ព្រះសីហនុៈ លោកនាយករដ្ឋមន្ដ្រី ហ៊ុន សែន ថ្លែងថាការស្ថាបនាផ្លូវទាំង ៣៤ ខ្សែ និងហេដ្ឋារចនាសម្ព័ន្ធខេត្ដព្រះសីហនុគឺជាចក្ខុវិស័យរបស់រាជរដ្ឋាភិបាលក្នុងការរៀបចំខេត្ដនេះជាប៉ូលអភិវឌ្ឍន៍ជាតិប្រកបដោយចីរភាពនៅតំបន់ឆ្នេរសមុទ្រកម្ពុជា និងជាតំបន់សេដ្ឋកិច្ចពិសេសគំរូពហុបំណងសម្រាប់ទាក់ទាញទេសចរ និងការវិនិយោគថ្មីៗបន្ថែមទៀតពីបរទេស ខណៈការស្ថាបនាផ្លូវនេះសម្រេចជិតរួចរាល់។
ក្នុងពិធីជួបសំណេះសំណាលជាមួយមន្ដ្រីរាជការ និងក្រុមការងារបច្ចេកទេសស្ថាបនាហេដ្ឋារចនាសម្ព័ន្ធក្នុងខេត្ដ-ក្រុងព្រះសីហនុ ដើម្បីស្វែងយល់ពីស្ថានភាពការងាររបស់មន្ត្រីរាជការក្នុងខេត្ត និងស្វែងយល់ពីដំណើរការសាងសង់ស្ថាបនាហេដ្ឋារចនាសម្ព័ន្ធនានា ក្រោយពេលចុះពិនិត្យការស្ថាបនាផ្លូវក្នុងខេត្ដ/ក្រុងព្រះសីហនុពីម្សិលមិញ លោកនាយករដ្ឋមន្ត្រីថ្លែងថា រាជរដ្ឋាភិបាលបានកំណត់ផែនការក្នុងការរៀបចំប្លង់គោលប្រើប្រាស់ដីធ្លីក្នុងខេត្តព្រះសីហនុក្នុងចក្ខុវិស័យឆ្នាំ ២០៣០ គឺរៀបចំ និងអភិវឌ្ឍខេត្តនេះជាប៉ូលអភិវឌ្ឍន៍ជាតិប្រកបដោយចីរភាពនៅតំបន់ឆ្នេរសមុទ្រកម្ពុជា។
លោក ហ៊ុន សែន ថ្លែងថា៖ «តាមរយៈការអភិវឌ្ឍខេត្ដនេះជាទីក្រុងទំនើបជាមួយរមណីយដ្ឋានឆ្នេរសមុទ្រដែលស្អាតបំផុតលើសកលលោក និងជាតំបន់សេដ្ឋកិច្ចពិសេសគំរូពហុបំណងដែលនឹងទាក់ទាញទេសចរ និងការវិនិយោគថ្មីៗបន្ថែមទៀតពីបរទេស ខេត្ដនេះក៏និងបម្រើដល់ការរស់នៅដ៏ល្អប្រសើរសម្រាប់ប្រជាពលរដ្ឋខ្មែរផងដែរ»។
ក្នុងពេលពិនិត្យសមិទ្ធផលផ្លូវថ្នល់ដោយផ្ទាល់នៅតំបន់ឆ្នេរសមុទ្ររាមលោក ហ៊ុន សែន បានដើរពិនិត្យថ្នល់បេតុងដែលទើបបានកសាងរួចថ្មីៗនៅជាប់ដៃសមុទ្ររាម ដោយបង្ហាញឲ្យឃើញពីគុណភាពជាប់បានល្អ ដោយមានប្រព័ន្ធបង្ហូរទឹកដែលរៀបចំបានត្រឹមត្រូវតាមក្បួនបច្ចេកទេស និងគម្រោងសួនលម្អផ្លូវផងដែរ។
លោកនាយករដ្ឋមន្ត្រីបញ្ជាក់ថា៖ «ខ្ញុំសូមបញ្ជាក់ តំបន់ដែលដាក់អក្សរថា ខ្មែរធ្វើបាន វាមិនមែនត្រឹមតែបច្ចេកទេសពុះភ្នំ និងចិតភ្នំ ដើម្បីនឹងកសាងផ្លូវចូលមកទេ តែមានន័យទៅឆ្ងាយពីនេះនៅត្រង់ថា ការគិតក៏ខ្មែរ ការសាងសង់ ក៏ខ្មែរ បច្ចេកទេសគូរប្លង់ និងការសាងសង់ទាំងអស់គឺបាតដៃកូនខ្មែរ ប្រាក់ទាំងអស់គឺខ្មែរចេញទាំងអស់ គ្មានបរទេសចូលរួមបន្តិច។ ដូច្នេះយើងអត់ត្រូវរង់ចាំគេទេ គ្រាន់គូសប្លង់ យកលុយពីយើងរាប់មិនអស់ទេ ហើយទម្រាំតែសាងសង់...យើងសង្កេតមើលទំហំនៃការធ្វើរបស់យើងវាសម្បើម ពេកកន្លែងខ្លះចោះថ្មរហូតទៅដល់ ២ ម៉ែត្រ ៣ ម៉ែត្រ ១ ម៉ែត្ររួចទើបចាក់បេតុងឡើង។ គោលដៅធំរបស់យើងនៅទីនេះ គឺបង្កើតឲ្យទៅជាទីក្រុងពហុបំណង»។
លោកនាយករដ្ឋមន្ដ្រីថ្លែងថា សមិទ្ធផលដំបូងនៃការស្ថាបនាផ្លូវ និងហេដ្ឋារចនាសម្ព័ន្ធក្នុងខេត្ដ/ក្រុងព្រះសីហនុជាផ្លូវផែនការយុទ្ធសាស្ត្រក្នុងការធ្វើឲ្យខេត្ដនេះក្លាយជាប៉ូលពហុបំណងទី ៣ នៅកម្ពុជា។ ជាទីក្រុងទេសចរណ៍ និងពាណិជ្ជកម្មដ៏ស៊ីវិល័យ និងអាចជាទីក្រុងវៃឆ្លាតដំបូងរបស់កម្ពុជាផងដែរ។
លោកបន្ថែមថា ផ្លូវថ្នល់ទាំងអស់នេះនឹងចាក់កៅស៊ូពីលើថែមទៀត ហើយបន្ទាប់មកនឹងមានរៀបជាសួនលម្អនៅតាមទ្រូងផ្លូវ និងនៅតាមជាយសងខាងផ្លូវ។ បើតាមទំហំដ៏ធំទូលាយនេះគឺអាចឲ្យរថយន្តបើកបរម្ខាងបាន ២ ដែលមានសួនច្បារលម្អនៅចំកណ្តាល។ ផ្លួវដែលបានកសាងនៅក្នុងតំបន់នេះ គឺមានកាត់ពុះច្រៀកភ្នំដែលមានកម្ពស់ជាង ២០ ម៉ែត្រធ្វើទៅតាមបច្ចេកទេសដែលធានាសុវត្ថិភាពនៃការធ្វើដំណើររបស់ប្រជាពលរដ្ឋ។
លោក ហ៊ុន សែន បញ្ជាក់ថា រាជរដ្ឋាភិបាលកម្ពុជាសម្រេចបញ្ចេញកញ្ចប់ថវិកាជាតិប្រមាណ ៣០០ លានដុល្លារអាមេរិក ដើម្បីកសាងផ្លូវចំនួន ៣៤ ខ្សែ និងហេដ្ឋារចនាសម្ព័ន្ធក្នុងខេត្តព្រះសីហនុដែលជាផ្លូវប្រកបដោយប្រណីតភាពដំបូងបំផុតនៅក្នុងប្រទេសកម្ពុជា។
វីដេអូ៖
លោក គួច ចំរើន អភិបាលខេត្ដព្រះសីហនុបានរាយការណ៍ជូនលោកនាយករដ្ឋមន្ដ្រីក្នុងការជួបសំណេះសំណាលនេះដែរថាវឌ្ឍនភាពនៃការស្ថាបនាផ្លូវទាំង ៣៤ ខ្សែក្នុងខេត្ដ/ក្រុងព្រះសីហនុ ការស្ថាបនាផ្លូវក្រុងដំណើរការទៅបានដោយរលូនទទួលបានការចូលរួមសហការយ៉ាងល្អពីសំណាក់ប្រជាពលរដ្ឋក្នុងមូលដ្ឋាន។ មានការយកចិត្ដទុកដាក់ខ្ពស់ពីក្រុមហ៊ុន និងអង្គភាពទទួលការស្ថាបនាផ្លូវដោយគោរពទៅតាមប្លង់សូរិយោដី ប្លង់ស្ថាបត្យកម្ម ប្លង់គ្រឿងផ្គំ និងបទដ្ឋានបច្ចេកទេសផ្លូវដែលសិក្សា ដោយក្រុមការងារគណៈកម្មការជាតិអភិវឌ្ឍតំបន់ឆ្នេរសមុទ្រកម្ពុជា ដើម្បីធានាបានទាំងគុណភាព និងសោភណភាព។
លោកថ្លែងថា៖ «គិតចាប់ពីថ្ងៃបើកការដ្ឋានស្ថាបនាផ្លូវនៅថ្ងៃ ១៦ ខែ វិច្ឆិកា ឆ្នាំ ២០១៩ ក្រោមអធិបតីភាពរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីរហូតមកដល់បច្ចុប្បន្នការងារស្ថាបនាផ្លូវចំនួន ៣៤ ខ្សែ សម្រេចបានប្រមាណ ៩៤ ភាគរយ ដោយមិនគិតបញ្ចូលការងារអ៊ុតកៅស៊ូ គំនូសចរាចរណ៍ ការដាំដើមឈើ បំពាក់កាមេរ៉ាសុវត្ថិភាព បង្គោលភ្លើងបំភ្លឺស្ដុបចរាចរណ៍ បង្គោលភ្លើងបំភ្លឺផ្លូវ ការងាររៀបកម្រាលថ្មក្រានីត»។
ជាមួយគ្នានេះពីម្សិលមិញលោក ហ៊ុន សែន ថ្លែងជាថ្មីថាមិនមានមូលដ្ឋានទ័ពបរទេសនៅកម្ពុជាដូចការសង្ស័យរបស់បរទេសទេ ហើយលោកស្វាគមន៍ដល់ការធ្វើសមយុទ្ធយោធាតាមការស្នើសុំ។ លោកលើកឡើងបែបនេះបន្ទាប់ពីមានមន្ត្រីទូតបរទេសម្នាក់ដែលទំនងជាសំដៅដល់ឯកអគ្គរដ្ឋទូតសហរដ្ឋអាមេរិកបានប្រាប់ទៅទេសរដ្ឋមន្ត្រី និងរដ្ឋមន្ត្រីម្នាក់ទៀតថា មានមូលដ្ឋានទ័ពចិននៅកម្ពុជា។
លោកថ្លែងថា បរទេសអាចមកចូលរួមធ្វើការរួមគ្នាដូចជាល្បាតសមុទ្រ ប្រឆាំងភេរវកម្ម និងពួកជួញដូរមនុស្ស គ្រឿងញៀន និងរត់ពន្ធខុសច្បាប់គឺសមយុទ្ធជើងទឹក ចំណែកជើងគោក គឺធ្វើសមយុទ្ធគ្រប់គ្រងគ្រោះមហន្តរាយ។ លោកថា លោកចង់បានតែ ២ ទេគឺសមយុទ្ធប្រឆាំងភេរវកម្ម និងសមយុទ្ធគ្រប់គ្រងគ្រោះមហន្តរាយ ហើយលោកមិនចង់ធ្វើសមយុទ្ធវាយកម្ទេចសត្រូវនេះឬសត្រូវនោះទេ។
លោកថា៖ «យើងគួរយល់គ្នាហើយ តើចិនមានផលប្រយោជន៍អ្វីទៅដែលចិនត្រូវយកនាវាជើងទឹករបស់ខ្លួនយកមកដាក់នៅកំពង់សោម នៅពេលដែលចិននៅសមុទ្រចិនខាងត្បូងហើយស្រាប់នោះ នៅស្រុកចិនហើយហ្នឹង។ តើចិនមានត្រូវការយកទៅដាក់ក្នុងប្រទេសថៃ ឥឡូវចោទទៅភូមាទៀតថាកំពង់ផែភូមានឹងក្លាយជាកំពង់ផែដែលចិនយកកងទ័ពទៅដាក់ទៀតហើយ»។លោកថា ការចោទប្រកាន់កម្ពុជាកាលពីមុនថា មានមូលដ្ឋានទ័ពចិននៅតារាសាគរ បន្ទាប់មកនៅកំពង់សោម ហើយពេលនេះការចោទប្រកាន់បានធ្លាក់ដល់ព្រលានយន្តហោះកោះរ៉ុង។
លោកថ្លែងថា៖ «ចុះហេតុអ្វីបានជាអស់លោកចូលចិត្តលាបពណ៌ ហើយខ្ញុំយល់ថា បើសិនអ្នកណាចូលចិត្តធ្វើចារកម្ម ហើយផ្ដល់ព័ត៌មានឲ្យអ្នកដឹកនាំជឿបែបនេះ អ្នកដឹកនាំនោះក៏គួរត្រូវពិនិត្យម្ខាងពិនិត្យសមត្ថភាពរបស់ចារកម្ម ឯម្ខាងទៀតពិនិត្យសមត្ថភាពរបស់ខ្លួនក្នុងការវិនិច្ឆ័យព័ត៌មានដែលចារកម្មផ្ដល់ឲ្យត្រឹមត្រូវឬអត់»។
ទោះបីជាមិនបញ្ចេញឈ្មោះ តែលោកបង្ហើបថា មន្ត្រីទូតរូបនេះធ្លាប់បានស្នើសុំកម្ពុជាឲ្យកប៉ាល់ចូលចតកន្លងមក ដែលនេះលោកទំនងជាសំដៅដល់ឯកអគ្គរដ្ឋទូតសហរដ្ឋអាមេរិក Patrick Murphy ដែលធ្លាប់ស្នើឲ្យកប៉ាល់ទេសចរណ៍ MS Westerdam ចូលចតកាលពីខែកុម្ភៈ។
លោកថា៖ «ឥឡូវបើមានការលើកសំណូមពរស្អែក ទៀ បាញ់ ឆ្លើយអូខេទៅ ព្រោះខ្ញុំបានបើកចំហហើយ បើគេលើកសំណូមពរធ្វើសមយុទ្ធស្អែកឆ្លើយថា Yes តែម្ដងទៅ ព្រោះនេះចាត់ទុកថាជាគោលការណ៍ហើយ»៕