ភ្នំពេញ: លោកនាយករដ្ឋមន្ត្រី ហ៊ុន សែន នៅព្រឹកនេះបានចេញពីកម្ពុជាទៅចូលរួមប្រជុំកំពូលអាស៊ីអឺរ៉ុប និងកិច្ចប្រជុំផ្សេងទៀតនៅទីក្រុងប្រ៊ុចសែលប្រទេសបែលហ្ស៊ិកជាទីដែលលោកត្រូវប្រឈមនឹងបាតុកម្មជាថ្មីពីអ្នកគាំទ្រអតីតគណបក្សប្រឆាំង ប៉ុន្តែលោកថា «ពេញចិត្តនឹងធ្វើកិច្ចការនេះព្រោះជាប្រយោជន៍ជាតិយើង» ជាអ្វីដែលអតីតមន្ត្រីបក្សប្រឆាំងថា ជាសញ្ញានៃភាព «ប្រេះឆា» នយោបាយខ្មែរកាន់តែខ្លាំង។
លោក ហ៊ុន សែន បានចាកចេញពីភ្នំពេញកាលពីយប់ម៉ោង ១២ និង ២០ នាទីឈានចូលថ្ងៃទី ១៧ ខែតុលាដើម្បីទៅចូលរួមកិច្ចប្រជុំកំពូលអាស៊ីអឺរ៉ុប លើកទី ១២ ដែលនឹងធ្វើឡើងថ្ងៃទី ១៨ និង ១៩ ខែតុលាក្រោមប្រធានបទ៖ «អឺរ៉ុប និងអាស៊ី៖ ដៃគូសកលសម្រាប់បញ្ហាប្រឈមសកល» ដើម្បីពង្រឹងកិច្ចសន្ទនា និងកិច្ចសហប្រតិបត្តិការរវាងតំបន់អាស៊ី និងអឺរ៉ុប។
បើតាមសេចក្ដីប្រកាសព័ត៌មានរបស់ក្រសួងការបរទេសនៅក្នុងឱកាសនោះ លោកនាយករដ្ឋមន្ត្រីនឹងថ្លែងបទអន្តរាគមន៍ផងដែរដោយផ្តោតលើប្រធានបទ«របៀបវារៈឆ្នាំ ២០៣០ សម្រាប់ការអភិវឌ្ឍប្រកបដោយចីរភាព និងកំណើនសេដ្ឋកិច្ចប្រកបដោយចីរភាព និងបរិយាប័ន្ន»។
ក្នុងអំឡុងស្នាក់នៅប្រទេសបែលហ្ស៊ិកលោក ហ៊ុន សែន នឹងមានជំនួបទ្វេភាគីដាច់ដោយឡែកជាមួយនាយករដ្ឋមន្ត្រីរុស្ស៊ីលោក Dmitry Medvedev, នាយករដ្ឋមន្ត្រីហុងគ្រី លោក Viktor Orban, នាយករដ្ឋមន្ត្រីន័រវែសលោកស្រី Erna Solberg និងនាយករដ្ឋមន្ត្រីប្រទេសឆែកលោក Andrej Babis ជាដើម។
មុនពេលចេញដំណើរលោក ហ៊ុន សែន បានសរសេរលើទំព័រហ្វេសប៊ុករបស់លោកថាបន្ទាប់ពីកិច្ចប្រជុំអាស៊ីអឺរ៉ុប លោកនឹងធ្វើទស្សនកិច្ចនៅប្រទេសតួកគី ចាប់ពីថ្ងៃទី ២០ ដល់ថ្ងៃទី ២២ តុលាហើយនៅថ្ងៃទី ២២ តុលាខាងមុខលោកនឹងចេញពីប្រទេសតួកគីមកទីក្រុងហ្សឺណែវ ប្រទេសស្វ៊ីសដើម្បីចូលរួមសន្និសីទស្តីពីពាណិជ្ជកម្ម មុនវិលមកកម្ពុជាវិញនៅថ្ងៃទី ២៤ ខែតុលា។
លោកថ្លែងថា៖ «ក្រឡេកមើលកម្មវិធីការងារនៅក្រៅប្រទេសលើកនេះពិតជាមមាញឹកស្ទើរ តែរកពេលបាយមិនឃើញ ប្រជុំផងជំនួបទ្វេភាគីផង តែខ្ញុំពេញចិត្តនឹងធ្វើកិច្ចការនេះ ព្រោះជាប្រយោជន៍ជាតិយើង»។
លើសពីនេះទៀតលោកថាការងារមួយដែលលោកមិនអាចបោះបង់ចោលបានគឺជួបបងប្អូន និងនិស្សិតខ្មែរដែលកំពុងរស់នៅ និងរៀនសូត្រនៅអឺរ៉ុប ដែលលោកថាកំពុងរង់ចាំលោកនៅទីនោះ។
លោកបានសង្កត់ធ្ងន់ថា៖ «ការងារយោធា កូនទាហានដើរមុខ មេទាហានដើរក្រោយ ឯការងារនយោបាយវិញគឺមេដឹកនាំដើរមុខ អ្នកជំនួយការដើរក្រោយវិញ ហើយនេះប៉ះលើរូបខ្ញុំតែម្តងគឺដើរមុខជានិច្ច។ នេះជាព្រហ្មលិខិតដែលតម្រូវឱ្យខ្ញុំធ្វើក្នុងជាតិនេះមែនទេ? តែបើទោះជាដោយមូលហេតុណាក៏ដោយ ខ្ញុំត្រូវតែធ្វើដើម្បីសេចក្តីសុខ និងការរីកចម្រើនរបស់ជាតិយើង»។
ទោះបីជាយ៉ាងណាតាមការគ្រោងទុកអ្នកគាំទ្ររបស់អតីតគណបក្សសង្គ្រោះជាតិថា ពួកគេនឹងទៅប្រមូលផ្តុំតវ៉ាដើម្បីប្រឆាំងនឹងវត្តមានគណៈប្រតិភូរបស់លោក ហ៊ុន សែន ដូចដែលពួកគេធ្លាប់បានធ្វើកន្លងមកនៅក្នុងទីក្រុងញូវយ៉កសហរដ្ឋអាមេរិក និងទីក្រុងតូក្យូប្រទេសជប៉ុន។ នេះបើតាមខិត្តប័ណ្ណរបស់អតីតគណបក្សប្រឆាំងនៅក្រៅប្រទេស។
លោក អ៊ូ ច័ន្ទរ័ត្ន អតីតតំណាងរាស្ត្រគណបក្សប្រឆាំងបានថ្លែងកាលពីម្សិលមិញថា លោក ហ៊ុន សែន មានសេចក្ដីរីករាយចំពោះដំណើរទស្សនកិច្ចរបស់លោកនៅក្រៅប្រទេសដែលមានអមដោយអ្នកគាំទ្រ ប៉ុន្តែលោកថា ដំណើរទស្សនកិច្ចលើកនេះទិដ្ឋភាពនឹងដូចទៅនឹងបាតុកម្មប្រឆាំងរូបលោកនៅក្នុងទីក្រុងញូវយ៉កសហរដ្ឋអាមេរិក។
លោកថ្លែងថា៖ «វាមិនមែនជារឿងមានមុខមានមាត់សម្រាប់ប្រទេសកម្ពុជាទេ វាបានបង្ហាញទៅពិភពលោកថា យើងមានវិបត្តិផ្ទៃក្នុងមានន័យថា ប្រទេសកម្ពុជាមានភាពប្រេះឆា...ខ្ញុំឃើញថាវាមិនដែលមាននៅក្នុងពិភពលោកអ្នកដែលគាំទ្រចេញទៅធ្វើបាតុកម្មគាំទ្រ វាចម្លែកសម្រាប់ប្រទេសយើង»៕