ភ្នំពេញៈ នៅក្នុងវេទិកាភាពងាយរងគ្រោះនៃអាកាសធាតុ អគ្គលេខាធិការអង្គការសហប្រជាជាតិបានលើកឡើងថា វិបត្តិជំងឺកូវីដ ១៩ បានបង្ហាញអំពីភាពងាយរងគ្រោះរបស់មនុស្សទូទៅនៅក្នុងពិភពលោកដូចគ្នានឹងការរំខាននៃការប្រែប្រួលអាកាសធាតុដែរ ខណៈដែលលោកនាយករដ្ឋមន្ត្រី ហ៊ុន សែន បានចាត់ទុកការប្រែប្រួលអាកាសធាតុគឺជាបញ្ហាសកលប្រទាក់ក្រឡាគ្នា ដែលត្រូវដោះស្រាយតាមគោលនយោបាយគ្រប់ជ្រុងជ្រោយ និងមានតុល្យភាព។
លោក អង់តូនីញ៉ូ ហ្គុយតឺរេស (António Guterres) អគ្គលេខាធិការអង្គការសហប្រជាជាតិបានថ្លែងទៅកាន់អង្គវេទិកាភាពងាយរងគ្រោះនៃអាកាសធាតុតាមរយៈវីដេអូកាលពីថ្ងៃទី ៧ ខែតុលា ថា វិបតិ្តជំងឺកូវីដ ១៩ និងការរំខាននៃការប្រែប្រួលអាកាសធាតុបានធ្វើឱ្យមានការខាតបង់យ៉ាងច្រើនសន្ធឹកសន្ធាប់ ទៅលើធនធានមនុស្ស និងសេដ្ឋកិច្ច។
លោក អង់តូនីញ៉ូ ហ្គុយតឺរេស បានបញ្ជាក់ថា៖ «វិបត្តិទាំង ២ នេះអាចត្រូវបានដោះស្រាយតាមរយៈសកម្មភាពពហុភាគីប្រកបដោយមហិច្ឆតា។ នេះជាមូលហេតុ ដែលខ្ញុំជំរុញដល់គ្រប់បណ្ដារដ្ឋាភិបាលទាំងអស់ចាត់វិធានការវិជ្ជមានចំនួន ៦ ចំណុច ដើម្បីធ្វើឱ្យប្រសើរឡើងទាំងអស់គ្នា»។
វិធានការវិជ្ជមានទាំង ៦ ចំណុចនោះរួមមានការវិនិយោគលើការងារបៃតង បញ្ឈប់ការគាំទ្រឧស្សាហកម្មដែលមានការបំពុល (បរិស្ថាន) ជាពិសេស ឧស្សាហកម្មធ្យូងថ្ម បញ្ឈប់ការឧបត្ថម្ភធនឥន្ធនៈហ្វូស៊ីល ហើយដាក់តម្លៃលើកាបូន ត្រូវធ្វើការពិចារណាលើហានិភ័យអាកាសធាតុក្នុងការសម្រេចចិត្តផ្នែកហិរញ្ញវត្ថុ និងគោលនយោបាយទាំងអស់ត្រូវធ្វើការជាមួយគ្នា ហើយចំណុចសំខាន់បំផុតនោះគឺមិនត្រូវទុកនរណាម្នាក់ចោលឡើយ។
ក្នុងបរិបទនេះ លោកអគ្គលេខាអង្គការសហប្រជាជាតិបានបញ្ជាក់ថា៖ «ប្រទេសទាំងអស់ត្រូវបានគំរាមកំហែងដោយការប្រែប្រួលអាកាសធាតុ ប៉ុន្តែប្រទេសខ្លះ ងាយរងគ្រោះជាងប្រទេសដទៃទៀត។ ប្រទេសដែលងាយរងគ្រោះ ត្រូវការការគាំទ្រ។ ការគាំទ្រសម្រាប់ការផ្ស៊ាំ និងភាពធន់គឺចាំបាច់ដូចជាការកាត់បន្ថយការបំពុលបរិស្ថាន ហើយគួរតែត្រូវបានផ្តល់មូលនិធិស្មើគ្នាដោយធនាគារអភិវឌ្ឍន៍ពហុភាគី និងមូលនិធិអាកាសធាតុបៃតង»។
ជុំវិញការជំរុញរបស់ប្រមុខអង្គការសហប្រជាជាតិលោក អង់តូនីញ៉ូ ហ្គុយតឺរេស នូវចំណុចវិជ្ជមានទាំង ៦ ខាងលើនេះលោកនាយករដ្ឋមន្ត្រី ហ៊ុន សែន ដែលបានដឹកនាំមន្ត្រីរបស់កម្ពុជា ចូលរួមកិច្ចប្រជុំក្នុងវេទិកានេះតាមប្រព័ន្ធវីដេអូអនឡាញកាលពីព្រលប់ថ្ងៃពុធបានថ្លែងថា ទោះបីជាធនធាន និងសមត្ថភាពកម្ពុជានៅមានកម្រិតក៏ដោយ តែកម្ពុជាមានការតាំងចិត្ត និងឆន្ទៈនយោបាយខ្ពស់ក្នុងការរួមចំណែកដល់កិច្ចប្រឹងប្រែងសកល ដើម្បីដោះស្រាយការប្រែប្រួលអាកាសធាតុផ្អែកតាមគោលការណ៍គន្លឹះរបស់អនុសញ្ញាក្របខ័ណ្ឌអង្គការសហប្រជាជាតិស្ដីពីការប្រែប្រួលអាកាសធាតុ ជាពិសេសគោលការណ៍ស្ដីពីការទទួលខុសត្រូវរួមគ្នា ប៉ុន្តែមានកាតព្វកិច្ចផ្សេងគ្នាផ្អែកតាមសមត្ថភាពរៀងៗខ្លួន។
លោកនាយករដ្ឋមន្ត្រីបានថ្លែងថា៖ «នៅក្នុងកម្រិតសកល ខ្ញុំយល់ឃើញថា ការប្រែប្រួលអាកាសធាតុគឺជាបញ្ហាប្រទាក់ក្រឡាគ្នាដែលត្រូវដោះស្រាយតាមគោលនយោបាយគ្រប់ជ្រុងជ្រោយ និងមានតុល្យភាព ទាំងទិដ្ឋភាពសង្គម សេដ្ឋកិច្ច និងបរិស្ថាន»។
ជាមួយគ្នានេះលោក ហ៊ុន សែន បានលើកទឹកចិត្តឱ្យរដ្ឋាភិបាលនៃបណ្ដាប្រទេសទាំងអស់រៀបចំបញ្ចប់ និងដាក់ជូននូវរបាយការណ៍រួមចំណែករបស់ជាតិខ្លួន ដើម្បីដោះស្រាយការប្រែប្រួលអាកាសធាតុ ប្រកបដោយមហិច្ឆតា។ លើសពីនេះលោកបានជំរុញឱ្យមានការបង្កើនធនធានហិរញ្ញវត្ថុ ជាពិសេសហិរញ្ញប្បទានអាកាសធាតុសម្រាប់ការផ្ស៊ាំជាដុំកំភួនដែលប្រទេសអភិវឌ្ឍន៍បានសន្យាកន្លងមក និងផ្ទេរបច្ចេកវិទ្យាជូនដល់ប្រទេសកំពុងអភិវឌ្ឍន៍ដើម្បីឆ្លើយតបទៅនឹងការផ្លាស់ប្តូរអាកាសធាតុ ប្រកបដោយប្រសិទ្ធភាពទាំងសម្រាប់យន្តការគ្រប់គ្រង និងជំរុញការវិនិយោគលើការស្រាវជ្រាវឯកជនក្នុងវិស័យថាមពលកកើតឡើងវិញ និងប្រសិទ្ធផលថាមពល ការការពារព្រៃឈើ និងហេដ្ឋារចនាសម្ព័ន្ធបច្ចេកវិទ្យាការបណ្ដុំជាដើម។
លោកថ្លែងបន្តថា៖ «ជារួមក្នុងបរិបទបច្ចុប្បន្ននេះការជំរុញទៅមុខ និងការប្រកាន់ខ្ជាប់ទៅនឹងក្របខ័ណ្ឌតំបន់និយម និងពហុភាគីនិយម គឺជាគោលការណ៍ដ៏សំខាន់សម្រាប់ដោះស្រាយបញ្ហាប្រឈម ដែលកំពុងកើតមានឡើងក្នុងគ្រប់វិស័យ ជាពិសេសបញ្ហាដែលកើតចេញពីការប្រែប្រួលអាកាសធាតុ» ។
ការលើកឡើងរបស់លោក ហ៊ុន សែន និងប្រមុខរដ្ឋាភិបាលនៃបណ្ដាប្រទេសដែលងាយរងគ្រោះពីអាកាសធាតុទាំងអស់នៅក្នុងវេទិកាភាពងាយរងគ្រោះនៃអាកាសធាតុតាមរយៈវីដេអូកាលពីថ្ងៃពុធនោះត្រូវបានលោកអគ្គលេខាធិការអង្គការសហប្រជាជាតិ សាទរយ៉ាងខ្លាំងនឹងចាត់ទុកថា ជាមេដឹកនាំឈានមុខលើមហិច្ឆតាអាកាសធាតុ៕