ភ្នំពេញ៖ ក្នុងទិវាវិទ្យុពិភពលោកលើកទី១០ ឆ្នាំនេះ លោកនាយករដ្ឋមន្ត្រី ហ៊ុន សែន ចាត់ទុកបេសកកម្មរបស់អ្នកសារព័ត៌មានដែលកំពុងបំពេញការងារក្នុងស្ថាប័នវិទ្យុផ្សាយសំឡេងទាំងអស់ក្នុងប្រទេសកម្ពុជា ពិតជាមានសារៈសំខាន់ក្នុងការចូលរួមចំណែកអភិវឌ្ឍប្រទេសជាតិប្រកបដោយចីរភាព តាមរយៈការផ្សាយព័ត៌មានពិត ប្រឆាំងនឹងព័ត៌មានក្លែងក្លាយ។
លោក ហ៊ុន សែន ផ្តល់ជាយោបល់ដល់អ្នកសារព័ត៌មានជាតិ/អន្តរជាតិទាំងអស់ ដែលកំពុងបំពេញការងារលើវិស័យព័ត៌មាននៅទូទាំងសកលលោក ត្រូវបង្កើនកិច្ចសហប្រតិបត្តិការក្នុងការទប់ស្កាត់ការរាតត្បាតជាសកលនៃជំងឺកូវីដ ១៩។ លោកក៏បានអំពាវនាវសាជាថ្មីដល់អ្នកសារព័ត៌មាននៅក្នុងស្ថាប័នវិទ្យុក៏ដូចជាអ្នកសារព័ត៌មានទាំងអស់ត្រូវយកចិត្តទុកដាក់អនុវត្តឱ្យបានត្រឹមត្រូវ តាមក្រមសីលធម៌វិជ្ជាជីវៈក្នុងការបំពេញភារកិច្ច ចៀសវាងការផ្សាយព័ត៌មានមិនពិត ឬព័ត៌មានដែលគ្មានប្រភពច្បាស់លាស់។
ទិវាវិទ្យុពិភពលោកត្រូវបានប្រារព្ធឡើងជារៀងរាល់់ឆ្នាំនៅថ្ងៃទី ១៣ ខែ កុម្ភៈ។ ឆ្នាំ ២០២១ ជាខួបលើកទី១១០ នៃការបង្កើតវិទ្យុផ្សាយសំឡេងនៅលើសកលលោក ហើយក៏ជាខួបលើកទី៧៥ នៃថ្ងៃកំណើតវិទ្យុអង្គការសហប្រជាជាតិដែលបានបង្កើតឡើងតាំងពីឆ្នាំ១៩៤៦។ ឆ្នាំនេះ រាជរដ្ឋាភិបាលកម្ពុជាបានប្រារព្ធទិវាវិទ្យុពិភពលោក ធ្វើឡើងក្រោមប្រធានបទ «នវានុវត្តន៍នៃវិទ្យុផ្សាយសំឡេងស្របតាមការវិវត្តនៃពិភពលោក»។
តាមរយៈសារលិខិតលោក ហ៊ុន សែន ថ្លែងថា៖ «ស្ថាប័នវិទ្យុផ្សាយសំឡេងក៏ដូចជាស្ថាប័នសារព័ត៌មានទាំងអស់បានចូលរួមប្រយុទ្ធប្រឆាំងនឹងព័ត៌មានក្លែងក្លាយ ដែលបង្កឡើងដោយពួកឱកាសនិយមប៉ុនប៉ងបង្កភាពចលាចលនៅក្នុងសង្គម ដើម្បីរំខានដល់ការរស់ឡើងវិញ និងសេចក្តីសុខសាន្តរបស់ប្រជាជនកម្ពុជា»។
លោកថា បេសកកម្មរបស់អ្នកសារព័ត៌មាន ពិតជាមានសារៈសំខាន់ក្នុងការចូលរួមចំណែកលើកស្ទួយលទ្ធិប្រជាធិបតេយ្យ និងការគោរពសិទ្ធិមនុស្ស ការថែរក្សាសុខសន្តិភាព ស្ថិរភាពនយោបាយ ការអភិវឌ្ឍប្រទេសជាតិ ប្រកបដោយចីរភាព។ ការពារសេចក្តីសុខសាន្ត និងការរស់ឡើងវិញរបស់ប្រជាជនកម្ពុជា ព្រមទាំងការពារអាយុជីវិតរបស់ប្រជាពលរដ្ឋឱ្យរួចផុតពីការយាយីនៃជំងឺឆ្លងកូវីដ ១៩ ដ៏កាចសាហាវនាពេលបច្ចុប្បន្ន។
ជាមួយគ្នានេះ អង្គការយូណេស្កូនៅកម្ពុជាក៏បានចូលរួមអបអរទិវាវិទ្យុពិភពលោកនេះផងដែរកាលពីថ្ងៃទី ១៣ កុម្ភៈ ក្រោមប្រធានបទ «ពិភពលោកថ្មីវិទ្យុថ្មី»។
លោក លៀ ស៊ីណា អ្នកយកព័ត៌មានប្រចាំវិទ្យុបាយ័ន ដែលធ្វើការក្នុងស្ថាប័នវិទ្យុប្រមាណជា ៨ ឆ្នាំមកហើយ នៅតែថា វិទ្យុមានសារៈសំខាន់ សម្រាប់ពលរដ្ឋខ្មែរ។
លោកនិយាយថា៖ «ការស្តាប់កម្មវិធីវិទ្យុ គឺចំណេញពេលវេលាពេលបំពេញការងារ របស់ពួកគាត់ ដូចជាពេល ដែលគាត់ធ្វើការ គាត់អាចស្ដាប់វិទ្យុបាន»៕