) មានបំណងឆបោកប្រាក់តាមរយៈ Callback Scam ទៅកាន់ជនដែលលេខរបស់ពួកគេអាចប្រើប្រាស់ International Premium Rate Number (IPRN) ដើម្បីកាត់ប្រាក់ពីទូរស័ព្ទជនរងគ្រោះ។
នាយកដ្ឋានព័ត៌មានវិទ្យាបានរៀបរាប់ថា ដើម្បីការពារពីការខលចូលរំខាន ជនរងគ្រោះបានធ្វើការ Block លេខទូរស័ព្ទដែលបានព្យាយាមខលចូលទាំងនោះ ប៉ុន្តែជនល្មើសបានព្យាយាមប្រើប្រាស់លេខថ្មីៗបម្រើសកម្មភាពល្មើសរបស់ពួកគេ។ ដូច្នេះដើម្បីអាចការពារខ្លួនពីការចាញ់បោកនូវល្បិចកលទាំងនេះក្រុមការងារបច្ចេកទេសបានធ្វើការណែនាំអំពីរបៀបដំឡើងកម្មវិធីជំនួយ ដែលមានសមត្ថភាពកំណត់លេខទូរស័ព្ទសង្ស័យ (Spam) រួចធ្វើការ Block ដោយស្វ័យប្រវត្តិ។
នាយកដ្ឋានព័ត៌មានវិទ្យានេះបញ្ជាក់ថា៖ «កម្មវិធីឈ្មោះ Hiya: Spam Phone Call Blocker កំពុងតែទទួលបាននូវការពេញនិយមប្រើប្រាស់ ព្រោះបច្ចុប្បន្នកម្មវិធីនេះមានទិន្នន័យលេខទូរស័ព្ទសង្ស័យ (Spam) ប្រមាណ ២៨៧ លានលេខទូរស័ព្ទដែលអាចជួយអ្នកប្រើប្រាស់ក្នុងការ Block លេខសង្ស័យបានច្រើន។ កម្មវិធីឈ្មោះ Hiya អាចដំឡើងលើទូរស័ព្ទដៃ ដែលមានប្រព័ន្ធប្រតិបត្តិការ iOS និង Android»។
បើតាមនាយកដ្ឋានព័ត៌មានវិទ្យា Callback ឬ One-Ring Scam គឺជាបច្ចេកទេសកាត់ប្រាក់ពីគណនីទូរស័ព្ទជនរងគ្រោះ ដោយប្រើប្រាស់សេវាដែលមានឈ្មោះថា International Premium Rate Number (IPRN)។ ក្រុមបណ្តាញឧក្រិដ្ឋជនដែលមានអង្គការចាត់តាំងបានទិញសេវាលេខទូរស័ព្ទ IPRN ពីក្រុមហ៊ុនផ្តល់សេវាទូរស័ព្ទ ឬគេហទំព័រអនឡាញ រៀបចំបច្ចេកទេសផ្សេងៗតួយ៉ាងប្រើប្រាស់លេខទូរស័ព្ទ IPRN ធ្វើការខលចេញទៅកាន់គោលដៅនានាជុំវិញពិភពលោក (Missed Call) ដើម្បីឱ្យគោលដៅទាំងនោះខលមកវិញ ជាមួយការកាត់ទឹកប្រាក់ដ៏ច្រើនខុសធម្មតា។
លោក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យានៃអគ្គស្នងការនគរបាលជាតិប្រាប់ ភ្នំពេញ ប៉ុស្តិ៍ កាលពីម្សិលមិញថា កាលពីពេលថ្មីៗនេះ នាយកដ្ឋានប្រឆាំងបទល្មើសបច្ចេកវិទ្យាបានរកឃើញថា មានប្រជាពលរដ្ឋជាច្រើនបានទទួលការតេចូលពីលេខក្រៅប្រទេស ហើយករណីនេះមិនមែនទើបតែកើតឡើងនោះទេ។
តាមការស្រាវជ្រាវបឋមការរកឃើញនេះ ជាប្រភេទបោកប្រាស់ (Scam) ស្រដៀងគ្នានឹងការបោកប្រាស់ call back ដែលទាមទារឱ្យជនរងគ្រោះយកលេខទូរស័ព្ទរបស់ខ្លួនតេទៅលេខក្រៅប្រទេសមួយចំនួននោះ ដែលបញ្ហានេះក៏ធ្លាប់បានកើតឡើងក្នុងប្រទេសកម្ពុជាយើងរួចមកហើយ។
ប៉ុន្តែលោកបន្តថា រហូតមកដល់ពេលនេះ គឺមិនទាន់មានការរាយការណ៍ថា មានជនរងគ្រោះដែលបានចាញ់បោកក្នុងករណីនេះនោះទេ។ លោកបានបញ្ជាក់ថា៖ «រឿងនេះបានកើតឡើងកន្លះឆ្នាំជាងហើយ ហើយយើងបានផ្សព្វផ្សយជាថ្មីទៀត។ តាំងពីមានហេតុការណ៍ យើងមិនទាន់ទទួលបានការប្តឹងមកសមត្ថកិច្ចយើងថា មានចាញ់បោកករណីតែម្តងគ្មានផង ព្រោះប្រជាពលរដ្ឋយើងមានការយល់ដឹងច្រើនណាស់ពីបញ្ហានេះ»។
នាយកដ្ឋានប្រឆាំងបទល្មើសបច្ចេកវិទ្យាបានណែនាំដល់ប្រជាពលរដ្ឋទាំងអស់កុំតេទៅលេខក្រៅប្រទេសដែលមិនស្គាល់ ជាពិសេសប្រសិនបើទទួលបានសារ មានដូចជា ការឈ្នះរង្វាន់ ការលក់ទំនិញថោក ក្រោមតម្លៃទីផ្សារជាដើមនោះ សូមប្រជាពលរដ្ឋកុំឆ្លើយតបព្រោះនេះគឺជាការបោកបញ្ឆោតរបស់ក្រុមជនខិលខូចតែប៉ុណ្ណោះ។
ក្រៅពីករណីឆបោកនេះក្នុងរយៈពេលចុងក្រោយនេះ ក្រុមការងារនៃនាយកដ្ឋានព័ត៌មានវិទ្យាបានទទួលព័ត៌មានពីការឆបោករបស់ក្រុមជនខិលខូចនៅក្នុងប្រទេសកម្ពុជា ក្រោមរូបភាពផ្សេងៗគ្នា ដូចជាធ្វើការខលទូរស័ព្ទទៅកាន់ជនរងគ្រោះថាឈ្នះរង្វាន់ពីធនាគារក្នុងស្រុកមួយនូវចំនួនទឹកប្រាក់ផ្សេងៗ ឬឧក្រិដ្ឋជនណែនាំជនរងគ្រោះដាក់ប្រាក់ក្នុងគណនីទូរស័ព្ទ (Top Up) នូវចំនួនទឹកប្រាក់ចាប់ពី ១០ ដុល្លារអាមេរិក ហើយតម្រូវឱ្យជនរងគ្រោះធ្វើការខលទូរស័ព្ទទៅកាន់នាយកប្រតិបត្តិធនាគារ ដើម្បីសន្ទនា និងពិភាក្សាអំពីកម្មវិធីរង្វាន់នេះជាដើម។ នេះបើតាមនាយកដ្ឋានព័ត៌មានវិទ្យា៕
