.jpg)
លោក ហ៊ុន សែន នាយករដ្ឋមន្ត្រីនៃកម្ពុជា និងលោក ផនខាំ វីផាវ៉ាន់ នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ ក្នុងជំនួបតាមប្រព័ន្ធវីដេអូនៅថ្ងៃនេះ។ រូបថត ក្រសួងការបរទេស
ភ្នំពេញ៖ នាយករដ្ឋមន្ត្រីនៃព្រះរាជាណាចក្រកម្ពុជា និងនាយករដ្ឋមន្ត្រីឡាវបានសម្តែងការពេញចិត្តទៅវិញទៅមកចំពោះទំនាក់ទំនងជាប្រពៃណី និងជាអ្នកជិតខាងល្អ ខណៈភាគីទាំង ២ បានឯកភាពជំរុញឲ្យបញ្ចប់បានឆាប់នូវសេចក្តីព្រាងផែនការសកម្មភាពសម្រាប់ភាពជាដៃគូ ដើម្បីបន្តពង្រឹងទំនាក់ទំនងលើគ្រប់វិស័យដូចជាវិស័យនយោបាយ សន្តិសុខ ពាណិជ្ជកម្មវិនិយោគអប់រំ និងវប្បធម៌។
នេះបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិដែលបានស្រង់ខ្លឹមសារនៃជំនួបតាមប្រព័ន្ធវីដេអូរវាងលោក ហ៊ុន សែន នាយករដ្ឋមន្ត្រីនៃកម្ពុជា និងលោក ផនខាំ វីផាវ៉ាន់ នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ ថ្ងៃទី ១២ ខែ មេសា ឆ្នាំ ២០២១ នេះ។
សេចក្តីប្រកាសព័ត៌មានដដែលបន្តថា ថ្នាក់ដឹកនាំទាំង ២ មានសេចក្តីរីករាយចំពោះកំណើននៃទំហំពាណិជ្ជកម្មទ្វេភាគី ដែលបានកើនឡើងពីត្រឹម ១០ លានដុល្លារអាមេរិកនៅឆ្នាំ ២០១៩ រហូតដល់ ១០៤ លានដុល្លាអាមេរិកក្នុងឆ្នាំ ២០២០។ ជាមួយគ្នានេះ ដើម្បីជំរុញការវិនិយោគនៅក្នុងប្រទេសទាំង ២ ថ្នាក់ដឹកនាំទាំង ២ បានឯកភាពពន្លឿនការចរចាលើ “កិច្ចព្រមព្រៀងស្ដីពីការចៀសវាងការយកពន្ធត្រួតគ្នា”។
ចំពោះស្ថានភាពនៃការរីករាលដាលនៃជំងឺកូវីដ ១៩ លោកនាយករដ្ឋមន្ត្រី ហ៊ុន សែន បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋាភិបាលឡាវក្នុងការគ្រប់គ្រងការរីករាលដាលនៃជំងឺកូវីដ ១៩ ប្រកបដោយជោគជ័យ។
នាយករដ្ឋមន្ត្រីទាំង ២ បានបញ្ជាក់ពីសារៈសំខាន់នៃការពង្រឹងកិច្ចសហការរួម ដើម្បីប្រយុទ្ធប្រឆាំងនឹងជំងឺកូវីដី ១៩ និងដោះស្រាយផលប៉ះពាល់អវិជ្ជមាននៃជំងឺនេះ។
ក្រៅពីសហប្រតិបត្តិការទ្វេភាគី ថ្នាក់ដឹកនាំទាំង ២ ក៏បានផ្លាស់ប្តូរគំនិត និងប្តេជ្ញាធ្វើការយ៉ាងជិតស្និទ្ធនៅក្នុងក្របខ័ណ្ឌកិច្ចសហប្រតិបត្តិការពហុភាគីនានា។
ជាមួយនេះដែរលោកនាយករដ្ឋមន្ត្រី ហ៊ុន សែន បានថ្លែងអំណរគុណចំពោះរដ្ឋាភិបាលឡាវ ដែលបានគាំទ្រកម្ពុជាក្នុងការធ្វើជាម្ចាស់ផ្ទះរៀបចំកិច្ចប្រជុំកំពូល ASEM លើកទី១៣ នៅចុងឆ្នាំ ២០២១ និងជាប្រធានអាស៊ាន នៅឆ្នាំ ២០២២ ៕
